ସତ୍ୟଶିଖା (ନୂଆଦିଲ୍ଲୀ) ୧୯/୧୧/୨୦୨୦ : କରୋନା ପାଇଁ ଦେଶର ଅର୍ଥବ୍ୟବସ୍ଥା ଗୁରୁତର ଭାବେ ପ୍ରଭାବିତ ହୋଇଛି । ଅନେକ ବ୍ୟକ୍ତି ରୋଜଗାର ହରାଇଛନ୍ତି । ଜୀବିକା ମଧ୍ୟ ହରାଇଛନ୍ତି । ଏହାମଧ୍ୟରେ କେନ୍ଦ୍ର ସରକାର ଲୋକମାନଙ୍କୁ ସାହାଯ୍ୟ କରିବା ପାଇଁ ସ୍ୱନିଧି ଯୋଜନା ଆରମ୍ଭ କରିଛନ୍ତି । କରୋନା ସଙ୍କଟ ମଧ୍ୟରେ ସ୍ୱନିଧୀ ଯୋଜନାର ଲାଭ ଲୋକମାନେ ଉଠାଉଛନ୍ତି ।
ଏହି ଯୋଜନା ଦୁଲାଇ ୨ ତାରିଖରୁ ଆରମ୍ଭ ହୋଇଥିଲା । ଏହି ଯୋଜନାର ଲାଭ ଉଠାଇବା ପାଇଁ ଏବେସୁଦ୍ଧା ୨୫ ଲକ୍ଷରୁ ଅଧିକ ବ୍ୟକ୍ତି ଆବେଦନ କରିଛନ୍ତି । ୧୨ ଲକ୍ଷ ଲୋକଙ୍କ ଆବେଦନ ଗ୍ରହଣ କରାଯାଇଛି । କେବଳ ଉତ୍ତର ପ୍ରଦେଶରେ ହିଁ ୬.୫ ଲକ୍ଷ ଆବେଦନ କରିଛନ୍ତି । ଏହାମଧ୍ୟରୁ ୩.୨୭ ଲକ୍ଷ ଲୋକଙ୍କ ଆବେଦନକୁ ମଞ୍ଜୁରୀ ମିଳିଛି । ୟୁପିରେ ଏହି ଯୋଜନାରେ ସରକାର ଷ୍ଟାମ୍ପ୍ ଶୁଳ୍କ ଛାଡ କରିଛନ୍ତି ।
ସୂଚନାନୁସାରେ, କରୋନା ସଙ୍କଟ ପାଇଁ ଅନେକ ଶିଳ୍ପପତି ଓ ଉଦ୍ୟୋଗୀ ପ୍ରଭାବିତ ହୋଇଛନ୍ତି । ଛୋଟ ଛୋଟ ବ୍ୟବସାୟୀ ଜୀବିକା ହରାଇଛନ୍ତି । ବହୁକଷ୍ଟରେ ଯେଉଁ ଉଠା ଦୋକାନୀ ଓ ଛୋଟ ବ୍ୟବସାୟୀମାନେ ସେମାନଙ୍କ ପରିବାର ଚଳାଉଥିଲେ ସେମାନେ ଅଧିକ କ୍ଷତିଗ୍ରସ୍ତ ହୋଇଛନ୍ତି । ସେମାନଙ୍କ କାରବାର ଆରମ୍ଭ ହୋଇପାରି ନାହିଁ । ଏପରି ବ୍ୟବସାୟୀଙ୍କୁ ପୁଣି ଅଣ୍ଟା ସଳଖି ଛିଡା ହେବା ପାଇଁ କେନ୍ଦ୍ର ସରକାର ସ୍ୱନିଧୀ ଯୋଜନାରେ ଅର୍ଥ ଦେଉଛନ୍ତି । ଏହି ଯୋଜନା ପରେ ବ୍ୟବସାୟୀଙ୍କଠାରେ ଅଧିକ ଉତ୍ସାହ ଦେଖିବାକୁ ମିଳିଛି ।
ଏହି ଯୋଜନାରେ ଉଠା ଓ ରାସ୍ତାକଡ ଦୋକାନୀଙ୍କୁ ୧୦ ହଜାର ଟଙ୍କା ଲୋନ୍ ମିଳିଥାଏ । ଯଦି କରୋନା ପାଇଁ ଆପଣଙ୍କ ବ୍ୟବସାୟ ପ୍ରଭାବିତ ହୋଇଛି ତେବେ ସରକାର ବିନା ଗ୍ୟାରେଣ୍ଟିରେ ୧୦ ହଜାର ଟଙ୍କା ଯାଏଁ ଲୋନ୍ ଦେବେ ।ଏଥିପାଇଁ ନିକଟସ୍ଥ ବ୍ୟାଙ୍କ୍ ସହ ସମ୍ପର୍କ କରିବାକୁ ପଡିବ ।
ଏହି ଯୋଜନାରେ ୫୦ ଲକ୍ଷ ଲୋକଙ୍କୁ ଲୋନ୍ ଦେବା ପାଇଁ ଲକ୍ଷ୍ୟ ରଖାଯାଇଛି । ଲୋନ୍ ନେବା ପରେ ବ୍ୟବସାୟୀମାନେ ମାସକୁ ମାସ କିସ୍ତୀ ଆକାରରେ ଟଙ୍କା ଫେରାଇବେ । ଠିକ୍ ସମୟରେ କିସ୍ତୀ ପ୍ରଦାନ କଲେ ବାର୍ଷିକ ସୁଧ ଉପରେ ୭ ପ୍ରତିଶତ ସବସିଡି ମଧ୍ୟ ମିଳିବ । ଏହାସହ ୧୨୦୦ ଟଙ୍କାର କ୍ୟାସବ୍ୟାକ୍ ସୁବିଧା ମଧ୍ୟ ରହିଛି ।
