ସତ୍ୟଶିଖା(ଭୁବନେଶ୍ୱର) ୧୦.୧୨.୨୦୨୧: ବୁଷ୍ଟର ଡୋଜ ନେଇ ଆଜି ହୋଇପାରେ ନିଷ୍ପତି । କେନ୍ଦ୍ରୀୟ ଡ୍ରଗ୍ ଷ୍ଟାଣ୍ଡାର୍ଡ କଣ୍ଟ୍ରୋଲ୍ ଅର୍ଗାନାଇଜେସନ୍ (ସିଡିଏସସିଓ) ଅଧୀନରେ ଥିବା ବିଷୟ ବିଶେଷଜ୍ଞ କମିଟି ଆଜି କୋଭିଡ-୧୯ ବୁଷ୍ଟର୍ ଡୋଜ୍ ସମ୍ବନ୍ଧରେ ପ୍ରଥମ ବୈଠକ କରିବ । ଟିକା ଉତ୍ପାଦନକାରି କମ୍ପାନୀ ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ କୋଭିଶିଲ୍ଡର ଏକ ବୁଷ୍ଟର୍ ଡୋଜ୍ ଅନୁମୋଦନ ସମ୍ବନ୍ଧରେ ଡ୍ରଗ୍ କଣ୍ଟ୍ରୋଲର୍ ଜେନେରାଲ୍ ଅଫ୍ ଇଣ୍ଡିଆ (ଡିସିଜି) ରେ ଆବେଦନ କରିବା ପରେ ଏହି ବୈଠକ ବସୁଛି।
ସେରମ୍ ଇନଷ୍ଟିଚ୍ୟୁଟ୍ ଦର୍ଶାଇଛି ଯେ ବର୍ତ୍ତମାନ ଦେଶରେ କୋଭିଡ୍ ଟିକା ପର୍ଯ୍ୟାପ୍ତ ପରିମାଣର ଷ୍ଟକ୍ ଅଛି ଏବଂ ନୂତନ କରୋନାଭାଇରସ୍ ଭାରିଆଣ୍ଟ, ଓମିକ୍ରନ୍ ଉତ୍ପନ୍ନ ହେତୁ ବୁଷ୍ଟର୍ ଡୋଜ୍ର ଚାହିଦା ଅଛି । ସେରମ୍ ଇନଷ୍ଟିଚ୍ୟୁଟ୍ ହେଉଛି ଭାରତର ପ୍ରଥମ ଟିକା ଉତ୍ପାଦନକାରୀ କମ୍ପାନୀ ଯାହାକି କୋଭିଶିଲ୍ଡକୁ ଏକ ବୁଷ୍ଟର୍ ଡୋଜ୍ ଭାବରେ ଅନୁମୋଦନ ପାଇଁ ଆବେଦନ କରିଥିଲା।
ବିଶେଷକରି ନୂତନ ଉଚ୍ଚ ସଂକ୍ରମକ କୋଭିଡ-୧୯ ଭାରିଆଣ୍ଟ ଓମିକ୍ରନ୍ ଉତ୍ପନ୍ନ ହେବା ପରେ ଅନେକ ବିଶେଷଜ୍ଞ ଭାରତରେ ବୁଷ୍ଟର୍ ଡୋଜକୁ ମଧ୍ୟ ସୁପାରିଶ କରିଛନ୍ତି । କିନ୍ତୁ ସରକାର ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇନାହାଁନ୍ତି। ଜଣେ ବରିଷ୍ଠ ସରକାରୀ ଅଧିକାରୀ କହିଛନ୍ତି ଯେ ପ୍ୟାନେଲ ପୂର୍ବରୁ ବୈଜ୍ଞାନିକ ପ୍ରମାଣ ଏବଂ ସେମାନେ ଯାହା ସୁପାରିଶ କରୁଛନ୍ତି ତାହା ଉପରେ ଆଧାର କରି ଏହି ନିଷ୍ପତ୍ତି ନିଆଯିବ।
