ସତ୍ୟଶିଖା (ନୂଆଦିଲ୍ଲୀ) ୨୯/୦୧/୨୦୧୧ : ଗତ କିଛି ଦିନ ଧରି ସେୟାର ବଜାର ଲାଲ ସଙ୍କେତରେ ବନ୍ଦ ହେଉଛି । ଶୁକ୍ରବାର କାରବାରର ଶେଷ ଦିନରେ ସେୟାର ବଜାରରେ ବୃଦ୍ଧି ଦେଖାଯାଇଥିଲା । କିନ୍ତୁ କାରବାର ମଧ୍ୟରେ ସେୟାର ମାର୍କେଟ୍ରେ ହ୍ରାସ/ବୃଦ୍ଧି ପରିଲକ୍ଷିତ ହୋଇଥିଲା । କାରବାର ଶେଷ ବେଳକୁ ପୁଣି ଥରେ ଲାଲ ସଙ୍କେତ ସହ ବନ୍ଦ ହୋଇଥିଲା ସେୟାର ବଜାର । ସଂସଦରେ ଶୁକ୍ରବାର ଅର୍ଥମନ୍ତ୍ରୀ ନିର୍ମଳା ସୀତାରମଣ ଆର୍ଥିକ ସର୍ବେକ୍ଷଣ ଜାରି କରିଥିଲେ । ଏହାର ପ୍ରଭାବ ସେୟାର ବଜାର ଉପରେ ପଡିଥିଲା ।
ତେବେ ସଂସଦରେ ଆର୍ଥିକ ସର୍ବେକ୍ଷଣ ଜାରି ହେବା ପରେ ସେୟାର ବଜାରରେ ନିବେଶକମାନଙ୍କ ଉତ୍ସାହ ଦେଖିବାକୁ ମିଳିନଥିଲା । ଶୁକ୍ରବାର ଦିନ ବମ୍ବେ ଷ୍ଟକ୍ ଏକ୍ସଚେଞ୍ଜର ସେନସେକ୍ସ ୫୮୮.୫୯ ଅଙ୍କ ହ୍ରାସ ପାଇ ୪୬୨୮୫.୭୭ରେ ବନ୍ଦ ହୋଇଥିଲା । ସେହିପରି ନ୍ୟାସନାଲ ଷ୍ଟକ୍ ଏକ୍ସଚେଞ୍ଜର ନିଫ୍ଟି ୧୮୨.୫୯ ଅଙ୍କ ହ୍ରାସ ପାଇ ୧୩୬୩୪.୬୦ରେ ବନ୍ଦ ହୋଇଛି । ସରକାରୀ ତଥ୍ୟ ଅନୁସାରେ ଗତ ବର୍ଷ ଏପ୍ରିଲ-ନଭେମ୍ବର ମାସରେ ବିଦେଶୀ ପ୍ରତ୍ୟକ୍ଷ ବିନିଯୋଗ (FDI) ନିବେଶ ୫୮.୩୭ ଆରବ ଡଲାର ରହିଥିଲା । ଯାହାକି ଗତ ବର୍ଷର ୪୭.୬୭ ତୁଳନାରେ ଅଧିକ । ଏହି ଅବଧି ମଧ୍ୟରେ ସେୟାର ବଜାରରେ ଏଫଡିଆଇ ୪୩.୮୫ ଆରବ ଡଲାର ରହିଛି । ଯାହାକି ଗତ ବର୍ଷ ତୁଳନାରେ ୩୭ ପ୍ରତିଶତ ଅଧିକ ।
ବଡ ଷ୍ଟକ୍ ବିଷୟରେ କହିବାକୁ ଗଲେ ଶୁକ୍ରବାର ଇଣ୍ଡସଇଣ୍ଡ୍ ବ୍ୟାଙ୍କ, ସନ୍ ଫାର୍ମା, ଆଇସିଆଇସିଆଇ ବ୍ୟାଙ୍କ, HDFC ବ୍ୟାଙ୍କ ଏବଂ HDFC ଲାଇଫର ସେୟାର ସବୁଜ ସଙ୍କେତରେ ବନ୍ଦ ହୋଇଛି । ଅନ୍ୟପକ୍ଷରେ ମାରୁତି, ଡକ୍ଟର ରେଡ୍ଡୀ, ହିରୋ ମୋଟୋକର୍ପ, ଟାଟା ଷ୍ଟିଲ ଏବଂ ଭାରତୀ ଏୟାରଟେଲର ସେୟାର ଲାଲ ସଙ୍କେତ ସହ ବନ୍ଦ ହୋଇଛି ।
ଗୁରୁବାର ସେୟାର ବଜାରରେ ମିଶ୍ରିତ କାରବାର ପରେ ସେୟାର ବଜାର ଲାଲ ସଙ୍କେତରେ ବନ୍ଦ ହୋଇଥିଲା । ଗୁରୁବାର ଦିନ ବମ୍ବେ ଷ୍ଟକ୍ ଏକ୍ସଚେଞ୍ଜର ସେନସେକ୍ସ ୫୩୫.୫୭ ଅଙ୍କ ହ୍ରାସ ପାଇ ୪୬୮୭୪.୩୬ରେ ବନ୍ଦ ହୋଇଥିଲା । ସେହିପରି ନ୍ୟାସନାଲ ଷ୍ଟକ୍ ଏକ୍ସଚେଞ୍ଜର ନିଫ୍ଟି ୧୪୯.୯୫ ଅଙ୍କ ହ୍ରାସ ପାଇ ୧୩୮୧୭.୫୫ରେ ବନ୍ଦ ହୋଇଥିଲା ।
