ସତ୍ୟଶିଖା( ସାକ୍ଷୀଗୋପାଳ )୦୭.୦୫.୨୦୨୨ : ସାକ୍ଷୀଗୋପାଳସ୍ଥିତ ସାକ୍ଷୀଗୋପୀନାଥଙ୍କ ମନ୍ଦିର ଚତୁଃପାଶ୍ୱର୍ ପୁରୀ ଶ୍ରୀମନ୍ଦିର ପରି ଝଲସିବ । ସେଥିପାଇଁ ରାଜ୍ୟ ସରକାର ପ୍ରକ୍ରିୟା ଆରମ୍ଭ କରିଛନ୍ତି । ଏହି କାମ ଓବିସିସି ସଂସ୍ଥା ନେଇଥିବା ଜଣାପଡ଼ିଛି । ଖୁବ୍ଶୀଘ୍ର ମନ୍ଦିର ଚତୁଃପାଶ୍ୱର୍ରେ ଥିବା ଘର, ଦୋକାନ ଘରଗୁଡ଼ିକ ଉଚ୍ଛେଦ କରାଯିବ ବୋଲି ଯାତ୍ରୀନିବାସରେ ଅନୁଷ୍ଠିତ ବୈଠକରେ ବିଧାୟକ ଉମାକାନ୍ତ ସାମନ୍ତରାୟ ସୂଚନା ଦେଇଛନ୍ତି । ଆଲୋଚନାରେ ସାକ୍ଷୀଗୋପୀନାଥ ମନ୍ଦିର ସେବାୟତ ସଂଘର ସଭାପତି ଶ୍ରୀବତ୍ସ ମହାପାତ୍ର ଓ ସମ୍ପାଦକ ବିଜୟ କୁମାର ନନ୍ଦଙ୍କ ସହିତ ଅନ୍ୟ ସଦସ୍ୟ, ବିଭିନ୍ନ ଜନପ୍ରତିନିଧି, ସେବାୟତ ଓ ଜନସାଧାରଣ ଯୋଗଦେଇ ଏ ସମ୍ପର୍କରେ ମତାମତ ଦେଇଥିଲେ । ବିଶେଷକରି କିଛି ସେବାୟତ ଆପତ୍ତି ଉଠାଇଥିଲେ ଯେ ସେମାନେ କାହିଁ କେଉଁକାଳରୁ ମନ୍ଦିର ନିକଟରେ ରହିଆସିଛନ୍ତି ।
ସେମାନଙ୍କୁ ଉଚ୍ଛେଦ କଲେ ଏବେ ରହିବେ କେଉଁଠି? ତେଣୁ ଉଚ୍ଛେଦ ପୂର୍ବରୁ ଥଇଥାନ କରାଯାଉ । ସେହିପରି ସେବାୟତଙ୍କ ଶଶ୍ମାନ ଓ ରାଧାକୁଣ୍ଡ ଓଡ଼ିଆ ବିଶ୍ୱବିଦ୍ୟାଳୟ ଅଧୀନକୁ ଚାଲିଯାଇଛି । ତେଣୁ ସେଠାରେ ଥିବା ପୋଖରୀରେ କିପରି ଠାକୁରଙ୍କ ନୀତିକାନ୍ତି ସହ ଜନସାଧାରଣ ବ୍ୟବହାର କରିପାରିବେ ସେ ସମ୍ପର୍କରେ ଆଲୋଚନା କରାଯାଇଥିଲା । ଅନ୍ୟପକ୍ଷରେ ପଞ୍ଚସଖା ଖେଳପଡ଼ିଆ ସମ୍ପର୍କରେ ମଧ୍ୟ ଆଲେଚନା ହୋଇଥିଲା ।
ବୈଠକରେ ତହସିଲଦାର ଜୟନ୍ତ କୁମାର ଜୟସିଂ, ସତ୍ୟବାଦୀ ବ୍ଲକ୍ ଅଧ୍ୟକ୍ଷ ସୁନୀଲ କୁମାର ପଣ୍ଡା, ବିଡିଓ କ୍ଷୀରୋଦ କୁମାର ବେହେରା, ଥାନା ଆଇଆଇସି ବିଜୟ କେତନ ବେହେରା, ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ବସନ୍ତ କୁମାର ପ୍ରଧାନ ଏବଂ ବ୍ଲକ୍ ବିଜେଡି ସଭାପତି ପ୍ରମୋଦ ରାଉତରାୟ ଯୋଗ ଦେଇଥିଲେ । ଓବିସିସିର ନିର୍ବାହୀଯନ୍ତ୍ରୀ ସୁନ୍ଦରମାଧବ ପାଢ଼ୀ ଓ ସହକାରୀ ଯନ୍ତ୍ରୀ ଗିରିଜା ଶଙ୍କର ନାୟକ ଜମିର ନକ୍ସା ଓ ସେମାନଙ୍କର ପ୍ଲାନ୍ ଦେଖାଇଥିଲେ । ପଞ୍ଚସଖା ପଡ଼ିଆରେ ଥିବା ମୁକ୍ତାକାଶ ରଙ୍ଗମଞ୍ଚ ପଛକୁ ଘୁଞ୍ଚାଇବା ପାଇଁ ପ୍ରସ୍ତାବ ଗ୍ରହଣ କରାଯାଇଛି । ସେହିପରି ସେବାୟତମାନଙ୍କ ଶଶ୍ମାନ ଓ ଜୟପୁର ପଞ୍ଚାୟତରେ ହେବାକ଼ୁ ଥିବା ମାର୍କେଟ କମ୍ପେ୍ଲକ୍ସ ଆଦି ବିଧାୟକ, ବ୍ଲକ୍ ଅଧ୍ୟକ୍ଷ, ଅଧିକାରୀ ଓ ଜୟପୁର ସରପଞ୍ଚଙ୍କ ପ୍ରତିନିଧି ଦେବଦତ୍ତ ସାମନ୍ତରାୟ ବୁଲି ଦେଖିଥିଲେ ।
