ସତ୍ୟଶିଖା(ଭୁବନେଶ୍ୱର) ୧୬.୧୧.୨୦୨୧: ଆସନ୍ତା ୧୮ତାରିଖରେ ପ୍ରକାଶ ପାଇବ ଯୁକ୍ତଦୁଇ ସ୍ୱତନ୍ତ୍ର ପରୀକ୍ଷା ଫଳ । ଖାତାଦେଖା ପକ୍ରିୟା ଶେଷ ହୋଇଥିଲେ ହେଁ ଫଳ ପ୍ରକାଶରେ କାହିଁକି ବିଳମ୍ବ ହେଉଛି ତାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ତେବେ ଫଳ ପ୍ରକାଶ ଲାଗି +୨ ପରିଷଦ ଗଣଶିକ୍ଷା ବିଭାଗର ଅନୁମତିକୁ ଅପେକ୍ଷା କରିଥିବା ସୂଚନା ମିଳିଛି । ମାତ୍ର ଗଣଶିକ୍ଷା ବିଭାଗର ଜଣେ ବରିଷ୍ଟ ଅଧିକାରୀଙ୍କ କହିବା ଅନୁଯାୟୀ ୧୮ତାରିଖ ସନ୍ଧ୍ୟା ନଚେତ ୧୯ତାରିଖରେ ଫଳ ପ୍ରକାଶ ପାଇବା ଧାର୍ଯ୍ୟ ହୋଇଛି ।
୧୯ତାରିଖ ସରକାରୀ ଛୁଟି ଥିବାରୁ ୧୮ତାରିଖରେ ଫଳ ପ୍ରକାଶ ପାଇବ । ଯଦି ୧୮ରେ ମନ୍ତ୍ରୀ ଉପସ୍ଥିତ ନରୁହନ୍ତି ତେବେ ୧୯ତାରିଖରେ ଫଳ ପ୍ରକାଶ କରାଯିବ । ବର୍ତ୍ତମାନ ସୁଦ୍ଧା ୧୮ତାରିଖରେ ଫଳ ପାଇବ ବୋଲି ଏକ ପ୍ରକାର ସ୍ପଷ୍ଟ କରାଯାଇଥିଲେ ହେଁ ୧୭ରୁ ୧୯ ମଧ୍ୟରେ ରେଜଲ୍ଟ ପ୍ରକାଶ କରାଯିବା ସୁନିଶ୍ଚିତ ହୋଇଛି ।
ଯାହାଫଳରେ ଛାତ୍ରଛାତ୍ରୀ ତଥା ଅଭିଭାବକମାନେ ଏକପ୍ରକାର ଆଶ୍ୱସ୍ତ ହୋଇଛନ୍ତି । ପ୍ରକାଶଥାଉକି, ଚଳିତବର୍ଷ ବିକଳ୍ପ ବ୍ୟବସ୍ଥାରେ ରେଜଲ୍ଟ ପ୍ରକାଶ ପାଇବା ପରେ ୧୩ ହଜାର ୪୩ ଜଣ ଛାତ୍ରଛାତ୍ରୀ ଅଫଲାଇନ୍ ପରୀକ୍ଷା ଦେଇଥିଲେ । ୧୮୫ ପରୀଷା କେନ୍ଦ୍ରରେ ପରୀକ୍ଷା ହୋଇଥିବା ବେଳେ ରାଜ୍ୟର ୧୩ଟି ଜୋନରେ ମାନୁଆଲ ପଦ୍ଧତିରେ ଖାତାଦେଖା ହୋଇଥିଲା । ଏହି ରେଜଲ୍ଟ ପ୍ରକାଶ ପାଇବା ପରେ +୩ ପ୍ରଥମବର୍ଷ ନାମଲେଖା ଲାଗି ସ୍ୱତନ୍ତ୍ର ପ୍ରକ୍ରିୟା ଆରମ୍ଭ ହେବ ବୋଲି ଉଚ୍ଚଶିକ୍ଷା ବିଭାଗ ପକ୍ଷରୁ ଜଣାପଡ଼ିଛି ।
