ଭାରତୀୟ ବାୟୁସେନା ଆହୁରି ଶକ୍ତିଶାଳୀ ହେବ

ସତ୍ୟଶିଖା (ନୂଆଦିଲ୍ଲୀ) ୦୬/୦୧/୨୦୨୧ : ନୂଆବର୍ଷର ଆରମ୍ଭରେ ଭାରତ ସାମରିକ କ୍ଷେତ୍ରରେ ଦୁଇଟି ଐତିହାସିକ ପଦକ୍ଷେପ ନେବାକୁ ଯାଉଛି । ପୂର୍ବରୁ ଯୋଜନା କରାଯାଇଥିବା ସାମରିକ ବିମାନ କ୍ରୟ ଚୁକ୍ତିକୁ ଭାରତ କିଛି ମାସ ଭିତରେ ପୂରଣ କରିବାକୁ ଯାଉଛି । ଏହାର ବଜେଟ୍ ପାଖାପାଖି ୫୦ ହଜାର କୋଟି ଟଙ୍କା ହେବ ବୋଲି ସ୍ଥିର କରାଯାଇଛି । ଏହି ଚୁକ୍ତି ଅନୁସାରେ ସ୍ୱଦେଶୀ ଜ୍ଞାନକୈଶଳରେ ନିର୍ମିତ ୮୩ଟି ତେଜସ୍ ଲଢ଼ୁଆ ବିମାନ ସହ ୫୬ଟି ମଧ୍ୟମ ଧରଣର ପରିବହନ ବିମାନ କିଣାଯିବ । ଏଥିପାଇଁ ଟାଟା-ଏୟାର ବସ୍ ଜଏଣ୍ଟ୍ ଭେଞ୍ଚର ସହ କିଛି ମାସ ମଧ୍ୟରେ ଚୁକ୍ତି କରାଯିବ ।  ୩୭ ହଜାର କୋଟି ଟଙ୍କାରେ ୮୩ଟି ତେଜସ୍ ମାର୍କ-୧ଏ ବିମାନ ଦେଶର ଅଗ୍ରଣୀ ସାମରିକ ବିମାନ ପ୍ରସ୍ତୁତକାରୀ ପବ୍ଲିକ୍ କମ୍ପାନୀ ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ କିଣାଯିବ । ଯାହାକି ପୂର୍ବରୁ କ୍ରୟ କରାଯାଇଥିବା ସ୍ୱଦେଶୀ ବିମାନ ମଧ୍ୟରେ ସବୁଠାରୁ ବଡ଼ ଚୁକ୍ତି । ଏହି ୮୩ଟି ଫାଇଟର୍ ଚୁକ୍ତି ହେବାର ୩ ବର୍ଷ ମଧ୍ୟରେ କମ୍ପାନୀ ପ୍ରତିରକ୍ଷା ବିଭାଗକୁ ହସ୍ତାନ୍ତର କରିବ ।ଟାଟା-ଏୟାରବସ୍ ପ୍ରୋଜେକ୍ଟରେ ମଧ୍ୟ ୫୬ଟି ଟ୍ୱିନ୍-ଟର୍ବୋପ୍ରପ୍ ସି-୨୯୫ ଏୟାରକ୍ରାଫ୍ଟ ପ୍ରସ୍ତୁତ କରାଯିବ । ଯାହାକି ଭାରତୀୟ ବୟୁସେନାରେ ଥିବା ପୂରୁଣା ଏଭ୍ରୋ-୭୪୮ର ସ୍ଥାନ ନେବ । ଏହି ଚୁକ୍ତି ଦ୍ୱାରା ପ୍ରଥମକରି କୌଣସି ଭାରତୀୟ ପ୍ରାଇଭେଟ୍ କମ୍ପାନୀ ପ୍ରତିରକ୍ଷା ସାମଗ୍ରୀ ଯୋଗାଇବା କ୍ଷେତ୍ରରେ ପାଦ ଥାପିଛି । ଚୁକ୍ତି କରିବାର ଦୁଇ ବର୍ଷ ଭିତରେ ଏୟାରବସ୍ ୧୬ଟି ଏୟାରକ୍ରାଫ୍ଟ ପ୍ରସ୍ତୁତ କରି ପ୍ରତିରକ୍ଷା ବିଭାଗକୁ ଦେବ ଏବଂ ବାକି ୪୦ଟି ଆଗମୀ ଆଠ ବର୍ଷ ମଧ୍ୟରେ ପ୍ରସ୍ତୁତ କରିବ । ଏହି ୫୬ଟି ଏୟାର କ୍ରାଫ୍ଟ ପାଇଁ ୧୧ ହଜାର ୯ ଶହ ୨୯ କୋଟି ଟଙ୍କା ଖର୍ଚ୍ଚ କରାଯିବ । ତେବେ ଏହି ଦୁଇ ପ୍ରୋଜେକ୍ଟ କ୍ୟାବିନେଟ୍ ସୁରକ୍ଷା ପରିଷଦକୁ ଶେଷ ମୋହର ପାଇଁ ପଠାଯାଇଛି । ପ୍ରଥମେ ତେଜସ୍ ଫାଇଟର୍ ପାଇଁ ସୁରକ୍ଷା ପରିଷଦ ଅନୁମତି ଦେବେ ଏବଂ ଏଥିପାଇଁ ଫେବୃଆରୀର ପ୍ରଥମ ସପ୍ତାହରେ ଚୁକ୍ତି କରାଯିବ ବୋଲି ମଙ୍ଗଳବାର ପ୍ରତିରକ୍ଷା ଅଧିକରୀଙ୍କ ପକ୍ଷରୁ ପ୍ରକାଶ କରାଯାଇଛି ।