ଉପକୂଳରେ ବଢ଼ିବ ତାତି

ସତ୍ୟଶିଖା( ଭୁବନେଶ୍ୱର )୨୪.୦୩.୨୦୨୨ :  ପଶ୍ଚିମ ଓଡ଼ିଶାରେ ତାପମାତ୍ରା ବୃଦ୍ଧି ପାଉଛି। ଦୈନିକ ସର୍ବାଧିକ ତାପମାତ୍ରା ୪ ସହରରେ ୪୦ ଡିଗ୍ରୀ ଟପିଛି। ଆସନ୍ତା ସପ୍ତାହେ ପର୍ଯ୍ୟନ୍ତ ରାଜ୍ୟରେ ପାଗ ଶୁଖିଲା ରହିବ ଏବଂ ଉପକୂଳବର୍ତ୍ତୀ ଜିଲାଗୁଡିକରେ ଅସହ୍ୟ ଗରମ ଅନୁଭୂତ ହେବ ବୋଲି ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି।

ବୁଧବାର ରାଜ୍ୟର ୪ ସ୍ଥାନରେ ସର୍ବାଧିକ ତାପମାତ୍ରା ୪୦ ଡିଗ୍ରୀ ଅତିକ୍ରମ କରିଛି। ବଲାଙ୍ଗୀରରେ ଦିନ ତାପମାତ୍ରା ୪୦.୭ ଡିଗ୍ରୀ ସହ ରାଜ୍ୟର ସବୁଠୁ ଉତ୍ତପ୍ତ ସହର ପାଲଟିଛି। ଝାରସୁଗୁଡାରେ ୪୦.୨ ଡିଗ୍ରୀ, ଟିଟିଲାଗଡ ଏବଂ ବୌଦ୍ଧରେ ୪୦ ଡିଗ୍ରୀ ଲେଖାଏଁ ପାରଦ ରେକର୍ଡ ହୋଇଛି। ଭୁବନେଶ୍ବରରେ ୩୬.୯ ଏବଂ କଟକରେ ୩୬.୮ ଡିଗ୍ରୀ ଦିନ ତାପମାତ୍ରା ରହିଛି। ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ରର ଆକଳନାନୁଯାୟୀ, ଆସନ୍ତା ୨୪ ଘଣ୍ଟା ମଧ୍ୟରେ ଉପକୂଳ ଓଡ଼ିଶା ସମେତ କେନ୍ଦୁଝର, ମୟୂରଭଞ୍ଜ, ଢେଙ୍କାନାଳ, ଅନୁଗୋଳ, କନ୍ଧମାଳ, କୋରାପୁଟ, ମାଲକାନଗିରି ଏବଂ ସୁନ୍ଦରଗଡ ଜିଲାର ଗୋଟିଏରୁ ଦୁଇଟି ସ୍ଥାନରେ ବିଜୁଳି ଘଡଘଡି ସହ ହାଲୁକାର ମଧ୍ୟମ ଧରଣ ବର୍ଷା ହୋଇପାରେ। ଆସନ୍ତା ୫ ଦିନ ପର୍ଯ୍ୟନ୍ତ ସର୍ବାଧିକ ତାପମାତ୍ରାରେ ବିଶେଷ ପରିବର୍ତ୍ତନ ହେବାର ସମ୍ଭାବନା ନାହିଁ। ଆଭ୍ୟନ୍ତରୀଣ ଓଡ଼ିଶାର ଅଳ୍ପ କେତେକ ସ୍ଥାନରେ ସର୍ବାଧିକ ତାପମାତ୍ରାର ସ୍ବାଭାବିକଠାରୁ ପ୍ରାୟ ୨ ରୁ ୩ ଡିଗ୍ରୀ ଅଧିକ ରହିପାରେ। ଗରମ ଅନୁଭୂତ ହେବା ସମ୍ଭାବନା ରହିଛି।

ପଶୁପାଳକ କହିଛନ୍ତି, ଆଭ୍ୟନ୍ତରୀଣ ଓଡ଼ିଶାରେ କେବେ ଗରମ କମିବ ତା’ର ସଙ୍କେତ ମିଳିନାହିଁ। ୨୬ ସୁଦ୍ଧା ଆଉ କେତୋଟି ସ୍ଥାନରେ ସର୍ବାଧିକ ତାପମାତ୍ରା ୪୦ ଡିଗ୍ରୀ ଅତିକ୍ରମ କରିପାରେ। ଏପରିକି ରାଜ୍ୟର କିଛି ସ୍ଥାନରେ ପାରଦ ୪୨ ଡିଗ୍ରୀ ପର୍ଯ୍ୟନ୍ତ ଛୁଇଁବ। ୨୭ରୁ ୩୧ ତାରିଖ ସୁଦ୍ଧା ବିଭିନ୍ନ ସ୍ଥାନରେ ୨ରୁ ୩ ଡିଗ୍ରୀ ସର୍ବାଧିକ ତାପମାତ୍ରା ବୃଦ୍ଧି ପାଇବ। ୨୬ରୁ ୨୭ ତାରିଖରେ ଭୁବନେଶ୍ବର ସମେତ ଉପକୂଳବର୍ତ୍ତୀ ଜିଲାଗୁଡିକର କେତେକ ସ୍ଥାନରେ ଦିନ ତାପମାତ୍ରା ୪୦ ଡିଗ୍ରୀ ଅତିକ୍ରମ କରିବାର ସମ୍ଭାବନା ରହିଛି। ଗରମ ପବନ ବଢ଼ିବା ହେତୁ ଚାନ୍ଦବାଲିରେ ଦିନ ତାପମାତ୍ରା ୪୧ ଡିଗ୍ରୀ ଛୁଇଁପାରେ। ତେବେ ପବନର ଦିଗ ପରିବର୍ତ୍ତନ ହେତୁ ୨୮ରୁ ସର୍ବାଧିକ ତାପମାତ୍ରା ଉପକୂଳରେ କମିବ ଏବଂ ୩୧ ତାରିଖ ସୁଦ୍ଧା ପ୍ରାୟ ୩ରୁ ୪ ଡିଗ୍ରୀ କମିବାର ସମ୍ଭାବନା ରହିଛି। ମାର୍ଚ୍ଚ ୩୧ ଏବଂ ଏପ୍ରିଲ ପହିଲାରେ ଉପକୂଳରେ ପାଗ ମେଘୁଆ ରହିବା ସହ ଅଳ୍ପ କେତେକ ସ୍ଥାନରେ ହାଲୁକା ବର୍ଷା ହୋଇପାରେ।