ସତ୍ୟଶିଖା ( ଭୁବନେଶ୍ୱର )୧୯/୧୦ /୨୦୨୧: ସନସାଇନ୍ ସ୍କୁଲ ଅଧ୍ୟକ୍ଷା ମମିତା ମେହେର ନିଖୋଜ ଘଟଣାରେ ନୁଆ ମୋଡ । ମହାଲିଙ୍ଗ୍ ଷ୍ଟାଡିୟମ୍ ମାଟି ତଳୁ ଉଦ୍ଧାର ହୋଇଥିବା ସୁନା ଚେନ୍ ,ପାଉଁଜି , ବ୍ରେସଲେଟ ଓ ବ୍ୟାଗ ମମିତାଙ୍କର ବୋଲି ପରିବାର ଲୋକେ ଚିହ୍ନିଛନ୍ତି। ମମିତା ମେହେରଙ୍କୁ ହତ୍ୟା ପରେ ପୋଡି ଦେଇ ମାଟି ତଳେ ପୋତି ଦିଆଯାଇଥିବା ସନ୍ଦେହ । ତେବେ ଏହା ପଛରେ ରହିଛି ଅନେକ ଗୁଢ ରହସ୍ୟ । ଯାହା ଫେରାର ଥିବା ସ୍କୁଲ ସଭାପତି ଗୋବିନ୍ଦ ସାହୁ ଗିରଫ ପରେ ହେବ ଖୁଲାସା ।
ଆଜି ସକାଳୁ ମମିତା ମେହେର ନିଖୋଜ ଘଟଣାରେ ଆକ୍ସନ୍ ମୋଡକୁ ଆସିଥିଲା ପୋଲିସ । ପୋଲିସ ଉପସ୍ଥିତିରେ ମହାଲିଙ୍ଗ ସ୍ଥିତ ସରକାରୀ ସ୍କୁଲର ନିର୍ମାଣଧୀନ ଖେଳ ପଡିଆରୁ ମାଜିଷ୍ଟ୍ରେଟଙ୍କ ଉପସ୍ଥିତିରେ ସାଇଣ୍ଟିଫିକ୍ ଟିମ୍ ଯାଞ୍ଚ କରିଥିଲା । ପ୍ରାୟ ୫ ଫୁଟ ମାଟି ତଳୁ ପୋଡା ହାଡ, ରୂପା ପାଉଁଜି, ଭ୍ୟାନିଟି ବ୍ୟାଗ ଜବତ କରିଛି ସାଇଣ୍ଟିଫିକ୍ ଟିମ୍ । ସେସବୁ ମମିତାଙ୍କର ବୋଲି ପରିବାରଲୋକ ଚିହ୍ନଟ କରିଛନ୍ତି । ଆବଶ୍ୟକ ପଡିଲେ ଜବତ ହାଡର ଡିଏନଏ ଟେଷ୍ଟ ମଧ୍ୟ କରାଯିବ ।
ଗତ ୮ ତାରିଖରେ ମମିତା ଗାଁରୁ ବାହାରି ସ୍କୁଲକୁ ଯାଉଥିଲେ । ଏହି ସମୟରେ ରାସ୍ତାରୁ ହଠାତ୍ ସେ ନିଖୋଜ୍ ହୋଇଯାଇଥିଲେ । ତେବେ ସେ କୁଆଡେ ଗଲେ ଓ କିପରି ନିଖୋଜ ହେଲେ ସେ ନେଇ କୌଣସି ସ୍ପଷ୍ଟ ସୂଚନା ଆସିନାହିଁ । ତେବେ ଶେଷ ସିସିଟିଭ୍ ଭିଜୁଆଲ୍ ମୁତାବକ ମମତା ଶେଷ ଥର ପାଇଁ ଗୋବିନ୍ଦଙ୍କ ଗାଡିରେ ବସି କଲେଜକୁ ଯାଇଥିଲେ । ଏନେଇ ସେ ତାଙ୍କ ମାଙ୍କୁ ମଧ୍ୟ ସୂଚନା ଦେଇଥିଲେ । ହେଲେ ଏହାପରଠାରୁ ତାଙ୍କର ଆଉ କୌଣସି ପତ୍ତା ମିଳିନଥିଲା । ଆଜି ସ୍ଥାନୀୟ ଏକ ଷ୍ଟାଡିୟମରୁ ଏକ ଗଳିତ ଶବ ଉଦ୍ଧାର ହେବା ପରେ ତାଙ୍କର ହତ୍ୟା କରାଯାଇଥିବା ସନ୍ଦେହ ଦୃଢୀଭୂତ ହେବାରେ ଲାଗିଛି ।
