ଜଳିଗଲା ଫଳ ମାର୍କେଟ୍

ସତ୍ୟଶିଖା (ବଲାଙ୍ଗୀର) ୧୮/୧୨/୨୦୨୦ : ବଲାଙ୍ଗୀର ସହରରେ ଅଘଟଣ । ରାତି ଅଧରେ ଜଳିଗଲା ଫଳ ମାର୍କେଟ୍ ।  ନିଆଁରେ ଜଳି ଜଣେ ଗୁରୁତର ହୋଇଥିବା ବେଳେ ଲକ୍ଷାଧିକ ଟଙ୍କାର କ୍ଷୟକ୍ଷତି ହୋଇଛି । ବଲାଙ୍ଗୀର ସହର ସରକାରୀ ବସଷ୍ଟାଣ୍ଡ ପାଖରେ ଥିବା ଫଳ ମାର୍କେଟରେ ଗୁରୁବାର ବିଳମ୍ବିତ ରାତିରେ ଅଗ୍ନିକାଣ୍ଡ ହୋଇଛି । ୭ରୁ ଅଧିକ ଫଳ ଠେଳା ସହ ଦୋକାନ ପୋଡିଯାଇ ନଷ୍ଟ ହୋଇଯାଇଛି । ତେବେ ଫଳ ଦୋକାନରେ ଶୋଇଥିବା ଜଣେ ବ୍ୟକ୍ତି  ମଧ୍ୟ ନିଆଁ ସଂସ୍ପର୍ଶରେ ଆସି ଜଳି ଯାଇଛନ୍ତି । ହେଲେ ଅଳ୍ପକେ ବ୍ୟକ୍ତି ଜଣକ ବର୍ତ୍ତି ଯାଇଛନ୍ତି । ତାଙ୍କ ନାମ କୁନୁ ଘିବେଲା ।

ଗୁରୁବାର ରାତି ପାଖାପାଖି ଗୋଟାଏ ସମୟରେ ହଠାତ୍ ଫଳ ମାର୍କେଟରେ ନିଆଁ ଲାଗିଯାଇଥିଲା । ଟାଉନ ଥାନା ପିସିଆର ଏ ଘଟଣାକୁ ଦେଖିବା ସହ ଅଗ୍ନିଶମ ବିଭାଗକୁ  ସୂଚନା ଦେଇଥିଲା । ଘଟଣାସ୍ଥଳରେ ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ୍ତ କରିଥିଲେ । ତେବେ ୪ରୁ ୫ଲକ୍ଷ ଟଙ୍କା କ୍ଷୟକ୍ଷତି ଆକଳନ କରିଛନ୍ତି ଫଳ ବ୍ୟବସାୟୀ । ତେବେ ପୂର୍ବ ଶତ୍ରୁତାରୁ କେହି ଜଣେ ଫଳ ମାର୍କେଟରେ ନିଆଁ ଲଗାଇଥିବା ଅଭିଯୋଗ ଆଣିଛନ୍ତି ବ୍ୟବସାୟୀ ।ତେବେ ପୂର୍ବରୁ ସରକାରୀ ବସଷ୍ଟାଣ୍ଡଠାରୁ କଚେରୀ ଛକ ରାସ୍ତା କଡରେ ଫଳ ଦୋକାନ ଖୋଲୁଥିଲେ ବ୍ୟବସାୟି ତାଙ୍କୁ ସ୍ଥାୟୀ କରିବା ପାଇଁ ପାଖରେ ଥିବା ଉପଜିଲ୍ଲାପାଳଙ୍କ କାର୍ଯ୍ୟାଳୟ ଭାଙ୍ଗି ଥଇଥାନ କରାଯାଇଥିଲା । ଫଳ ଭେଣ୍ଡିଙ୍ଗ ଜୋନ୍ ଖୋଲାଯାଇଥିଲା । ତେବେ ପୂର୍ବ ଅପେକ୍ଷା ବ୍ୟବସାୟରେ ମାନ୍ଦାଅବସ୍ଥା ଥିବାବେଳେ ଏଭଳି ଏକ ଘଟଣା ଘଟିବା ଫଳରେ ଅସନ୍ତୋଷ ଫଳ ବ୍ୟବସାୟୀ । ଟାଉନ ଥାନା ପୋଲିସ ନିଆଁ ଲାଗିବା ଘଟଣାକୁ ନେଇ ତଦନ୍ତ ଆରମ୍ଭ କରିଛି ।