ସତ୍ୟଶିଖା (ଭୁବନେଶ୍ୱର) ୨୮/୧୨/୨୦୨୦ : ୯ ମାସ ପରେ ଖୋଲିଛି ଶ୍ରୀଲିଙ୍ଗରାଜ ମନ୍ଦିର । ଆଜି ପ୍ରଥମ ଦିନରେ ଶ୍ରୀଲିଙ୍ଗରାଜଙ୍କ ଦର୍ଶନ କରିଛନ୍ତି ସେବାୟତ ଓ ତାଙ୍କ ପରିବାରର ସଦସ୍ୟ । କରୋନା କଟକଣାରେ ସେମାନେ ମନ୍ଦିର ଆଡ଼କାଠ ନିକଟରେ ଶ୍ରୀଜିଉଙ୍କୁ ଦର୍ଶନ କରିଥିଲେ । ଦୀର୍ଘ ଦିନ ଧରି ଭଗବାନଙ୍କ ଦର୍ଶନରୁ ବଞ୍ଚିତ ହୋଇଥିବା ବହୁ ସେବାୟତଙ୍କ ପରିବାର ସଦସ୍ୟ ଭାବବିହ୍ବଳ ହୋଇଯାଇଥିଲେ । ପ୍ରଥମ ଦିନରେ ୧୫୦ଜଣ ଶ୍ରୀଲିଙ୍ଗରାଜ ମହାପ୍ରଭୁଙ୍କ ଦର୍ଶନ କରିଥିଲେ । ଦର୍ଶନ ବେଳେ ସେମାନେ ମାସ୍କ ପିନ୍ଧିବା, ସିଂହଦ୍ବାର ନିକଟରେ ହାତ ସାନିଟାଇଜ୍ କରିବା, ୬ ଫୁଟ୍ର ସାମାଜିକ ଦୂରତା ବଜାୟ ରଖିବା, ପାନ, ଗୁଟ୍ଖା ନଖାଇବା ଏବଂ ମନ୍ଦିର ଭିତରେ ଓ ବାହାରେ ଛେପ ନପକାଇବା, ର୍ଥମାଲ ସ୍କ୍ରିନିଂ, ଆଣ୍ଟିଜେନ୍ ଟେଷ୍ଟ ଆଦି ନିୟମ ପାଳନ କରିଥିଲେ ।
ଏହି କାର୍ଯ୍ୟକୁ ତଦାରଖ କରିବାକୁ ବିଏମ୍ସି ଡେପୁଟି କମିସନର କମଲଜିତ୍ ଦାସ, ଜୋନାଲ ଡେପୁଟି କମିସର ଅଂଶୁମାନ ରଥ, ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ପ୍ରସନ୍ନ କୁମାର ଦାଶ ଓ ବିଡିଏର ଅଧିକାରୀ ଉପସ୍ଥିତ ଥିଲେ । ସେବାୟତଙ୍କ ପରିବାରର ସଦସ୍ୟମାନଙ୍କୁ ଚିହ୍ନଟ କରିବାକୁ ବିଭିନ୍ନ ନିଯୋଗର ସମ୍ପାଦକ, ମନ୍ଦିର କର୍ମଚାରୀ ଓ ସୁପରଭାଇଜର ଉପସ୍ଥିତ ଥିଲେ । ତେବେ ମନ୍ଦିର ଭିତରକୁ ଭୋଗ, ଫୁଲ, ଦୀପ ନେବାକୁ ସଂପୂର୍ଣ୍ଣ ବାରଣ କରାଯାଇଛି । କୋଭିଡ୍-୧୯ ସୁରକ୍ଷା ମାର୍ଗଦର୍ଶିକାକୁ କଡ଼ାକଡ଼ି ଭାବେ ପାଳନ କରାଯାଇ ଆସନ୍ତା ୩୧ ତାରିଖ ପର୍ଯ୍ୟନ୍ତ କେବଳ ସେବାୟତ ଓ ସେବାୟତ ପରିବାର ସଦସ୍ୟଙ୍କ ପ୍ରବେଶ ପାଇଁ ଅନୁମତି ଦିଆଯାଇଛି । ଆଜି ମଧ୍ୟ ବହୁ ଶ୍ରଦ୍ଧାଳୁ ମନ୍ଦିର ସିଂହଦ୍ବାର ନିକଟରେ ପ୍ରାର୍ଥନା କରି ଫେରିଥିଲେ । ସେବାୟତ ପରିବାରର ସଦସ୍ୟ ଯେତିକି ମନ୍ଦିରକୁ ପ୍ରବେଶ କରିଥିଲେ, ତା’ଠାରୁ ଅଧିକ ସିଂହଦ୍ବାର ନିକଟକୁ ଆସି ପୂଜା କରିଯାଇଥିଲେ ।
