ସତ୍ୟଶିଖା(ଭୁବନେଶ୍ୱର) ୧୨.୦୭.୨୦୨୧: ଭୁବନେଶ୍ୱର: ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇଥିଲେ ମଧ୍ୟ ଓଡ଼ିଶାରେ ବିଶେଷ ବର୍ଷା ହେବନି । ବର୍ତମାନ ସମୟରେ ରାଜ୍ୟରେ ମୌସୁମୀ ସକ୍ରିୟ ହେବା ପରି ମନେ ହେଉନାହିଁ । ଏଥିପାଇଁ ଆହୁରି ଦୁଇ ସପ୍ତାହ ଅପେକ୍ଷା କରିବାକୁ ପଡ଼ିବ। ଅର୍ଥାତ୍ ଜୁଲାଇ ୨୨ ପରେ ବର୍ଷା ପରିମାଣ ବଢ଼ିବ ବୋଲି ଆକଳନ କରାଯାଇଛି । ରାଜ୍ୟ ସରକାରଙ୍କ ତଥ୍ୟ ଅନୁଯାୟୀ ଜୁଲାଇ ମାସରେ ଆଜି ସୁଦ୍ଧା ସ୍ବାଭାବିକ ଭାବେ ୧୨୪ ମିମି ବର୍ଷା ହେବା କଥା। ମାତ୍ର ଏବେ ସୁଦ୍ଧା ୭୩ ମିମି ହୋଇଛି, ଯାହାକି ୪୧.୨% ନିଅଣ୍ଟିଆ । ଜୁନ୍ ପହିଲାରୁ ଜୁଲାଇ ୧୧ ମଧ୍ୟରେ ୨୫୩ ମିମି ବର୍ଷା ହୋଇଛି, ଯାହାକି ସ୍ବାଭାବିକଠାରୁ ୨୪.୩% କମ୍ । ୧୯ଟି ଜିଲ୍ଲାରେ ନିଅଣ୍ଟିଆ ବର୍ଷା ହୋଇଛି । ଭଦ୍ରକ ଜିଲ୍ଲାର ସ୍ଥିତି ସବୁଠାରୁ ସଙ୍ଗିନ ରହିଛି। ସେଠାରେ ଜୁଲାଇ ମାସରେ ମାତ୍ର ୧୬ ମିମି ବର୍ଷା ସହ ଜୁନ୍ ପହିଲାରୁ ଏପର୍ୟ୍ୟନ୍ତ ସମୁଦାୟ ୧୧୯ ମିମି ବର୍ଷା ହୋଇଛି। ଯାହାକି ୬୨.୧% ନିଅଣ୍ଟିଆ। ଗଜପତି ଓ କେନ୍ଦୁଝରରେ ଯଥାକ୍ରମେ ୪୦.୮% ଓ ୪୧.୮% କମ୍ ବର୍ଷା ହୋଇଛି । ଏହାବ୍ୟତୀତ ଅନୁଗୁଳ, ବାଲେଶ୍ବର, କନ୍ଧମାଳ, ମୟୂରଭଞ୍ଜ, ଢେଙ୍କାନାଳ, ଗଞ୍ଜାମ, ଯାଜପୁର, ଝାରସୁଗୁଡ଼ା, କଳାହାଣ୍ଡି, ପୁରୀ, ରାୟଗଡ଼ା, ସମ୍ବଲପୁର ଓ ସୁନ୍ଦରଗଡ଼ ଜିଲ୍ଲାରେ ୧୯ରୁ ୩୯% ପର୍ୟ୍ୟନ୍ତ କମ୍ ବର୍ଷା ହୋଇଛି ।
ଜୁଲାଇ ୨୦ ବେଳକୁ ପଶ୍ଚିମା ପବନ ପରିବର୍ତେ ରାଜ୍ୟକୁ ପୂର୍ବା ପବନ ସହ ଜୁଲାଇ ତୃତୀୟ ସପ୍ତାହରେ ଉତ୍ତର ବଙ୍ଗୋପସାଗରରେ ଏକ ଲଘୁଚାପ ବଳୟ ସୃଷ୍ଟି ପାଇଁ ପରିସ୍ଥିତି ଅନୁକୂଳ ରହିବ । ଫଳରେ ରାଜ୍ୟରେ ବର୍ଷା ହେବାର ସମ୍ଭାବନା ଅଧିକ ରହିଛି। ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ଅନୁଯାୟୀ ୧୫ ତାରିଖ ପର୍ୟ୍ୟନ୍ତ ଦକ୍ଷିଣ ଓଡ଼ିଶାର ଅଧିକାଂଶ ଅଞ୍ଚଳ ଓ ଉତ୍ତର ଓଡ଼ିଶାର ଗୋଟିଏ ଦୁଇଟି ସ୍ଥାନରେ ବର୍ଷା ହୋଇପାରେ । ଏହାପରେ ପାଗରେ ସାମାନ୍ୟ ପରିବର୍ତନ ହେବ।
