ସତ୍ୟଶିଖା(ଭୁବନେଶ୍ୱର ) ୨୪.୦୮ .୨୦୨୧: ସାରା ରାଜ୍ୟରେ ନିଅଣ୍ଟିଆ ବର୍ଷା ପରିମାଣ ବଢ଼ିବାରେ ଲାଗିଛି । ଶ୍ରାବଣ ଯାଇ ଭାଦ୍ରବ ମାସ ଆରମ୍ଭ ହେଲାଣି ହେଲେ ଆବଶ୍ୟକ ପରିମାଣର ବର୍ଷା ନାହିଁ । ବିଲରେ ପାଣି ନାହିଁ, ଚାଷୀ ମୁଣ୍ଡରେ ହାତ ଦେଇ ବସିଛି । ତଳି ରୁଆ ପରେ ବିଲରେ ପାଣି ରହିବା ବଦଳରେ ମାଟି ଫାଟି ଆଁ କରିଛି । ଯାଜପୁର, ଭଦ୍ରକ, ବଲାଙ୍ଗିର, ଝାରସୁଗୁଡା, ଅନୁଗୁଳ ଭଳି କିଛି ଜିଲ୍ଲାରେ ସ୍ଥିତି ଏମିତି ଯେ ରୋଇଥିବା ତଳି ବି ଶୁଖିଗଲାଣି । ତଳମୁଣ୍ଡରେ ପାଣି ଅଭାବରୁ ଚାଷୀମାନେ ଏବେ ବର୍ଷା ପାଇଁ ଆକାଶକୁ ଚାତକ ପରି ଚାହିଁ ରହିଛନ୍ତି । ହେଲେ ଅଗଷ୍ଟରେ ଏଯାଏଁ ବର୍ଷା ୫୫% ନିଅଣ୍ଟିଆ ରହିଥିବା ଆଞ୍ଚଳିକ ପାଣିପାଗ କେନ୍ଦ୍ର ସୂତ୍ରରୁ ଜଣାଯାଇଛି ।
ବରିଷ୍ଠ ପାଣିପାଗ ବିଶେଷଜ୍ଞ ତଥା ପାଣିପାଗ କେନ୍ଦ୍ର ନିର୍ଦ୍ଦେଶକ ଏଚ୍ ଆର ବିଶ୍ୱାସଙ୍କ ସୂଚନା ମୁତାବକ, ରାଜ୍ୟର ୨୭ ଜିଲ୍ଲାରେ ଏବେ ନିଅଣ୍ଟିଆ ବର୍ଷା ରେକର୍ଡ କରାଯାଇଛି । ଯାଜପୁରରେ ସର୍ବାଧିକ ୫୫% କମ୍ ବର୍ଷା ରେକର୍ଡ କରାଯାଇଛି । ଏବେସୁଧା ରାଜ୍ୟରେ ପ୍ରାୟ ୮୪୦ ମିମି ସ୍ୱାଭାବିକ ବର୍ଷା ରେକର୍ଡ ହେବା କଥା କିନ୍ତୁ ୫୮୪ ମିମି ବର୍ଷା ରେକର୍ଡ ହୋଇଛି । ଯାହା ସ୍ୱାଭାବିକ ଠାରୁ ୩୧% ନିଆଣ୍ଟିଆ ରହିଛି । ସବୁଠୁ ବେଶି ଚିନ୍ତା ବଢାଇଛି ଅଗଷ୍ଟରେ ରେକର୍ଡ ହୋଇଥିବା ୫୫% ବର୍ଷା । ଅଗଷ୍ଟରେ ଗୋଟିଏ ଜିଲ୍ଲା ମାଲକାନଗିରିରେ ସ୍ୱାଭାବିକ ବର୍ଷା ରେକର୍ଡ ହୋଇଛି । ଏହା ବ୍ୟତୀତ ଅନ୍ୟ ସମସ୍ତ ଜିଲ୍ଲାରେ ବର୍ଷା ପରିମାଣ ନିଆଣ୍ଟିଆ ରହିଛି । କିନ୍ତୁ ଆସନ୍ତା ୨୬ରେ ବାୟୁମଣ୍ଡଳରେ ଏକ ଘୁର୍ଣ୍ଣିବଳୟ ସୃଷ୍ଟି ହେବାନେଇ ଆଶଙ୍କା ରହିଛି ।
ସମ୍ଭାବ୍ୟ ଘୁର୍ଣ୍ଣିବଳୟ ୨୭ରେ ଲଘୁଚାପ ରୂପ ନେଇପାରେ ବୋଲି ପୂର୍ବଆକଳନ କରାଯାଉଛି । ସମ୍ପୃକ୍ତ ପାଣିପାଗ ନିୟାମକ ପ୍ରଭାବରେ ରାଜ୍ୟର ଏକାଧିକ ଜିଲ୍ଲାରେ ବିଜୁଳି ଘଡଘଡି ସହ ବର୍ଷା ସମ୍ଭାବନା ରହିଛି ବୋଲି ବିଶେଷଜ୍ଞ ଶ୍ରୀ ବିଶ୍ୱାସ କହିଛନ୍ତି । ଅଗଷ୍ଟ ମାସରେ ଦୁଇ ଦୁଇଟି ଲଘୁଚାପ ହୋଇଥିଲେ ମଧ୍ୟ ଆବଶ୍ୟକ ପରିମାଣର ବର୍ଷା ହୋଇନାହିଁ । ଆଉ ୩ ଦିନ ପର୍ଯ୍ୟନ୍ତ ମଧ୍ୟ ଆଶାନୁରୂପକ ବର୍ଷା ହେବାର ସମ୍ଭାବନା ନାହିଁ । ତେବେ ଦକ୍ଷିଣ ପଶ୍ଚିମ ମୌସୁମୀ ନିମ୍ନଚାପ ରେଖା ସକ୍ରିୟ ରହିଥିବାବେଳେ ଏହା ପ୍ରଭାବରେ ରାଜ୍ୟର ଅଧିକାଂଶ ଜିଲ୍ଲାରେ ସାମାନ୍ୟରୁ ମଧ୍ୟମ ଧରଣର ବର୍ଷା ହେଉଛି । ପାଣିପାଗ କେନ୍ଦ୍ର ପ୍ରଦତ୍ତ ତଥ୍ୟ ମୁତାବକ, ମୌସୁମୀ ପ୍ରାରମ୍ଭରୁ ଜୁଲାଇ ଶେଷ ଯାଏ ନିଅଣ୍ଟିଆ ବର୍ଷାର ପରିମାଣ ୧୯% ଥିଲା । ଯାହାକି ସ୍ୱାଭାବିକଠାରୁ ସାମାନ୍ୟ କମ୍ ଥିଲା, ହେଲେ ଚଳିତ ଅଗଷ୍ଟ ମାସରେ ଅଭାବୀ ବର୍ଷା ପରିମାଣ ଅହେତୁକ ଭାବେ ବୃଦ୍ଧିପାଇଥିବା ପାଣିପାଗ ବିଶେଷଜ୍ଞ ଉମାଶଙ୍କର ଦାସ କହିଛନ୍ତି ।
