ସତ୍ୟଶିଖା(ଭୁବନେଶ୍ୱର) ୨୨.୦୭.୨୦୨୧: ପାରଳାଖେମୁଣ୍ଡି ଏସିଏଫଓ ସୌମ୍ୟରଞ୍ଜନ ମହାପାତ୍ରଙ୍କ ମୃତୁ୍ୟ ଏବେ ରହସ୍ୟଘେରରେ ରହିଛି । ମୃତୁ୍ୟ ପଛର ପ୍ରକୃତ କାରଣ ଖୋଜିବାକୁ ପୁଲିସ ତଦନ୍ତକୁ ଜୋରଦାର କରିଛି । ତେବେ ଏହା ଭିତରେ ଏକ ବଡ଼ ଖବର ସାମନାକୁ ଆସିଛି । ତାହା ହେଲା ମୃତୁ୍ୟର ପ୍ରକୃତ କାରଣ ପାଇଁ ପୁଲିସ ଓ କ୍ରାଇମବ୍ରାଞ୍ଚ ସୌମ୍ୟଙ୍କ ସରକାରୀ ବାସଭବନ ଯାଞ୍ଚ କରୁଥିବାବେଳେ ଘର ଭିତରେ ପୋଡ଼ା ଦାଗ ରହିଥିବା ଜଣାଯାଇଛି । ଏନେଇ ସୂଚନା ଦେଇଛନ୍ତି କ୍ରାଇମବ୍ରାଞ୍ଚ ଡିଏସପି ।
ଅନ୍ୟପକ୍ଷରେ ଆଉ କିଛି ସମୟ ପରେ ଡିଏଫଓ ସଂଗ୍ରାମ ବେହେରାଙ୍କୁ ପଚରାଉଚରା କରାଯିବ । ପଚରାଉଚରା କରାଯିବା ନେଇ ପାରଳାଖେମୁଣ୍ଡି ପୁଲିସ ପକ୍ଷରୁ ସୂଚନା ମିଳିଛି । ଏତଲାରେ ନାଁ ଥିବାରୁ ଡିଏଫଓଙ୍କୁ ପୁଲିସ ପଚରାଉଚରା କରିବ । ବର୍ତ୍ତମାନ ସୌମ୍ୟଙ୍କ ସରକାରୀ ବାସଭବନରେ ଯାଞ୍ଚ ଚାଲିଛି । ପୁଲିସ ଓ କ୍ରାଇମବ୍ରାଞ୍ଚ ସୌମ୍ୟଙ୍କ ସରକାରୀ ବାସଭବନ ଯାଞ୍ଚ କରୁଛି । ମୃତ ଏସିଏଫ ସୌମ୍ୟରଞ୍ଜନଙ୍କ ସରକାରୀ ଘରେ କ୍ରାଇମବ୍ରାଞ୍ଚ ଛାନଭିନ କରୁଛି । ଘରର ବିଭିନ୍ନ ସ୍ଥାନରୁ କ୍ରାଇମବ୍ରାଞ୍ଚ ସୁରାକ ଖୋଜୁଛି । ଏଥିସହ ଘରର ଭିଡିଓଗ୍ରାଫି ମଧ୍ୟ କରାଯାଉଥିବା ଜଣାଯାଇଛି ।
ପ୍ରକାଶ ଯେ, ଏସିଏଫ ସୌମ୍ୟରଞ୍ଜନ ମହାପାତ୍ରଙ୍କ ମୃତୁ୍ୟ ରହସ୍ୟ ବଢ଼ିଚାଲିଛି । ହେଲେ ଆଶ୍ଚର୍ଯ୍ୟର କଥା ହେଲା, ଏଯାଏ ଗଜପତି ବନଖଣ୍ଡ ଅଧିକାରୀ (ଡିଏଫଓ)ଙ୍କୁ ତଦନ୍ତ ପରିସରକୁ ଅଣାଯାଇନଥିବାରୁ ଅନେକ ପ୍ରଶ୍ନବାଚୀ ସୃଷ୍ଟି କରିଛି । ମୃତକ ସୌମ୍ୟରଞ୍ଜନଙ୍କ ପରିବାର ବର୍ଗଙ୍କ ଏତଲା କ୍ରମେ ବନଖଣ୍ଡ ଅଧିକାରୀ ସଂଗ୍ରାମ କେଶରୀ ବେହେରା, ରୋଷେୟା ମନ୍ମଥ କୁମ୍ଭ ଓ ପତ୍ନୀ ବିଦ୍ୟା ଭାରତୀଙ୍କ ନାମରେ ହତ୍ୟା (ଆଇପିସିର ଦଫା ୩୦୨) ଓ ଅପରାଧିକ ଷଡଯନ୍ତ୍ର (ଦଫା ୧୨୦ (ବି) ମାମଲା ରୁଜୁ ହୋଇଥିଲା । ଏହା ମଧ୍ୟରେ ତଦନ୍ତକୁ ତ୍ୱରାନ୍ୱିତ କରାଯିବା ସହ ରୋଷେୟା ଓ ବିଦ୍ୟାଭାରତୀୟଙ୍କୁ ପ୍ରାଥମିକ ପର୍ଯ୍ୟାୟରେ ଜେରା ସରିଛି । କିନ୍ତୁ ଡିଏଫଓଙ୍କୁ ଏଯାଏ ପୁଲିସ ଆନୁଷ୍ଠାନିକ ଜେରା କରି ନାହିଁ ।
