ଦନ୍ତାର ହୋଇଥିଲା ମଲ୍ଟି ଅର୍ଗାନ ଫେଲ୍‌, ସେପ୍ଟିସିମିଆରୁ ଗଲା ଜୀବନ

ହାତୀର ମୃତ୍ୟୁ ପାଇଁ ବନବିଭାଗର ଖାମଖିଆଲ ନୀତିକୁ ଦାୟୀ କରିଛନ୍ତି ସ୍ଥାନୀୟ ଲୋକେ। ପ୍ରାୟ ୬ ଦିନ ପୂର୍ବରୁ ସ୍ଥାନୀୟ ଲୋକେ ନୂଆଗଡ଼ ଜଙ୍ଗଲ ପାଖରେ ଅସୁସ୍ଥ ହାତୀଟିକୁ ଦେଖି ବନ ବିଭାଗକୁ ଖବର ଦେଇଥିଲେ । କିନ୍ତୁ ୫ ଦିନ ଧରି ବନବିଭାଗ ହାତୀଟିକୁ ଟ୍ରାଙ୍କୁଲାଇଜ କରିବାରେ ଫେଲ୍‌ ହୋଇଥିଲା । ଫଳରେ ହାତୀଟି ଦୀର୍ଘ ୨୦ କିମି ବାଟ ଯାଇ ବାସିଙ୍ଗା ଜଙ୍ଗଲ ନିକଟରେ ପଡ଼ି ଯାଇଥିଲା। ସେଠାରେ ବନ ବିଭାଗ ଟିମ୍‌ ଟ୍ରାଙ୍କୁଲାଇଜ କରି ଚିକିତ୍ସା ଆରମ୍ଭ କରିଥିଲେ। ମାତ୍ର ୫ ଦିନ ଧରି ଗୁଳିବିଦ୍ଧ ହାତୀଟି ବୁଲାବୁଲି କରୁଥିବା ବେଳେ କିଛି ଖାଦ୍ୟ ଗ୍ରହଣ କରି ନ ଥିଲା। ଫଳରେ ହାତୀଟି ସମ୍ପୂର୍ଣ୍ଣ ଅସୁସ୍ଥ ହୋଇ ପଡ଼ିଥିଲା। ଏହାପରେ ଚିକିତ୍ସାଧୀନ ଅବସ୍ଥାରେ ଥିବା ହାତୀଟି ଗତକାଲି ସକାଳୁ କିଛି ଖାଦ୍ୟ ଗ୍ରହଣ କରି ନ ଥିବା ବେଳେ ସନ୍ଧ୍ୟା ବେଳେ ଆଖି ବୁଜିଥିଲା।