କେନ୍ଦ୍ର ସରକାର ଓ ଟ୍ୱିଟର୍ ଇଣ୍ଡିଆକୁ ନୋଟିସ୍ ଜାରି କଲେ ସୁପ୍ରିମକୋର୍ଟ

ସତ୍ୟଶିଖା (ନୂଆଦିଲ୍ଲୀ) ୧୨/୦୨/୧୦୨୧ :   ସୁପ୍ରିମକୋର୍ଟ ଟ୍ୱିଟର ଉପରେ ଦେଶ ବିରୋଧୀ ଓ ଉତ୍ତେଜନାପ୍ରବଣ ମେସେଜ୍ ସେଣ୍ଡ୍ କରିବାକୁ ନେଇ ଟ୍ୱିଟର୍ ଇଣ୍ଡିଆ ଓ କେନ୍ଦ୍ର ସରକାରଙ୍କୁ ନୋଟିସ୍ ଜାରି କରିଛନ୍ତି । ଟ୍ୱିଟରରେ ଏପ୍ରକାର ମେସେଜ୍ ଆସିବା ପରେ କଣ ପଦକ୍ଷେପ ନିଆଯାଇ ପାରିବ ବୋଲି ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି ।

ବିଜେପି ନେତା ବିନିତ ଗୋୟନକା ସୁପ୍ରିମକୋର୍ଟରେ ଆବେଦନ ଦାଖଲ କରିଥିଲେ । ଏହାସହ କହିଥିଲେ ଯେ, ଟ୍ୱିଟରରେ ଅନେକ ଦେଶ ବିରୋଧୀ ଓ ଉତ୍ତେଜନାପୂର୍ଣ୍ଣ ମେସେଜ୍ ପୋଷ୍ଟ କରାଯାଉଛି । ଟ୍ୱିଟରରେ ବିଜ୍ଞାପନ ମଧ୍ୟ ଦିଆଯାଉଛି । ଏହାଦ୍ୱାରା ହେଟ୍ ସ୍ପିଚ୍ ପ୍ରସାରଣ ହେଉଛି । ଏହାକୁ ରୋକିବା ପାଇଁ ଏବେ କୌଣସି ଗାଇଡଲାଇନ୍ ନାହିଁ । ତେଣୁ କୋର୍ଟ ତୁରନ୍ତ ସରକାରଙ୍କୁ ଗାଇଡଲାଇନ୍ ତିଆରି କରିବାକୁ ନିର୍ଦ୍ଦେଶ ଦିଅନ୍ତୁ । ଫଳରେ ଏପରି ମେସେଜ୍ ଉପରେ ରୋକ୍ ଲଗାଯାଇପାରିବ । ଏହି ଆବେଦନର ଶୁଣାଣି କରି କୋର୍ଟ ଟ୍ୱିଟର୍ ଇଣ୍ଡିଆ ଓ କେନ୍ଦ୍ରସରକାରଙ୍କୁ ନୋଟିସ୍ ଜାରି କରି ଉତ୍ତର ମାଗିଛନ୍ତି ।

ସୂଚନାଯୋଗ୍ୟ, ଏହାପୂର୍ବରୁ ଟ୍ୱିଟରର ବରିଷ୍ଠ ଅଧିକାରୀଙ୍କ ସହ ବୈଠକ କରି ଭାରତ ସରକାର ଅସନ୍ତୋଷ ବ୍ୟକ୍ତ କରିଥିଲେ । ସରକାରଙ୍କ ସୂଚନା ଓ ପ୍ରଯୁକ୍ତିବିଦ୍ୟା ମନ୍ତ୍ରାଳୟର ସଚିବଙ୍କ ସଗ ଟ୍ୱିଟରର ବରିଷ୍ଠ ଅଧିକାରୀଙ୍କ ସହ ବୈଠକ ବସିଥିଲା । ଏଥିରେ ସରକାର ସ୍ପଷ୍ଟ ଭାବେ ନିୟମ ମାନିବାକୁ ଟ୍ୱିଟରକୁ କହିଥିଲେ । ବୈଠକ ପରେ ମନ୍ତ୍ରାଳୟର ସଚିବ କହିଥିଲେ ଯେ, ଭାରତ ସରକାର ବାକ୍ ସ୍ୱାଧିନତା ଓ ସମାଲୋଚନାକୁ ସ୍ୱୀକାର କରନ୍ତି । ଏହା ଗଣତନ୍ତ୍ରର ଅଂଶବିଶେଷ । କିନ୍ତୁ ଏହାର ଅର୍ଥ ଦେଶବିରୋଧୀ ଶକ୍ତିକୁ ପ୍ରୋତ୍ସାହିତ କରିବା ନୁହେଁ ବୋଲି ସେ କହିଥିଲେ ।