ସତ୍ୟଶିଖା(ଭୁବନେଶ୍ୱର) ୨୯ .୧୧.୨୦୨୧: ବିଧାନସଭାର ଶୀତକାଳୀନ ଅଧିବେଶନ ଡିସେମ୍ବର ପହିଲାରୁ ଆରମ୍ଭ ହେବ । ପ୍ରାୟ ୨୫ଦିନ ଧରି ବସିବାକୁ ଥିବା ଏହି ଅଧିବେଶନ କିଭଳି ସୁରୁଖୁରୁରେ ଚାଲିବ ସେଥିନେଇ ବାଚସ୍ପତିଙ୍କ ପ୍ରାଥମିକତା ଥିବାବେଳେ ଶାସକ ଓ ବିରୋଧୀ ଦଳ ବହୁ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉଠାଇବାକୁ ତତ୍ପର ହେଲେଣି। ବାଚସ୍ପତି ଡ. ସୂର୍ଯ୍ୟନାରାୟଣ ପାତ୍ର ଚଳିତ ବିଧାନସଭାରେ ‘ସିମଲା’ ସମ୍ମିଳନୀର ନିଷ୍ପତ୍ତି କାର୍ଯ୍ୟକାରୀ କରିବାକୁ ସ୍ଥିର କରିଛନ୍ତି। ଯାହାଦ୍ବାରା ଗୃହରେ ସଦସ୍ୟଗଣ ହଙ୍ଗାମା କରିପାରିବେନାହିଁ। ଏହି ପରିପ୍ରେକ୍ଷୀରେ ଆଜି ଅର୍ଥାତ ସୋମବାର ବାଚସ୍ପତିଙ୍କ ଅଧ୍ୟକ୍ଷତାରେ ସର୍ବଦଳୀୟ ବୈଠକ ଅନୁଷ୍ଠିତ ହେବ।
ପୂର୍ବ ଅଧିବେଶନ ତୁଳନାରେ ଚଳିତବର୍ଷର ଏହି ଅଧିବେଶନର ବହୁ ଗୁରୁତ୍ବ ରହିଛି। ପରୀ ଓ ମାହାଙ୍ଗା ହତ୍ୟାକାଣ୍ଡ ପ୍ରସଙ୍ଗ ମାସକ
ଭିତରେ ଜନମାନସରୁ ମିଳେଇ ଯାଇଥିବାବେଳେ କଳାହାଣ୍ଡିର ଶିକ୍ଷୟିତ୍ରୀ ମମିତା ମେହେର ହତ୍ୟାକାଣ୍ଡ ଦୀର୍ଘ ଦେଢ଼ ମାସ ପରେ ବି ଥମିବା ନାଁ ଧରୁନାହିଁ। ବିରୋଧୀ ବିଜେପି ଓ କଂଗ୍ରେସ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଜିଦ୍ରେ ଅଟଳ ରହିଛନ୍ତି। ଏହାବାଦ୍ ଆଗକୁ ପଞ୍ଚାୟତ ଓ ପୌର ନିର୍ବାଚନ ଥିବାରୁ ଏହି ଅଧିବେଶନରେ ଆଇନଶୃଙ୍ଖଳା ପରିସ୍ଥିତିକୁ ନେଇ ସରକାରଙ୍କୁ ଘେରିବାକୁ ଉଭୟ ବିରୋଧୀ ବିଜେପି ଓ କଂଗ୍ରେସ ଦଳ ରଣନୀତି ପ୍ରସ୍ତୁତ କରୁଛନ୍ତି। ବିଜେପି ଏହି ପ୍ରସଙ୍ଗରେ ଗୃହ ରାଷ୍ଟ୍ରମନ୍ତ୍ରୀଙ୍କ ବହିଷ୍କାର ଓ ସିବିଆଇ ତଦନ୍ତ ଦାବିେର ଅଡ଼ି ବସି ଥିବାବେଳେ କଂଗ୍ରେସ ଏହି ମାମଲା ଉଚ୍ଚ ନ୍ୟାୟାଳୟକୁ ନେବା ସହିତ ଜଣେ ବିଚାରପତିଙ୍କ ଅଧ୍ୟକ୍ଷତାରେ ‘ଏସଆଇଟି’ ତଦନ୍ତ ପାଇଁ ଦାବି କରୁଛି। ଅନ୍ୟପକ୍ଷରେ ଶାସକଦଳ ବିରୋଧୀଙ୍କ ନିଷ୍ପ୍ରଭ କରିବା ପାଇଁ ରଣନୀତି କରୁଛି। ଯଦି ରାଜ୍ୟର ସ୍ବାର୍ଥ ନେଇ ବିରୋଧୀ ଗଠନମୂଳକ ଆଲୋଚନା ପାଇଁ ଆସିବେ ତେବେ ସରକାର ରାଜି, ନଚେତ୍ ବିରୋଧୀଙ୍କୁ ସାମ୍ନା କରିବାକୁ ଆମେ ପ୍ରସ୍ତୁତ ବୋଲି ସରକାରୀ ଦଳର ସଭ୍ୟ କହିଛନ୍ତି।
କଂଗ୍ରେସ ବିଧାୟକଦଳ ନେତା ନରସିଂହ ମିଶ୍ର କହିଛନ୍ତି, ମମିତା ମେହେରଙ୍କ ଜଘନ୍ୟ ହତ୍ୟାକାଣ୍ଡରେ ପୁଲିସ ଯେଭଳି ତଦନ୍ତ କରିବା କଥା ତାହା କରୁନାହିଁ। ମମିତାଙ୍କ ବାପାଙ୍କୁ ମୁଁ ପ୍ରଥମେ ସାକ୍ଷାତ କଲା ବେଳେ ସେ ମତେ ଯାହା ବୟାନ ଦେଇଥିଲେ ତାହା ନ୍ୟାୟାଳୟରେ ବଦଳା ଯାଇଛି। ଏହାବାଦ୍ ଏହି ସମ୍ବେଦନଶୀଳ ଘଟଣାରେ ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କ ଘନିଷ୍ଠ ଗୃହରାଷ୍ଟ୍ରମନ୍ତ୍ରୀଙ୍କ ସମ୍ପୃକ୍ତି ରହିଛି ବୋଲି ମମିତାଙ୍କ ପେନ୍ଡ୍ରାଇଭରେ ତଥ୍ୟ ରହିଥିବା ତାଙ୍କ ବାପା ମତେ କହିଛନ୍ତି। ତେଣୁ ଏହି ଘଟଣାରେ ଆବଶ୍ୟକ ପଡ଼ିଲେ ମୁଁ ପୁଣିଥରେ କଳାକୋର୍ଟ ପିନ୍ଧି ଉଚ୍ଚନ୍ୟାୟାଳୟରେ ମାମଲା ଲଢ଼ିବି। ଏହି ଘଟଣାରେ ସରକାର ଜଣେ ଉଚ୍ଚନ୍ୟାୟାଳୟ ବିଚାରପତିଙ୍କ ଅଧ୍ୟକ୍ଷତାରେ ଏସଆଇଟି ତଦନ୍ତ କରାଇବାକୁ ଦାବି କରିବି। ତେବେ ଦଳର ତିନିଜଣ ବିଧାୟକ ଯେଉଁ ଗୃହ ରାଷ୍ଟ୍ରମନ୍ତ୍ରୀଙ୍କୁ ଗୃହକୁ ପୂରାଇ ଦେବେ ନାହିଁ ବୋଲି କହିଛନ୍ତି ତାହାକୁ ନେଇ ଆଲୋଚନା କରିବୁ। ଆସନ୍ତାକାଲି ସର୍ବଦଳୀୟ ବୈଠକ ପାଇଁ କଂଗ୍ରେସ ଦଳ ପ୍ରସ୍ତୁତ ରହିଛି।
ବିଜେପି ପକ୍ଷରୁ ବିରୋଧୀଦଳ ମୁଖ୍ୟ ସଚେତକ ମୋହନ ମାଝି କହିଛନ୍ତି ଯେ, ଓଡ଼ିଶାବସୀଙ୍କ ସ୍ବାର୍ଥ ପାଇଁ ବିଜେପି ଲଢ଼ିବ। ଗୃହରେ ମମିତା ପ୍ରସଙ୍ଗକୁ ନେଇ ହଙ୍ଗାମା ହେବ। ଯଦି ବାଚସ୍ପତି ସିମଲା’ ନିଷ୍ପତ୍ତି ଓଡ଼ିଶାରେ ଲାଗୁ କରିବାକୁ ଚାହାନ୍ତି, ତେବେ କରିପାରନ୍ତି। ନିଲମ୍ବନ ପାଇଁ ବିଜେପି ସଭ୍ୟମାନେ ଡରିନାହାନ୍ତି। ସେ କହିଛନ୍ତି ଯେ ରାଜ୍ୟ ସରକାର କିଭଳି ଶତାଧିକ କୋଟି ଟଙ୍କାର ଖଣି ଦୁର୍ନୀତି ପ୍ରକ୍ରିୟା ଜାରି ରଖିଛନ୍ତି ତା’ର ପେଡ଼ି ଖୋଲିବା ସହିତ ଆଇନଶୃଙ୍ଖଳାଠାରୁ ଆରମ୍ଭ କରି ନିଯୁକ୍ତି ଦୁର୍ନୀତି ଓ ବେକାରୀ ଭଳି ବିଭିନ୍ନ ପ୍ରସଙ୍ଗକୁ ନେଇ ଗୃହରେ ସରକାରଙ୍କଠାରୁ ଜବାବ ମାଗିବୁ।
ଅନ୍ୟପକ୍ଷରେ ବିଜେଡି ବିଧାୟକ ପ୍ରତାପ ଦେବ କହିଛନ୍ତି ଯେ, ମମିତା ମେହେର ପ୍ରସଙ୍ଗରେ ଖୋଦ୍ ଗୃହ ରାଷ୍ଟ୍ରମନ୍ତ୍ରୀ ନିଜ ଆଡୁ ଘୋଷଣା କରିଛନ୍ତି ଯେ, ଯଦି ଏହି ମାମଲାରେ କାହା ପାଖରେ ତାଙ୍କ ବିରୋଧରେ କିଛି ବି ପ୍ରମାଣ ରହିଛି ତେବେ ନ୍ୟାୟାଳୟ କିମ୍ବା ପୁଲିସକୁ ଦେବା ଆବଶ୍ୟକ। ବିରୋଧୀଙ୍କ ପାଖରେ ଯଦି ପ୍ରମାଣ ଅଛି ତେବେ ଦିଅନ୍ତୁ, ଅଯଥାରେ ହଟ୍ଟଗୋଳ କଲେ କିଛି ଲାଭ ହେବନାହିଁ। ରାଜ୍ୟରେ ବିଜେଡି ସରକାର ସବୁବେଳେ ଜନସାଧାରଣଙ୍କ ସ୍ବାର୍ଥକୁ ଦୃଷ୍ଟିରେ ରଖି କାର୍ଯ୍ୟ କରି ଆସିଛି। ବିରୋଧୀମାନେ ଯଦି ଗଠନମୂଳକ ପ୍ରସ୍ତାବ ଦେବେ ତେବେ ଆଲୋଚନା ପାଇଁ ଆମେ ପ୍ରସ୍ତୁତ, ନଚେତ୍ ଅଯଥାରେ ବିରୋଧ କଲେ ତା’ର ମୁକାବିଲା କରାଯିବ ବୋଲି ଶ୍ରୀ ଦେବ କହିଛନ୍ତି।
