ଭାରତ-ଇଂଲଣ୍ଡ ପ୍ରଥମ ଟେଷ୍ଟମ୍ୟାଚ୍ ଆଜିଠାରୁ

ସତ୍ୟଶିଖା ୦୫/୦୨/୨୦୨୧ : ଭାରତ ଓ ଇଂଲଣ୍ଡ ମଧ୍ୟରେ ଟେଷ୍ଟ ସିରିଜ୍ ସର୍ବଦା କ୍ରିକେଟ୍‌ପ୍ରେମୀଙ୍କୁ ରୋମାଞ୍ଚିତ କରିଥାଏ । ୪ ବର୍ଷ ପରେ ଭାରତ ଗସ୍ତରେ ଆସିଛି ଇଂଲଣ୍ଡ ଦଳ । ୪ ବର୍ଷ ତଳେ ଇଂଲଣ୍ଡ ଏଠାରୁ ୪ଟିଯାକ ଟେଷ୍ଟ ହାରି ଫେରିଥିଲା । ଏଥର ସିରିଜ୍ ନ ଜିତିଲେ ମଧ୍ୟ ଉନ୍ନତ ପ୍ରଦର୍ଶନ ଆଶାରେ ଜୋ ରୁଟ୍‌ ନେତୃତ୍ବାଧୀନ ଦଳ ରହିବ । ଶୁକ୍ରବାରଠାରୁ ୪ ମ୍ୟାଚ୍‌ ବିଶିଷ୍ଟ ଭାରତ-ଇଂଲଣ୍ଡ ଟେଷ୍ଟ ସିରିଜ୍‌ର ପ୍ରଥମ ଟେଷ୍ଟ ଏମ୍.ଏ. ଚିଦମ୍ବରମ୍ ଷ୍ଟାଡିୟମ୍‌ରେ ଖେଳାଯିବ । ଉଭୟ ଦଳ ବିଦେଶରେ ଟେଷ୍ଟ ସିରିଜ୍ ଜିତି ଏହି ସିରିଜ୍ ଖେଳିବାକୁ ଯାଉଛନ୍ତି । ଘରୋଇ ଶ୍ରୀଲଙ୍କା ବିପକ୍ଷରେ ଟେଷ୍ଟ ସିରିଜ୍‌କୁ ୨-୦ରେ ପୋଛିବା ପରେ ଭାରତ ଆସିଛି ଇଂଲଣ୍ଡ । ଅନ୍ୟପକ୍ଷରେ ଦଳର ଅର୍ଦ୍ଧାଧିକ ନିୟମିତ ଖେଳାଳିଙ୍କୁ ହରାଇବା ସତ୍ତ୍ବେ ଘରୋଇ ଅଷ୍ଟ୍ରେଲିଆକୁ ୨-୧ରେ ଟେଷ୍ଟ ସିରିଜ୍‌ରେ ଭାରତ ପରାସ୍ତ କରିଛି । ପୁଣି ଉଭୟ ଦଳକୁ କିଛି ପ୍ରମୁଖ ଖେଳାଳି ଫେରିଥିବାରୁ ସେମାନେ ଉତ୍ସାହିତ ଅଛନ୍ତି । ଇଂଲଣ୍ଡ ଦଳକୁ ଫାଷ୍ଟବୋଲର ଜୋଫ୍ରା ଆର୍ଚର ଓ ତାରକା ଅଲ୍‌ରାଉଣ୍ଡର ବେନ୍‌ ଷ୍ଟୋକ୍‌ସ ଫେରିଛନ୍ତି । ଭାରତୀୟ ଦଳକୁ ଅଧିନାୟକ ବିରାଟ କୋହଲିଙ୍କ ସହ ଯଶପ୍ରୀତ ବୁମ୍‌ରା, ଈଶାନ୍ତ ଶର୍ମା ଓ ଆର୍. ଅଶ୍ବିନ ଫେରିଛନ୍ତି ।କୋଭିଡ୍‌ ସଂକ୍ରମଣ ଯୋଗୁଁ ଦୀର୍ଘ ୩୩୦ ଦିନ ପରେ ଭାରତକୁ ଆନ୍ତର୍ଜାତିକ କ୍ରିକେଟ୍‌ ଫେରିବାକୁ ଯାଉଛି । ମଜ୍‌ଭୁତ ସ୍ପିନ୍ ବୋଲିଂ ଆକ୍ରମଣ ଓ ସ୍ପିନ୍ ବିପକ୍ଷରେ ମଜ୍‌ଭୁତ ବ୍ୟାଟ୍‌ସମ୍ୟାନ୍ ନ ଥିଲେ ଭାରତରେ ଟେଷ୍ଟ ସିରିଜ୍ ଜିତିବା କଷ୍ଟକର । ୨୦୧୨ରେ ଶେଷଥର ପାଇଁ ଭାରତରେ ଇଂଲଣ୍ଡ ଟେଷ୍ଟ ସିରିଜ୍ ଜିତିଥିବା ବେଳେ ମଣ୍ଟି ପାନେସାର ଓ ଗ୍ରାଏମ୍ ସ୍ୱାନ୍‌ଙ୍କ ପରି ସ୍ପିନର ଭାରତୀୟଙ୍କୁ ବଶୀଭୁତ କରି ପାରିଥିଲେ । ଏବେ ଦଳରେ ଥିବା ଡମ୍ ବେସ୍ ଓ ଜ୍ୟାକ୍ ଲିଚ୍ ଅବଶ୍ୟ ମଣ୍ଟି ଓ ସ୍ୱାନ୍‌ଙ୍କ ପରି କରିତ୍‌କର୍ମା ସ୍ପିନର ନୁହନ୍ତି । ସ୍ପିନ୍‌ ବୋଲିଂ ଅଲ୍‌ରାଉଣ୍ଡର ମୋଇନ୍ ଅଲୀ ଉପଯୋଗୀ ସାବ୍ୟସ୍ତ ହୋଇପାରନ୍ତି । ତେବେ ଶ୍ରୀଲଙ୍କାରେ ବେସ୍ ଓ ଲିଚ୍‌ଙ୍କ ପ୍ରଦର୍ଶନ ଚମତ୍କାର ଥିଲା ଏବଂ ଚେନ୍ନଇର ପିଚ୍‌ ଉଭୟଙ୍କୁ ସହାୟତା ଦେବ । ଭାରତୀୟ ବୋଲିଂ ଆକ୍ରମଣର ନେତୃତ୍ବ ନେବେ ଆର୍. ଅଶ୍ବିନ୍ । ୨ୟ ସ୍ପିନର ଭାବେ କୁଲଦୀପ ଯାଦବ ଖେଳିପାରନ୍ତି । ପେସ୍‌ ବୋଲର ଭାବେ ଯଶପ୍ରୀତ ବୁମ୍‌ରା ଖେଳିବା ନିଶ୍ଚିତ ହୋଇଥିବା ବେଳେ ୨ୟ ପେସ୍ ବୋଲର ଭାବେ ଈଶାନ୍ତ ଶର୍ମା ଖେଳିପାରନ୍ତି । କ୍ରିକେଟ୍‌ ଦୁନିଆର ଦୁଇ ଶ୍ରେଷ୍ଠ ପେସ୍ ବୋଲର ଜେମ୍‌ସ ଆଣ୍ଡରସନ୍ ଓ ଷ୍ଟୁଆର୍ଟ ବ୍ରଡ୍‌ ନିଶ୍ଚିତ ଭାବେ ଭାରତୀୟ ବ୍ୟାଟ୍‌ସମ୍ୟାନଙ୍କ ପାଇଁ ଆହ୍ବାନ ସୃଷ୍ଟିକରିବେ । ଅବଶ୍ୟ ଚେନ୍ନଇ ପିଚ୍‌ରୁ ଉଭୟଙ୍କୁ ସେପରି ସହାୟତା ମିଳିବନାହିଁ । ଶ୍ରୀଲଙ୍କା ବିପକ୍ଷ ୨ୟ ଟେଷ୍ଟରେ ଆଣ୍ଡରସନ୍ ୬ଟି ୱିକେଟ ନେଇଥିଲେ । ଆଣ୍ଡରସନ୍ ଓ ବ୍ରଡ୍‌ଙ୍କ ମଧ୍ୟରୁ ଜଣେ ଖେଳିବେ । ଜୋଫ୍ରା ଆର୍ଚର ତାଙ୍କ ଗତି ଦ୍ୱାରା ଭାରତୀୟ ବ୍ୟାଟ୍‌ସମ୍ୟାନ୍‌ଙ୍କୁ ଅସୁବିଧାରେ ପକାଇ ପାରନ୍ତି ।ଅଧିନାୟକ ଜୋ ରୁଟ୍‌ଙ୍କ ଉପରେ ଇଂଲଣ୍ଡର ବ୍ୟାଟିଂ ଅଧିକ ନିର୍ଭରଶୀଳ । ଶ୍ରୀଲଙ୍କାରେ ରୁଟ୍‌ ୨୨୮ ଓ ୧୮୬ ରନ୍‌ର ଇନିଂସ ଖେଳିଥିଲେ । ଇଂଲଣ୍ଡ ବ୍ୟାଟିଂ ଲାଇନ୍‌ରେ ଜୋସ୍ ବଟ୍‌ଲର ଓ ବେନ୍ ଷ୍ଟୋକ୍‌ସ ବେଶ୍ ଅଭିଜ୍ଞ । ଜ୍ୟାକ୍ କ୍ରଲି ଆହତ ହୋଇଥିବାରୁ ଓଲି ପୋପ୍‌ଙ୍କୁ ସୁଯୋଗ ମିଳିପାରେ । ଇଂଲଣ୍ଡର ମଧ୍ୟକ୍ରମ ମଜ୍‌ଭୁତ ମନେ ହେଉଥିଲେ ହେଁ ସ୍ପିନ୍ ବିପକ୍ଷରେ ସେମାନଙ୍କୁ ଅଗ୍ନିପରୀକ୍ଷାର ସମ୍ମୁଖୀନ ହେବାକୁ ପଡ଼ିବ । ତେବେ ରୋରି ବର୍ନସ, ଡମ୍‌ ସିବ୍‌ଲି ଓ ଡ୍ୟାନ୍ ଲରେନ୍‌ସଙ୍କ ସ୍ପିନ୍ ବିପକ୍ଷରେ ସେପରି ଭଲ ବ୍ୟାଟ୍‌ସମ୍ୟାନ ନୁହନ୍ତି । ଇଂଲଣ୍ଡ ଅଫ୍‌ସ୍ପିନର ଡମ୍ ବେସ୍ ଓ ପେସ୍ ବୋଲର କ୍ରିସ୍‌ ୱକ୍‌ସଙ୍କ ମଧ୍ୟରୁ ଜଣଙ୍କୁ ଖେଳାଇବ । ଭାରତୀୟ ବ୍ୟାଟିଂ ଲାଇନ୍‌ ନେଇ କୌଣସି ଦ୍ବନ୍ଦ୍ବ ନାହିଁ । ଶୁବ୍‌ମାନ ଗିଲ୍‌, ରୋହିତ ଶର୍ମା, ଚେତେଶ୍ୱର ପୂଜାରା, ବିରାଟ କୋହଲି, ଅଜିଙ୍କ୍ୟ ରାହାଣେ ଓ ଋଷଭ ପନ୍ତ୍ ପ୍ରଥମ ୬ଟି ସ୍ଥାନରେ ବ୍ୟାଟିଂକରିବେ । ୭ନଂ ସ୍ଥାନ ପାଇଁ ୩ ଜଣ ଦାବିଦାର- ୱାଶିଂଟନ ସୁନ୍ଦର, ହାର୍ଦିକ ପାଣ୍ଡ୍ୟା ଓ ଅକ୍ଷର ପଟେଲ ଥିଲେ ହେଁ ଅକ୍ଷରଙ୍କ ଖେଳିବା ସମ୍ଭାବନା ଅଧିକ । ଭାରତ ଏହି ସିରିଜ୍ ଖେଳିବାକୁ ଯାଉଥିବା ବେଳେ ଏହାର ଆଖି ବିଶ୍ୱ ଟେଷ୍ଟ ଚମ୍ପିଆନ୍‌ସିପ ଫାଇନାଲ ଉପରେ ରହିବ । ନ୍ୟୁଜିଲାଣ୍ଡ ଫାଇନାଲ ପାଇଁ ଯୋଗ୍ୟତା ଅର୍ଜନ କରିଥିବା ବେଳେ ଏହି ସିରିଜ୍ ଜିତିଲେ ଭାରତ ଫାଇନାଲ ଖେଳିପାରିବ । ଚେନ୍ନଇ ପିଚ୍‌ରେ ସାମାନ୍ୟ ଘାସ ଥିବା ସତ୍ତ୍ବେ ଏହା ଧିମା ରହିବ ।