ସତ୍ୟଶିଖା (ନୂଆଦିଲ୍ଲୀ) ୦୩/୧୦/୨୦୨୦ : ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତଙ୍କୁ ହତ୍ୟା କରାଯାଇ ଥିଲା ନା ସେ ଆତ୍ମହତ୍ୟା କରିଥିଲେ ଏବେ ଏ ପ୍ରଶ୍ନରେ ପୂର୍ଣ୍ଣଚ୍ଛେଦ ପକାଇଛି ଏମ୍ସ ରିପୋର୍ଟ । ସୁଶାନ୍ତ ମୃତ୍ୟୁ ମାମଲାରେ ଏମ୍ସ ଡାକ୍ତରୀ ପ୍ୟାନେଲ ହତ୍ୟା ଓ ଆତ୍ମହତ୍ୟା ଥିଓରିକୁ ସମାଧାନ କରିଛନ୍ତି । ସୁଶାନ୍ତଙ୍କ ମୃତ୍ୟୁ ଆତ୍ମହତ୍ୟା ଥିଲା, ହତ୍ୟା ନୁହେଁ । ମୁଖ୍ୟ ଡାକ୍ତର ସୁଧୀର ଗୁପ୍ତା କହିଛନ୍ତି ସୁଶାନ୍ତଙ୍କୁ କେହି ହତ୍ୟା କରି ନାହାନ୍ତି । ବରଂ ଏହା ଆତ୍ମହତ୍ୟା ମାମଲା । ସୁଶାନ୍ତଙ୍କ ପୋଷ୍ଟମର୍ଟମ ରିପୋର୍ଟ ତଦନ୍ତ କରିବା ପରେ ଏମ୍ସ ଟିମ ଏହି ନିଷ୍କର୍ଷରେ ପହଞ୍ଚିଛନ୍ତି ।
ସେମାନେ ହତ୍ୟା ମାମଲାକୁ ଏକଦମ ଖଣ୍ଡନ କରିଛନ୍ତି । ସେପ୍ଟେମ୍ବର ୨୯ରେ ଏମ୍ସ ଡାକ୍ତର ସିବିଆଇକୁ ତଦନ୍ତ ରିପୋର୍ଟ ହସ୍ତାନ୍ତର କରିଥିଲେ । ତେବେ ଏବେ ସିବିଆଇର ଆନୁଷ୍ଠାନିକ ବୟାନକୁ ଅପେକ୍ଷା କରାଯାଇଛି । ସୂଚନାଯୋଗ୍ୟ ସୁଶାନ୍ତଙ୍କ ମୃତ୍ୟୁ ମାମଲାକୁ ନେଇ ପରିବାର ସମେତ ଅନେକ ଲୋକ ସିବିଆଇ ତଦନ୍ତ ଦାବି କରିଥିଲେ । ଜୁନ୍ ୧୪ରେ ସୁଶାନ୍ତଙ୍କ ବାନ୍ଦ୍ରା ସ୍ଥିତ ବାସଭବନରୁ ତାଙ୍କ ମୃତ ଦେହ ଉଦ୍ଧାର କରାଯାଇ ଥିଲା । ଏହା ପରେ ସୁଶାନ୍ତଙ୍କ ପରିବାର ଲୋକଙ୍କ ସୁଶାନ୍ତଙ୍କ ପୂର୍ବତନ ପ୍ରେମିକା ରିୟା ଚକ୍ରବର୍ତୀଙ୍କ ଉପରେ ଆତ୍ମହତ୍ୟା କରିବାକୁ ଉସକାଇଥିବା ଅଭିଯୋଗ ଆଣି ଥିଲେ । ତେବେ ଏବେ ଡ୍ରଗ୍ସ ମାମଲାରେ ରିୟା ଜେଲରେ ଅଛନ୍ତି ।
