ସତ୍ୟଶିଖା(ବାଲୁଗାଁ ) ୦୫.୦୧.୨୦୨୨ : ଓଡିଶାରେ ଚାଲିଥିବା ବାର୍ଷିକ ପକ୍ଷୀ ଜନଗଣନାର ଏକ ଅଂଶ ଭାବରେ ଚିଲିକାରେ ଶେଷ ହୋଇଛି ପକ୍ଷୀ ଗଣନା। ଏସିଆର ବୃହତ ଲୁଣା ହ୍ରଦରେ ହ୍ରାସ ପାଇଛି ପକ୍ଷୀଙ୍କ ସଂଖ୍ୟା। ଚିଲିକା ହ୍ରଦକୁ ଆସୁଥିବା ପକ୍ଷୀମାନଙ୍କ ସଂଖ୍ୟା ଗତ ବର୍ଷ ତୁଳନାରେ ଚଳିତ ବର୍ଷ ଏକ ଲକ୍ଷ ହ୍ରାସ ଘଟିଛି। ବାଲୁଗାଁ ବନ୍ୟପ୍ରାଣୀ ବିଭାଗ ଓ ଚିଲିକା ଉନ୍ନୟନ କର୍ତ୍ତୃପକ୍ଷ ସିଡିଏ ପକ୍ଷରୁ ମଙ୍ଗଳବାର ଚିଲିକାରେ ପକ୍ଷୀ ଗଣନା ଶେଷ ହୋଇଛି। ଚଳିତ ବର୍ଷ ମୋଟ ୧୦ଲକ୍ଷ ୭୪ହଜାର ୧୭୩ଟି ପକ୍ଷୀଙ୍କ ସମାଗମ ହୋଇଛି। ତେବେ ଗତବର୍ଷ ୧୨ଲକ୍ଷ ୪୨ହଜାର ୮୨୬ଟି ପକ୍ଷୀଙ୍କ ସମାଗମ ହୋଇଥିବା ବେଳେ ଚଳିତ ବର୍ଷ ୧ଲକ୍ଷ ୬୮ହଜାର ୬୫୩ ପକ୍ଷୀ ଅର୍ଥାତ୍ ୧୬ପ୍ରତିଶତ ହ୍ରାସ ପାଇଥିବା ବିଭାଗ ପକ୍ଷରୁ ପ୍ରକାଶିତ ଗଣନା ରିପୋର୍ଟରୁ ଜଣାପଡ଼ିଛି।
ସେହିପରି ୧୫.୫୩ ବର୍ଗ କି.ମି ପରିବ୍ୟାପ୍ତ ପକ୍ଷୀ ଅଭୟାରଣ୍ୟ ନଳବଣରେ ଚଳିତ ବର୍ଷ ୯୭ପ୍ରଜାତିର ୩ଲକ୍ଷ ୫୮ହଜାର ୮୮୯ଟି ପକ୍ଷୀଙ୍କ ସମାଗମ ହୋଇଛି। ଗତବର୍ଷ ଏଠାରେ ଲକ୍ଷ ୨୪ ହଜାର ୭୮୮ପକ୍ଷୀଙ୍କ ସମାଗମ ହୋଇଥିଲା। ଏଠାରେ ମଧ୍ୟ ଚଳିତ ବର୍ଷ ୬୫ ହଜାର ୮୮୯ଟି ପକ୍ଷୀଙ୍କ ସଂଖ୍ୟା ହ୍ରାସ ପାଇଛି। ଗତ ବର୍ଷ ୧୯୦ ପ୍ରଜାତିର ସ୍ଥାନୀୟ ଓ ବିଦେଶୀ ପକ୍ଷୀଙ୍କୁ ଚିହ୍ନଟ କରାଯାଇଥିବା ବେଳେ ଚଳିତ ବର୍ଷ ୧୮୩ଟି ପ୍ରଜାତିର ପକ୍ଷୀଙ୍କ ସମାଗମ ହୋଇଥିବା ଗଣନାରୁ ଜଣାଯାଇଛି। ୨୦୧୮ ମସିହାରେ ଚିଲିକାରେ ୮,୯୩,୩୯୦ ପକ୍ଷୀଙ୍କ ସମାଗମ ହୋଇଥିଲା। ସେହିପରି ୨୦୧୯ ମସିହାରେ ୧୦,୪୭,୯୬୮, ୨୦୨୦ ମସିହାରେ ୧୧,୦୫,୦୪୦, ୨୦୨୧ ମସିହାରେ ୧୨,୪୨,୮୨୬ ଏବଂ ୨୦୨୨ରେ ୧୦,୭୪,୧୭୩ ପକ୍ଷୀଙ୍କ ଆଗମନ ହୋଇଛି।
