

ସତ୍ୟଶିଖା(ଭୁବନେଶ୍ୱର) ୦୯ .୦୭.୨୦୨୧: ଆସନ୍ତା ସୋମବାର ରଥ ଯାତ୍ରା। ଆଜି ଶ୍ରୀଜିଉଙ୍କ ନବଯୌବନ ଦର୍ଶନ। ଏହାକୁ ଦୃଷ୍ଟିରେ ରଖି ରବିବାର ରାତି ୮ରୁ ମଙ୍ଗଳବାର ରାତି ୮ଟା ପର୍ଯ୍ୟନ୍ତ ପୁରୀରେ କର୍ଫ୍ୟୁ ବଳବତ୍ତର ରହିବ। ଦୁଇଦିନ କର୍ଫ୍ୟୁ ଥିବାରୁ ଶନିବାର ଶଟଡାଉନ୍ କଟକଣା ଲାଗୁ ହେବ ନାହିଁ। ଚଳିତ ବର୍ଷ ମଧ୍ୟ କରୋନା କଟକଣା ପାଇଁ ଭକ୍ତ ନବଯୌବନ ଦର୍ଶନ କରିପାରିବେନି। ଶୁକ୍ରବାର ସକାଳୁ ଚକାଅପସର ନୀତି କରାଯିବ। ମଙ୍ଗଳଆରତୀ ଅବକାଶ ପରେ ଦଶଅବତାର ଠାକୁର ବାହୁଡା ବିଜେ କରିବେ। ତା’ପରେ ନବଯୌବନ ଦର୍ଶନ। ସର୍ବାଙ୍ଗ ଓ ବନ୍ଦାପନା ପରେ ନେତ୍ରୋତ୍ସବ ବନ୍ଦାପନା କରାଯିବ। ଦୀର୍ଘ ୧୫ଦିନ ପରେ ଭକ୍ତ ପତିତପାବନଙ୍କୁ ଦେଖିବାର ସୁଯୋଗ ପାଇବେ। ଗତକାଲି ଚତୁର୍ଦ୍ଦଶୀ ତିଥିରେ ଶ୍ରୀନଅରକୁ ଖଡ଼ିପ୍ରସାଦ ବିଜେନୀତି ସମାପନ ସହିତ ଶ୍ରୀଜିଉଙ୍କ ଶ୍ରୀଅଙ୍ଗରେ ଖଡ଼ି ପ୍ରସାଦ ଲାଗି ପରେ ପୂର୍ଣ୍ଣ ଅଣସର ଗୁପ୍ତ ସେବା ନୀତି ଶେଷ ହୋଇଛି। ସେହିପରି ରଥ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ତିନି ରଥ କନା ମୁଣ୍ଡଣି କାର୍ଯ୍ୟ କରାଯାଉଛି।