ସତ୍ୟଶିଖା (ଭୁବନେଶ୍ୱର) ୦୬/୦୨/୨୦୨୧ : ଚଳିତ ବର୍ଷ ଖଣ୍ଡଗିରି ମହାକୁମ୍ଭ ମେଳା କେବଳ ବିଧିରେ ହିଁ ସୀମିତ ରହିବ । ପ୍ରଭୁ ଅନନ୍ତ କେଶରୀଙ୍କ ରାଣୀ ହଂସପୁର ଯାତ୍ରା ଯଥାରୀତି ସମ୍ପନ୍ନ ହେବ । ସେହିଭଳି ବାରଭୁଜା ମନ୍ଦିର ପ୍ରାଙ୍ଗଣରେ ପୂର୍ବଭଳି ବିଶ୍ବଶାନ୍ତି ମହାଯଜ୍ଞ ଓ ରାମଚରିତ ମାନସ କାର୍ଯ୍ୟକ୍ରମ ଅନୁଷ୍ଠିତ ହେବ । ପାହାଡ଼ରେ ସାଧୁସନ୍ଥମାନଙ୍କ ସମାବେଶ ଉପରେ ମଧ୍ୟ କଟକଣା ଲାଗୁ ହେବ ନାହିଁ । ସେମାନେ ପରମ୍ପରା ଅନୁସାରେ ଗିରି ଗହ୍ବରରେ ନିଜ ଜପତପ ଓ ଭଜନ କୀର୍ତ୍ତନ କରିବେ । କିନ୍ତୁ ମେଳାରେ ହାଟ ବଜାର ଓ ଅପେରା ପଡ଼ିବା ନିଷ୍ପତ୍ତି ଚୁଡ଼ାନ୍ତ ହୋଇପାରିନାହିଁ । କୋଭିଡ୍ କଟକଣାକୁ ମାନି ହାଟ ବଜାର ପଡ଼ୁ ଓ ଅପେରା ପାଇଁ ଅନୁମତି ମିଳୁ ବୋଲି ବିଭିନ୍ନ କମିଟି ପକ୍ଷରୁ ଅନୁରୋଧ କରାଯାଇଥିଲେ ହେଁ ବିଏମ୍ସି କିଛି ଚୁଡ଼ାନ୍ତ ନିଷ୍ପତ୍ତି ନେଇନାହିଁ । ଆସନ୍ତାକାଲି ଯାତ୍ରା କମିଟିମାନଙ୍କ ସହ ପୁଣି ଥରେ ବିଶେଷ ଆଲୋଚନା ପରେ ସବୁ କିଛି ସ୍ପଷ୍ଟ ହେବ ବୋଲି ଜଣାପଡ଼ିଛି ।
କରୋନା କଟକଣାରେ ବହୁ ପରିମାଣର କୋହଳ ହେବା ପରେ ପ୍ରସିଦ୍ଧ ଖଣ୍ଡଗିରି ମେଳା ଆୟୋଜନ ପାଇଁ ଅନୁମତି ମିଳୁ ବୋଲି ବିଭିନ୍ନ ଯାତ୍ରା କମିଟି ପକ୍ଷରୁ ବିଏମ୍ସିକୁ ଅନୁରୋଧ କରାଯାଇଛି । ଏମିତିକି ଅଧା ଦର୍ଶକରେ ବି ଯାତ୍ରା କରିବାକୁ ସେମାନେ ରାଜି ବୋଲି ଅନୁରୋଧ ପତ୍ରରେ ଦର୍ଶାଇଛନ୍ତି । କିନ୍ତୁ ଏହାକୁ ନେଇ ଅଡ଼ୁଆ ପରିସ୍ଥିତି ସୃଷ୍ଟି ହୋଇଛି । ରାଜଧାନୀରେ ଅନ୍ୟ ମେଳା ଅନୁଷ୍ଠିତ ହୋଇଥିଲେ ହେଁ ଖଣ୍ଡଗିରି ମେଳା ଭିନ୍ନ । ଏଠାରେ ଦର୍ଶକମାନଙ୍କୁ କଟକଣାରେ ବାନ୍ଧି ରଖିବା କଷ୍ଟକର ବ୍ୟାପାର । ସେହିଭଳି ଅପେରାରେ ଦର୍ଶକ ସଂଖ୍ୟାକୁ ନେଇ ଦ୍ବନ୍ଦ୍ବ ଉପୁଜିଛି । ବିବାହ ବ୍ରତ ଭଳି ସାମାଜିକ ଅନୁଷ୍ଠାନରେ ଅତି ବେଶିରେ ୫ ଶହ ଲୋକଙ୍କୁ ଏକାଠି ହେବାର ଅନୁମତି ଦିଆଯାଉଛି । ଏଣୁ ଗୋଟିଏ ପେଣ୍ଡାଲରେ ସର୍ବାଧିକ କେତେ ଦର୍ଶକଙ୍କୁ ବସିବାକୁ ଅନୁମତି ଦିଆଯାଇପାରେ, ତାହାକୁ ନେଇ ଅଡ଼ୁଆ ସ୍ଥିତି ସୃଷ୍ଟି ହୋଇଛି । ତେଣୁ କମିଟିମାନଙ୍କ ସହ ପୁଣି ଥରେ ଆଲୋଚନା କରିବାକୁ ଧାର୍ଯ୍ୟ ହୋଇଛି । ସେହିଭଳି ମେଳା ହାଟରେ କେତେ ଦୋକାନୀଙ୍କୁ ଅନୁମତି ଦିଆଯିବ, ତା ମଧ୍ୟ ଆସନ୍ତାକାଲି ସ୍ଥିର କରାଯିବ ।
