ଭାରତ ମହାସାଗରରେ ବଢ଼ୁଛି ଚୀନ ଜାହାଜ ସଂଖ୍ୟା

ସତ୍ୟଶିଖା (ନୂଆଦିଲ୍ଲୀ) ୦୨/୧୨/୨୦୨୦ : ଭାରତ ମହାସାଗରରେ ଚୀନ ଗୁଇନ୍ଦା ଜାହାଜ ଓ ଯୁଦ୍ଧ ଜାହାଜର ସଂଖ୍ୟା କ୍ରମଶଃ ବଢ଼ିଚାଲିଛି । ଏଥିସହିତ ମାଛଧରିବା ଆଳରେ ମଧ୍ୟ ବହୁ ସଂଖ୍ୟକ ଜାହାଜ ଭାରତ ମହାସାଗରରେ ବିଚରଣ କରୁଥିବା ଲକ୍ଷ୍ୟ କରାଯାଉଛି । ଏଗୁଡ଼ିକ ପାକିସ୍ତାନକୁ ଯା’ଆସ କରୁଛନ୍ତି । ଗବେଷଣା ନାମରେ ମଧ୍ୟ କେତେକ ଜାହାଜ ଏହି ଜଳରାଶିରେ ନିୟମିତ ବିଚରଣ କରୁଥିବା ଦେଖିବାକୁ ମିଳୁଛି । ସମ୍ପ୍ରତି ଏଭଳି ତିନିଟି ଜାହାଜ ବିଚରଣ କରୁଥିବା ଜଣାପଡ଼ିଛି ।ପାକିସ୍ତାନକୁ ପ୍ରତି ବର୍ଷ ଶହେରୁ ଅଧିକ ଜାହାଜ ଭାରତ ମହାସାଗର ଦେଇ ଯାତ୍ରା କରୁଥିବାବେଳେ ଏହି ସଂଖ୍ୟା ଏବେ ୩୦୦ରୁ ୪୫୦ରେ ପହଞ୍ଚିଥିବା ଲକ୍ଷ୍ୟ କରାଯାଉଛି । ଏଗୁଡ଼ିକ ସମ୍ପୂର୍ଣ୍ଣ ବେଆଇନ ଭାବେ ଚଳାଚଳ କରୁଥିବାବେଳେ ବିଭିନ୍ନ ବେଆଇନ କାର୍ଯ୍ୟକଳାପରେ ଲିପ୍ତ ରହୁଥିବା ସୂଚନା ମିଳିଛି । ଗତ ଚାରି ବର୍ଷ ମଧ୍ୟରେ ଏଭଳି ଜାହାଜ ସଂଖ୍ୟା ବୃଦ୍ଧି ପାଇଥିବା ପ୍ରକାଶ । ଆରବସାଗରରେ ମାଛଧରା ବନ୍ଦ ହେବା ପରେ ଏଗୁଡ଼ିକ ସେପ୍ଟେମ୍ବର ଓ ଅକ୍ଟୋବରରେ ଭାରତ ମହାସାଗରକୁ ଚାଲିଆସୁଛନ୍ତି । ଚୀନ ଓ ପାକିସ୍ତାନ ମଧ୍ୟରେ ଚଳାଚଳ କରୁଥିବା ସଂଖ୍ୟାଧିକ ଜାହାଜ ହିଁ ଚିନ୍ତାର କାରଣ ହୋଇଛି ।