ସତ୍ୟଶିଖା(ଭୁବନେଶ୍ୱର) ୨୦.୧୨.୨୦୨୧: ଘଞ୍ଚ ଜଙ୍ଗଲରେ ହାତୀଙ୍କ ଗତିବିଧି ଓ ସେମାନଙ୍କ ବାସସ୍ଥଳୀ ଉପରେ ନଜର ରଖିବ ଡ୍ରୋନ୍। ହାତୀପଲ ଜଙ୍ଗଲ ଭିତରେ କେଉଁ ଦିଗରେ ଗତି କରୁଛନ୍ତି, କେଉଁ ଗାଁମୁହାଁ ଅଛନ୍ତି, ହାତୀପଲରେ କେତୋଟି ଦନ୍ତା ରହିଛନ୍ତି, ତାହା ବି ନିରୀକ୍ଷଣ କରିବ। ହାତୀ ଯଦି କୌଣସି ସ୍ଥାନରେ ଜନବସତି ଆଡ଼କୁ ମାଡ଼ି ଯାଉଥିବା ନଜରକୁ ଆସେ, ବନ କର୍ମଚାରୀ ସେଠାରେ ପହଞ୍ଚି ତୁରନ୍ତ ଘଉଡ଼ାଇବେ। ପାଇଲଟ୍ ପ୍ରକଳ୍ପ ଭାବେ ରାଜଧାନୀ ଉପକଣ୍ଠ ଚନ୍ଦକା ଜଙ୍ଗଲ ସମେତ ରାଜ୍ୟର କେତେକ ପ୍ରମୁଖ ଜଙ୍ଗଲରେ ନିୟୋଜନ କରାଯାଇଛି। ଏହାର ସଫଳତାକୁ ଆଧାର କରି ରାଜ୍ୟର ଅନ୍ୟ ଜଙ୍ଗଲଗୁଡ଼ିକରେ ମଧ୍ୟ ଡ୍ରୋନ୍ ନିୟୋଜିତ କରାଯିବ। ଏଥିସହ ହାତୀଙ୍କ ପାଇଁ ଏକ ଉଦ୍ଧାର କେନ୍ଦ୍ର(ରେସ୍କ୍ୟୁ କେନ୍ଦ୍ର) ପ୍ରତିଷ୍ଠା କରଯାଉଛି, ଯାହାକି ୨୦୨୨ରେ ଶେଷ କରିବାକୁ ଲକ୍ଷ୍ୟ ରଖାଯାଇଛି। ସେହିପରି ସମସ୍ୟା ସୃଷ୍ଟି କରୁଥିବା ହାତୀ ଦେହରେ ରେଡିଓକଲାର୍ ଯନ୍ତ୍ର ଖଞ୍ଜାଯାଇ ସେମାନଙ୍କ ଗତିବିଧି ଓ ଆଚରଣ ନିରୀକ୍ଷଣ କରାଯିବା ନେଇ ଚାଲିଥିବା ପ୍ରକ୍ରିୟା ଏବେ ସ୍ଥଗିତ ରହିଛି। ପ୍ରଥମ ପର୍ଯ୍ୟାୟରେ ହାତୀଙ୍କ ଦେହରେ ଲଗାଇବାରେ ବିଫଳ ହୋଇଥିବାରୁ ୨୦୨୨ରେ ପୁଣିଥରେ ଏନେଇ ପ୍ରକ୍ରିୟା ଆରମ୍ଭ କରାଯିବ ବୋଲି ବନ ବିଭାଗର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
