ଆଇଡି ମାର୍କେଟରେ ହେଲା ଚଢ଼ଉ : ଡଷ୍ଟବିନ୍ ଯାଞ୍ଚ ହେଲା, ପଲିଥିନ୍ ପାଇଁ ଜରିମାନା କଟା ହେଲା

ସତ୍ୟଶିଖା (ଭୁବନେଶ୍ୱର) ୨୯/୧୨/୨୦୨୦ : ପ୍ରତି ଦୋକାନ ଓ ବ୍ୟବସାୟିକ ପ୍ରତିଷ୍ଠାନରେ ଦୁଇଟି ଡଷ୍ଟବିନ୍ ରଖିବା ବାଧ୍ୟତାମୂଳକ କରାଯାଇଛି । ଏନେଇ ବିଏମ୍‌ସି ପକ୍ଷରୁ ଲଗାତର ତିନିଦିନ ପ୍ରଚାର କରିବା ପରେ ଆଜିଠାରୁ ଚଢ଼ଉ ଆରମ୍ଭ ହୋଇଛି । ବିଏମ୍‌ସିର ସେଣ୍ଟ୍ରାଲ ସ୍କ୍ବାଡ୍‌, ଦକ୍ଷିଣ-ପଶ୍ଚିମ ଜୋନ୍‌ ଉଚ୍ଛେଦକାରୀ ଟିମ୍, ମାର୍କେଟ୍ ସ୍କ୍ବାଡ୍‌ ଓ କମିସନରେଟ୍‌ ପୁଲିସ ପକ୍ଷରୁ ମଧ୍ୟାହ୍ନରେ ନୂଆପଲ୍ଲୀସ୍ଥିତ ଇନ୍ଦ୍ରଧନୁ ମାର୍କେଟରେ ଚଢ଼ଉ କରାଯାଇଥିଲା । ହେଲେ ସ୍କ୍ବାଡ୍‌ ନଜରରେ କେହି ଖିଲାପକାରୀ ପଡ଼ିନଥିଲେ । ସବୁ ଦୋକାନ ସମ୍ମୁଖରେ ଦୁଇଟି ଲେଖାଏଁ ଡଷ୍ଟବିନ୍ ଥିବାରୁ କାହାଠାରୁ ଜରିମାନା ଆଦାୟ ହୋଇପାରିନଥିଲା । ଏହାପରେ ସଦଳବଳ ସ୍କ୍ବାଡ୍‌ ଏକକ ବ୍ୟବହାର ଯୋଗ୍ୟ ପ୍ଲାଷ୍ଟିକ ଓ ପଲିଥିନ୍ ଯାଞ୍ଚ କରିଥିଲେ । ତିନିଟି ଦୋକାନରେ ଏହି ସାମଗ୍ରୀ ମିଳିବାରୁ ସମସ୍ତଙ୍କ ଠାରୁ ୨୫୦ଟଙ୍କା ଲେଖାଏଁ ଜରିମାନା ଆଦାୟ ହୋଇଥିଲା । ଡଷ୍ଟବିନ୍ ଯାଞ୍ଚ କରିବାକୁ ଯାଇଥିବା ସ୍କ୍ବାଡ୍‌ ପଲିଥିନ୍ ଓ ପ୍ଲାଷ୍ଟିକ୍ ଯାଞ୍ଚ କରି ମୋଟ୍‌ ୭୫୦ଟଙ୍କାର ଜରିମାନା ଧରି ଫେରିଥିଲେ ।ଉତ୍ତର ଜୋନ୍‌ରୁ ୪୧ ହଜାର ଜରିମାନା ଆଦାୟ
ଭୁବନେଶ୍ୱର : ବିଏମ୍‌ସିର ଉତ୍ତର ଜୋନ୍‌ ପକ୍ଷରୁ ଆଜି ବିଭିନ୍ନ ଦୋକାନ ଓ ବ୍ୟବସାୟିକ ପ୍ରତିଷ୍ଠାନରେ ଡଷ୍ଟବିନ୍ ଯାଞ୍ଚ ହୋଇଥିଲା । ଯେଉଁମାନେ ଦୁଇଟି ଲେଖାଏଁ ଡଷ୍ଟବିନ୍ ରଖିନଥି‌େଲ ସେମାନଙ୍କ ଠାରୁ ଜରିମାନା ଆଦାୟ ହୋଇଥିଲା । ୫୨୦ଜଣଙ୍କ ଠାରୁ ୪୧ହଜାର ଟଙ୍କା ଜରିମାନା ଆଦାୟ ହୋଇଥିବା ବିଏମ୍‌ସି ପକ୍ଷରୁ କୁହାଯାଇଛି ।