ସତ୍ୟଶିଖା (ଭୁବନେଶ୍ୱର) ୦୬/୦୨/୨୦୨୧ : ପାଖେଇ ଆସିଲାଣି ପ୍ରେମ ଋତୁ । ୭ରୁ ଆରମ୍ଭ ହେବାକୁ ଯାଉଛି ‘ପ୍ରେମ ସପ୍ତାହ’ (ଭାଲେନ୍ଣ୍ଟାଇନ୍ ୱିକ୍) । ଗୋଲାପ ଦିଆନିଆରୁ ପଡ଼ିବ ପ୍ରେମ ସପ୍ତାହର ମୂଳଦୁଆ । ଭାଲେନ୍ଣ୍ଟାଇନ୍ ଡେ’ରେ ପଡ଼ିବ ପ୍ରେମ ସପ୍ତାହର ଯବନିକା । ଏହି ସପ୍ତାହ ସାରା ବେଶ୍ ଜମିବ ଫୁଲ ଓ ଫୁଲଗୁଚ୍ଛ ଦିଆନିଆ । ତେଣୁ ରାଜଧାନୀରେ ସଜେଇ ହେଲାଣି ଫୁଲ ବଜାର । କରୋନା କଟକଣା ଓ ଡିସେମ୍ବର ୩୧ ତାରିଖ ରାତିର ନାଇଟ୍ କର୍ଫ୍ୟୁ ଯୋଗୁଁ ଚଳିତ ବର୍ଷ ନୂଆବର୍ଷରେ ଫୁଲ ବେପାର ଭଲ ଜମିନଥିଲା । ଏବେ ସେ କଟକଣା ନାହିଁ। ତେଣୁ ପ୍ରେମ ସପ୍ତାହକୁ ଭରସା କରିଛି ଫୁଲ ବଜାର ।
ଆଉ ଗୋଟିଏ ଦିନ ପରେ ଆରମ୍ଭ ହେଇଯିବ ପ୍ରେମ ସପ୍ତାହ । ପ୍ରେମ ସପ୍ତାହ ଭିତରେ ରହିଛି ଗୋଲାପ ଦିବସ । ନାଲି ଗୋଲାପ ପ୍ରେମ ନିବେଦନ ପାଇଁ, ହଳଦିଆ ଗୋଲାପ ବନ୍ଧୁତ୍ବର ସେତୁ ବାନ୍ଧିବା ପାଇଁ ଓ ଧଳା ଗୋଲାପ ଝଗଡ଼ାରେ ପୂର୍ଣ୍ଣଚ୍ଛେଦ ପକାଇବା ପାଇଁ ବ୍ୟବହାର କରାଯିବ । ପ୍ରେମୀଯୁଗଳ ଗୋଲାପ ଦେଇ ପରସ୍ପରକୁ ଶୁଭେଚ୍ଛା ଜଣାଇବେ । ନାଲି, ହଳଦିଆ, ଗୋଲାପି, ଧଳା ଆଦି ଭଳିକି ଭଳି ଗୋଲାପର ପସରା ସହରର ଗଳିକନ୍ଦିରେ ଖୋଲିଯିବ । ବେପାରୀମାନେ ଆଗରୁ ବଇନା ଦେଇସାରିଛନ୍ତି । ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ବେଙ୍ଗାଲୁରୁ ନାଲି ଗୋଲାପର ଚାହିଦା ଅଧିକ ଥିବା ଜଣାପଡ଼ିଛି । ବିଶେଷକରି ଗ୍ରାହକମାନେ ବେଙ୍ଗାଲୁରୁ ନାଲି ଗୋଲାପ ପାଇଁ ଆଗୁଆ ବରାଦ କରିସାରିଲେଣି ।
