ସତ୍ୟଶିଖା ୦୫ .୧୦ .୨୦୨୦ : ରାଜ୍ୟରେ ଲଘୁଚାପ ଜନିତ ବର୍ଷା 2ରୁ 3 ଦିନ ଲାଗି ରହିବ l ଆଜି ରାଜ୍ୟର ସବୁ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । କିଛି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏଥିପାଇଁ 16ଟି ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ସେହି ଜିଲ୍ଲା ଗୁଡିକ ହେଲା- ଗଜପତି, ଗଞ୍ଜାମ, ରାୟଗଡା, କନ୍ଧମାଳ, କଳାହାଣ୍ଡି, ବୌଦ୍ଧ, ବଲାଙ୍ଗିର, ଢେଙ୍କାନାଳ, ଅନୁଗୁଳ, ପୁରୀ, ଖୋର୍ଦ୍ଧା, ବାଲେଶ୍ୱର, ଭଦ୍ରକ, କଟକ, ଜଗତସିଂହପୁର, କେନ୍ଦ୍ରାପଡା । ଏହାସହ ଉତ୍ତର ଓଡିଶା ଓ ଦକ୍ଷିଣ ଓଡ଼ିଶାର ଅଧିକାଂଶ ସ୍ଥାନରେ ବର୍ଷା ଲାଗି ରହିବ ।
ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ଥିବାରୁ ଆଭ୍ୟନ୍ତରୀଣ ଓ ଉପକୂଳବର୍ତ୍ତୀ ଜିଲ୍ଲା ଗୁଡିକୁ ସତର୍କ ସୂଚନା ଦିଆଯାଇଛି । ଉତ୍ତର-ପଶ୍ଚିମର ଉପକୂଳ ଓଡ଼ିଶା ପାଖରେ ଲଘୁଚାପ ସକ୍ରିୟ ରହିଛି । ପ୍ରଭାବରେ ଆସନ୍ତା 6 ତାରିଖ ଯାଏଁ ବର୍ଷା ଲାଗି ରହିବ । 7 ତାରିଖକୁ ବର୍ଷାର ପରିମାଣ କିଛିଟା କମିବ। ସେପଟେ ଆସନ୍ତା 9ରେ ଆଉ ଏକ ଲଘୁଚାପ ଆସୁଛି । ଆଣ୍ଡାମାନରେ ଏକ ଲୋ ପ୍ରେସର ସୃଷ୍ଟି ହୋଇଛି । ଯାହାକି ଦୁଇ ତିନି ଦିନ ମଧ୍ୟରେ ଆନ୍ଧ୍ରପ୍ରଦେଶ-ଓଡିଶା ଉପକୂଳ ମୁହାଁଇବ । ଏହି ଲୋ ପ୍ରେସର ଡିପ୍ରେସନରେ ପରିଣତ ହୋଇପାରେ । ଯାହା ପ୍ରଭାବରେ ଆସନ୍ତା 11ରୁ 13 ତାରିଖ ମଧ୍ୟରେ ବର୍ଷା ଲାଗି ରହିବ ବୋଲି ପାଣିପାଗ କେନ୍ଦ୍ର ପକ୍ଷରୁ ସୂଚନା ରହିଛି ।
