ସତ୍ୟଶିଖା : ୧୮/୦୩/୨୦୨୫: ପଞ୍ଚଭୂତରେ ବିଲୀନ ପୂର୍ବତନ କେନ୍ଦ୍ରମନ୍ତ୍ରୀ ସ୍ବର୍ଗତ ଡାକ୍ତର ଦେବେନ୍ଦ୍ର ପ୍ରଧାନ। ପୁରୀ ସ୍ୱର୍ଗଦ୍ୱାରରେ ସଂପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦାର ସହ ଶେଷକୃତ୍ୟ ସମ୍ପନ୍ନ। ମୁଖାଗ୍ନି ଦେଲେ ପୁଅ ତଥା କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଅନ୍ତିମ ଦର୍ଶନ କରିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଯୋଗଗୁରୁ ରାମଦେବ ବାବା, ପୁରୀ ସଂସଦ ସମ୍ବିତ ପାତ୍ର, ବହୁ ବରିଷ୍ଠ ନେତା। ଅନ୍ତିମ ସଂସ୍କାର ସମୟରେ ଦେବେନ୍ଦ୍ର ପ୍ରଧାନ ଅମର ରହେ ନାରାରେ କମ୍ପିଥିଲା ସ୍ୱର୍ଗଦ୍ୱାର।
ସୋମବାର ସଂଧ୍ୟାରେ ଭୁବନେଶ୍ବର ବିମାନବନ୍ଦରରେ ପହଞ୍ଚିବା ପରେ ଦେବେନ୍ଦ୍ରଙ୍କୁ ଗାର୍ଡ ଅଫ ଅନର ଦିଆଯାଇଥିଲା । ବିମାନବନ୍ଦରରେ ବିଭିନ୍ନ ଦଳର ରାଜନେତା ପହଞ୍ଚିଥିଲେ । ଏହାପରେ ମରଶରୀରକୁ ବିଜେପି ରାଜ୍ୟ କାର୍ଯ୍ୟାଳୟକୁ ନିଆଯାଇଥିଲା । ପରେ ଦେବେନ୍ଦ୍ରଙ୍କ ପାର୍ଥିବ ଶରୀରକୁ ତାଙ୍କ ଭୁବନେଶ୍ବର ସ୍ଥିତ ବାସଭବନରେ ରଖାଯାଇଥିଲା ।
ସୂଚନା ଥାଉକି, ସୋମବାର ୮୪ ବର୍ଷ ବୟସରେ ନୂଆଦିଲ୍ଲୀରେ ଦେବେନ୍ଦ୍ର ପ୍ରଧାନଙ୍କ ପରଲୋକ ହୋଇଥିଲା । କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବାପା ହେଉଛନ୍ତି ଡାକ୍ତର ଦେବେନ୍ଦ୍ର ପ୍ରଧାନ। ତତ୍କାଳୀନ ଅଟଳ ବିହାରୀ ବାଜପେୟୀଙ୍କ ସରକାରରେ କେନ୍ଦ୍ରମନ୍ତ୍ରୀ ରହିଥିଲେ ଦେବେନ୍ଦ୍ର ପ୍ରଧାନ।
ରାଜ୍ୟ ବିଜେପିର ବରିଷ୍ଠ ତଥା ଅନ୍ୟତମ ପୁରୁଖା ସଦସ୍ୟ ଡାକ୍ତର ଦେବେନ୍ଦ୍ର ପ୍ରଧାନ ୧୯୪୧ ମସିହା ଜୁଲାଇ ୧୬ ତାରିଖରେ ଢେଙ୍କାନାଳ ଜିଲ୍ଲାରେ ଜନ୍ମଗ୍ରହଣ କରିଥିଲେ । ସେ ବୃତ୍ତିରେ ଜଣେ ଡାକ୍ତର ଥିଲେ । ୧୯୬୬ ମସିହାରେ କଟକ ଏସ୍ସିବି ମେଡିକାଲ କଲେଜ ଓ ହସ୍ପିଟାଲରୁ ଏମବିବିଏସ୍ ପାସ୍ କରିଥିଲେ । ପରେ ୧୯୭୩ରେ ଚାକିରିରୁ ସେ ସ୍ୱେଚ୍ଛାକୃତ ଅବସର ନେଇଥିଲେ ଏବଂ ସକ୍ରିୟ ରାଜନୀତିରେ ଯୋଗ ଦେଇଥିଲେ । ୧୯୮୦ରୁ ୧୯୮୩ ତାଳଚେର ମଣ୍ଡଳ ସଭାପତି ଭାବେ ଆରମ୍ଭ ହୁଏ ଦେବେନ୍ଦ୍ରଙ୍କ ରାଜନୈତିକ ଜୀବନ । ୧୯୮୩ରୁ ୧୯୮୫ ପର୍ୟ୍ୟନ୍ତ ଅବିଭକ୍ତ ଢେଙ୍କାନାଳ ଜିଲ୍ଲାର ଜିଲ୍ଲା ସଭାପତି ଭାବେ ତାଙ୍କୁ ମିଳେ ଦାୟିତ୍ବ । ଜିଲ୍ଲାରେ କଂଗ୍ରେସକୁ ପୋଛି ଦେଇ ଭାରତୀୟ ଜନତା ପାର୍ଟିର ଗେରୁଆ ବାନା ଉଡ଼ାଇବାକୁ ସଂକଳ୍ପ ନିଅନ୍ତି ସେ ।
୧୯୮୪ରେ ଦେଓଗଡ଼ ଆସନରୁ ସାଂସଦ ପ୍ରାର୍ଥୀ ଭାବେ ୩୦ ହଜାର ଭୋଟ୍ ପଡ଼େ ଦେବେନ୍ଦ୍ରଙ୍କ ଖାତାରେ । କିନ୍ତୁ ବରିଷ୍ଠ କଂଗ୍ରେସ ନେତା ଶ୍ରୀବଲ୍ଲଭ ପାଣିଗ୍ରାହୀଙ୍କୁ ହରାଇବା ସେବେ ଏତେ ସହଜ ନଥିଲା । ତଥାପି ସାହସ ଜୁଟାଇ ଦେବେନ୍ଦ୍ର ୧୯୯୧ ଓ ୧୯୯୬ରେ ଦେଓଗଡ଼ ଆସନରୁ ପ୍ରାର୍ଥୀ ହୋଇ ଶ୍ରୀବଲ୍ଲଭ ପାଣିଗ୍ରାହୀଙ୍କୁ ଦେଇଥିଲେ କଡ଼ା ଟକ୍କର । ୧୯୮୪ରେ ମାତ୍ର ୩୦ ହଜାର ଭୋଟ୍ ପାଇଥିବା ଦେବେନ୍ଦ୍ର, ୧୯୯୧ରେ ୬୦ ହଜାର ଓ ୧୯୯୬ରେ ପାଇଥିଲେ ୧ ଲକ୍ଷ ୭୫ ହଜାର ଭୋଟ୍ ।
ଏହାରି ଭିତରେ ୧୯୮୫ରୁ ୧୯୮୮ ତାଙ୍କୁ ପୁଣିଥରେ ଅବିଭକ୍ତ ଢେଙ୍କାନାଳ ଜିଲ୍ଲା ସଭାପତି ଭାବେ ଦାୟିତ୍ବ ମିଳେ । କିନ୍ତୁ ୧୯୮୮ ଫେବ୍ରୁଆରିରେ ଦେବେନ୍ଦ୍ରଙ୍କ ଦକ୍ଷତା, ରାଜନୈତିକ ବିଚକ୍ଷଣତା ଓ ସୂକ୍ଷ୍ମ ଗୋଟି ଚାଳନାରେ କେନ୍ଦ୍ରୀୟ ନେତୃତ୍ବ ତାଙ୍କୁ ବିଜେପି ରାଜ୍ୟ ସଭାପତି ଭାବେ ନିଯୁକ୍ତ କରାନ୍ତି । ୧୯୯୦ରୁ ୧୯୯୩, ୧୯୯୫ରୁ ୧୯୯୭ ଯାଏଁ ଦୁଇ ଦୁଇ ଥର ରାଜ୍ୟ ସଭାପତି ଭାବେ ନିର୍ବାଚିତ ହୁଅନ୍ତି ଦେବେନ୍ଦ୍ର । ସେହିପରି ୧୯୯୩ରୁ ୧୯୯୫ ପର୍ଯ୍ୟନ୍ତ ସେ ଥିଲେ ରାଜ୍ୟ ବିଜେପି ସାଧାରଣ ସମ୍ପାଦକ ।
୧୯୯୮ ମସିହାରେ ଦେବେନ୍ଦ୍ର ପ୍ରଧାନଙ୍କ ରାଜନୈତିକ ଜୀବନରେ ଆସେ ଭିନ୍ନ ମୋଡ଼ । ବାରମ୍ବାର ନିର୍ବାଚନ ଲଢ଼ିଥିବା ଦେବେନ୍ଦ୍ରଙ୍କୁ ବିପୁଳ ଭୋଟ୍ରେ ଜିତାନ୍ତି ଦେବଗଡ଼ବାସୀ । ଦ୍ବାଦଶ ଲୋକସଭାକୁ ସେ ନିର୍ବାଚିତ ହୁଅନ୍ତି ଓ କେନ୍ଦ୍ରର ବାଜପେୟୀ ସରକାରରେ ତାଙ୍କୁ ମିଳେ ସଡ଼କ ପରିବହନ ମନ୍ତ୍ରୀପଦ । ପୁଣିଥରେ ୧୯୯୯ରେ ସେହି ଦେଓଗଡ଼ ଆସନରୁ ଦ୍ବିତୀୟ ଥର ସାଂସଦ ଭାବେ ନିର୍ବାଚିତ ହୋଇଥିଲେ ଦେବେନ୍ଦ୍ର ।
କେନ୍ଦ୍ର ସରକାରରେ ତାଙ୍କୁ ପୁଣିଥରେ ମିଳିଲା ସଡ଼କ ପରିବହନ ମନ୍ତ୍ରୀପଦ । ଅତିରିକ୍ତ ଭାବେ ତାଙ୍କୁ କୃଷି ବିଭାଗର ମନ୍ତ୍ରୀ ପଦ ବି ମିଳିଥିଲା । ମନ୍ତ୍ରୀ ଥିବା ସମୟରେ ଦେଶର ବିଭିନ୍ନ ଅପହଞ୍ଚ ଇଲାକାରେ ପହଞ୍ଚିଥିଲା ସଡ଼କପଥ । ଏପରିକି ତାଙ୍କ ସମୟରେ ମୋଟରଯାନ ଅଧିନିୟମ ବିଲ୍, ୨୦୦୦ ଗୃହରେ ଆଗତ ହୋଇଥିଲା । ୨୦୦୧ରୁ ୨୦୦୨ ପର୍ଯ୍ୟନ୍ତ ସେ ଥିଲେ ବିଜେପି ରାଷ୍ଟ୍ରୀୟ ଉପସଭାପତି । ୨୦୦୪ରେ ଶେଷ ଥର ପାଇଁ ପାଳଲହଡ଼ା ଆସନରୁ ବିଧାୟକ ପ୍ରାର୍ଥୀ ହୋଇ ସେ ପରାଜିତ ହୋଇଥିଲେ। ପରବର୍ତ୍ତୀ ସମୟରେ ସେ ପ୍ରତ୍ୟକ୍ଷ ରାଜନୀତି ଭାବେ ବିଜେପିର ରାଜ୍ୟ କାର୍ଯ୍ୟକାରିଣୀ ଓ ଆଜୀବନ ନିମନ୍ତ୍ରିତ ସଦସ୍ୟ ହୋଇ ରହିଥିଲେ । ତାଙ୍କ ପରଲୋକ ରାଜ୍ୟ ରାଜନୀତିରେ ବିରାଟ ଶୂନ୍ୟସ୍ଥାନ ସୃଷ୍ଟି କରିଛି । ଜଣେ ନିର୍ଭୀକ, ସ୍ପଷ୍ଟବାଦୀ ଜନନେତା ଭାବେ ଦିବଙ୍ଗତ ଦେବେନ୍ଦ୍ର ପ୍ରଧାନ ଚିରକାଳ ପାଇଁ ମନେ ରହିବେ ।
