ସତ୍ୟଶିଖା ( ଭୁବନେଶ୍ୱର )୨୦ /୧୧ /୨୦୨୧: କୋଭିଡ୍ କାରଣରୁ ଦୀର୍ଘ ଦିନ ହେଲା ରାଜ୍ୟରେ ସାଂସ୍କୃତିକ କାର୍ଯ୍ୟକ୍ରମ ବନ୍ଦ ହୋଇ ରହିଥିଲା। ଏହି କାରଣରୁ ଯାତ୍ରା କଳାକାର ମଧ୍ୟ ରାସ୍ତାକୁ ଓହ୍ଲାଇଥିଲେ । ସରକାର କଳାକାରଙ୍କ ଦୁଃଖ ବୁଝିବା ସହିତ ସାଂସ୍କୃତିକ କାର୍ଯ୍ୟକ୍ରମକୁ ଅନୁମତି ଦେବାକୁ ସେମାନେ ଦାବି କରିଥିଲେ।
ରାଜ୍ୟରେ ଦିନକୁ ଦିନ କରୋନା ସଂକ୍ରମଣ ହ୍ରାସ ପାଉଥିବାବେଳେ ଧୀରେଧୀରେ କଟକଣା ମଧ୍ୟରେ ସବୁ ଖୋଲିଲାଣି। ତେବେ ଏହାରି ଭିତରେ ଆଜି ଯାତ୍ରା ଅପେରା ଓ ଡ୍ରାମା, ମେଲୋଡିକୁ ଅନୁମତି ମିଳିଛି । ଏହା ସହିତ ଶାସ୍ତ୍ରୀୟ ନୃତ୍ୟ, ସାଂସ୍କୃତିକ ପ୍ରତିଯୋଗିତାକୁ ମଧ୍ୟ ରାଜ୍ୟ ସରକାର ଅନୁମତି ପ୍ରଦାନ କରିଛନ୍ତି । ତେବେ ଏଥିପାଇଁ ଏସଆରସିଙ୍କ ପକ୍ଷରୁ ନୂଆ ଗାଇଡଲାଇନ୍ ଜାରି କରାଯାଇଛି ।
ତେବେ ଏଥିପାଇଁ ରାଜ୍ୟ ସରକାରଙ୍କ ତରଫରୁ କିଛି ଗାଇଡଲାଇନ୍ ଧାର୍ଯ୍ୟ କରାଯାଇଛି । ଯେଉଁଥିରେ କୁହାଯାଇଛି ଯେ, ଏହି ସବୁ କାର୍ଯ୍ୟକ୍ରମରେ କେବଳ ୨ ହଜାର ଲୋକ ଅଂଶଗ୍ରହଣ କରିପାରିବେ । ତା ସହିତ ଆବଦ୍ଧ କୋଠରୀ ଭିତରେ କେବଳ ୫୦ ପ୍ରତିଶତ ଦର୍ଶକଙ୍କୁ ନେଇ ମେଲୋଡି, ଯାତ୍ରା, ଅପେରା କିମ୍ବା ସାଂସ୍କୃତିକ କାର୍ଯ୍ୟକ୍ରମ ହୋଇପାରିବ । ପ୍ରତ୍ୟେକ ଦର୍ଶକ ନିଜ ନିଜ ଭିତରେ ସାମାଜିକ ଦୂରତା ରକ୍ଷା କରିବେ । ସିଟ୍ ଗୁଡିକ ଭିତରେ ଅତି କମରେ ୬ ଫୁଟର ଦୂରତା ରହିବ ବୋଲି ଗାଇଡଲାଇନରେ ଉଲ୍ଲେଖ କରାଯାଇଛି ।
ତେବେ ଯାତ୍ରା, ଅପେରା ଦେଖିବାକୁ ହେଲେ ଦର୍ଶକଙ୍କୁ କୋଭିଡ୍ ନେଗେଟିଭ୍ ରିପୋର୍ଟ ଦେଖାଇବାକୁ ପଡିବ । ନଚେତ୍ ୭୨ ଘଣ୍ଟା ଭିତରେ ଦର୍ଶକଙ୍କୁ କୋଭିଡ୍ ନେଗେଟିଭ ଆରଟିିପିସିଆର୍ ରିପୋର୍ଟ ଦେଖାଇବାକୁ ପଡିବ । ଏହି ସବୁ କାର୍ଯ୍ୟକ୍ରମରେ ୬୫ ବର୍ଷରୁ ଅଧିକ ବୟସର ଲୋକ , ଅସୁସ୍ଥ ଲୋକ ଓ ଗର୍ଭବତୀ ମହିଳାଙ୍କୁ ଯୋଗ ଦେବାକୁ ବାରଣ କରାଯାଇଛି । ଅନ୍ୟପଟେ ମେଲୋଡି, ଯାତ୍ରା ଆଦି କାର୍ଯ୍ୟକ୍ରମରେ ଗୁଟୁଖା ଖାଇବାକୁ ମଧ୍ୟ ମନା କରାଯାଇଛି ।
