ସତ୍ୟଶିଖା( ପୁରୀ )୧୭ .୦୮. ୨୦୨୨: ପୁରୀ ଜିଲ୍ଲାର କୋଣାର୍କ, ନିମାପଡ଼ା ଓ ଗୋପ ବ୍ଲକରେ ବନ୍ୟାର ପ୍ରଭାବ ଦେଖିବାକୁ ମିଳିଛି। ଗୋପ ବ୍ଲକର ଗଣେଶ୍ୱର ପଞ୍ଚାୟତ ଖଣ୍ଡିଆକୁଦରେ କୁଶଭଦ୍ରା ନଦୀରେ ୨୫ ଫୁଟ୍ ଲମ୍ବର ଘାଇ ସୃଷ୍ଟି ହୋଇଛି। ଫଳରେ ଗଣେଶ୍ୱରପୁର, ନାଗପୁର, ବେଦପୁର, ଅଣ୍ଢରା, ରାହାଁଗୋରଡ଼ା ଓ ଡଭାର ପଞ୍ଚାୟତର ଶତାଧିକ ଗାଁ ଜଳମଗ୍ନ ହୋଇଛି। ଗାଁରେ ବନ୍ୟା ପାଣି ପଶିଯିବାରୁ ଲୋକମାନେ ଆତଙ୍କିତ ଅବସ୍ଥାରେ ଅଛନ୍ତି।
ସେହିପରି ନିମାପଡ଼ାରେ ଧନୁଆ ନଦୀ କୂଳ ଲଙ୍ଘିଛି। ନଦୀ କୂଳ ଲଙ୍ଘିବାରୁ ନିମାପଡ଼ା-ଭୁବନେଶ୍ୱର ମୁଖ୍ୟ ରାସ୍ତା ଗରପଦାଠାରେ ୨ ଫୁଟର ପାଣି ଚାଲିଛି। ଫଳରେ ନିମାପଡ଼ା-ଭୁବନେଶ୍ୱର ମୁଖ୍ୟ ରାସ୍ତାରେ ଯାତାୟାତ ବନ୍ଦ ହୋଇଯାଇଛି। ସେହିପରି ବଳଙ୍ଗା-ନିମାପଡ଼ା ମୁଖ୍ୟ ରାସ୍ତାର ଧନୁଆଛକରେ ବନ୍ୟା ପାଣି ଚାଲୁଥିବାରୁ ଗମନାଗମନ ବନ୍ଦ ହୋଇଯାଇଛି। ଧନୁଆ ଛକ ରାସ୍ତା ଉପରେ ମଧ୍ୟ ୩ ଫୁଟ୍ ପାଣି ପାଇଁ ପ୍ରବାହିତ ହୋଇଛି।
ଧନୁଆ ନଦୀ କୂଳ ଲଙ୍ଘିଥିବାରୁ ନିମାପଡ଼ା ଓ ଗୋପ ବ୍ଲକର ୧୮ଟି ପଞ୍ଚାୟତ ପ୍ରଭାବିତ ହେବାର ଆଶଙ୍କା ଦେଖାଦେଇଛି। ନିମାପଡା ବ୍ଲକ ବଡ଼ମାଛପୁର ପଞ୍ଚାୟତର ଦକ୍ଷିଣ ମହଲା ସମେତ ୭ଟି ବସ୍ତି ଜଳମଗ୍ନ ହୋଇଛି। ସେହିପରି ହଜାର ହଜାର ହେକ୍ଟର ହେର ଚାଷଜମି ପାଣିରେ ବୁଡ଼ି ରହିଛି ।
