ସତ୍ୟଶିଖା (ଭୁବନେଶ୍ୱର) ୧୧/୧୨/୨୦୨୦ : କିଛି ବର୍ଷ ପୂର୍ବେ ତାର ଲାଗିଥିବା ଇୟରଫୋନ୍ ପ୍ରଚଳନରେ ଥିଲା । ମାତ୍ର ବ୍ଲୁଟୁଥ୍ ପ୍ରଯୁକ୍ତିର ବ୍ୟବହାର ପରେ ଇୟରଫୋନ୍ ବଜାରରେ ବଡ଼ଧରଣର ପରିବର୍ତ୍ତନ ହୋଇଛି । ବ୍ଲୁଟୁଥ୍ ଇୟରଫୋନ୍ ଓ ହେଡ୍ଫୋନ୍ କିଛି ବର୍ଷ ଚର୍ଚ୍ଚାରେ ରହିବା ପରେ ଏବେ ଇୟର ବଡ୍ସର ଧାରା ଚାଲିଛି । ଏହା ଆକାରରେ ବହୁତ ଛୋଟ ହୋଇଥିବା ବେଳେ କାନ ଭିତରେ ତାହା ସୁବିଧାରେ ରହିପାରୁଛି । ଯେଉଁ ଖୋଳ ଭିତରେ ଏହା ଆସୁଛି ସେଥିରେ ଚାର୍ଜିଂ ସୁବିଧା ରହିଛି । ତେଣୁ ଏହା ଏବେ ଯୁବପିଢ଼ିଙ୍କ ଷ୍ଟାଇଲ୍ ଷ୍ଟେଟ୍ମେଣ୍ଟ୍ରେ ପରିଣତ ହୋଇଛି । ଘର ଭିତରେ ଗୀତ ଶୁଣିବା ଠାରୁ ଆରମ୍ଭ କରି କାର୍ଯ୍ୟାଳୟରେ କଥାବାର୍ତା ହେବା ଆଦି ଅନେକ ସ୍ଥାନରେ ଇୟର୍ ବଡ୍କୁ ବ୍ୟବହାର କରାଯାଉଛି । ଇୟର ବଡ୍ ଦେଖିବାକୁ ସୁନ୍ଦର ହୋଇଥିବା ବେଳେ ତାହାର ସାଉଣ୍ଡ୍ ମାନ ବେଶ୍ ଉନ୍ନତ, ପୋର୍ଟେବଲ୍ ଏବଂ ଅତି ସହଜରେ ତାହାକୁ ସ୍ମାର୍ଟଫୋନ୍ ସହ ସଂଯୋଗ କରାଯାଇପାରୁଛି । ସହଜରେ ବ୍ୟବହାର ହୋଇପାରୁଥିବାରୁ ଏହାକୁ ଗ୍ରାହକମାନେ ଅଧିକ ପସନ୍ଦ କରୁଛନ୍ତି ।
‘ନଏଜ୍ କ୍ୟାନ୍ସେଲେସନ୍’ ସୁବିଧା ପ୍ରମୁଖ ଆକର୍ଷଣ
କଂପାନିଗୁଡ଼ିକ ଇୟର୍ବଡ୍ସରେ ଅନେକ ପ୍ରକାର ସୁବିଧା ଯୋଡ଼ୁଛନ୍ତି । ସେଥିରେ ପ୍ରମୁଖ ସୁବିଧାଟି ହେଉଛି ନଏଜ୍ କ୍ୟାନ୍ସେଲେସନ୍ ପ୍ରଯୁକ୍ତି । ଏହି ବୈଶିଷ୍ଟ ଥିବା ଇୟରବଡ୍ସକୁ ବ୍ୟବହାର କରୁଥିବା ଲୋକମାନେ ଭିଡ଼ ଭିତରେ ଥିବା ବେଳେ ମଧ୍ୟ ସ୍ବଷ୍ଟ ଭାବେ କଥାବାର୍ତା ହୋଇପାରିବେ ଏବଂ ଗୀତ ଶୁଣିପାରିବେ କିମ୍ବା ଭିଡିଓ ଦେଖିପାରିବେ । ବାହାରର ଶବ୍ଦ କୌଣସି ପ୍ରଭାବ ପକାଇ ପାରିବ ନାହିଁ । ଇୟର ବଡ୍ସଗୁଡ଼ିକରେ ଭଏସ୍ ଆସିଷ୍ଟାଣ୍ଟ୍, ଆଇପି ରେଟିଙ୍ଗସ୍, ସ୍ପୋର୍ଟସ୍ ଫିଟ୍, ଏନ୍ଏଫ୍ସି ସଂଯୋଗ ଓ ଓୟାରଲେସ୍ ଚାର୍ଜିଂ ଭଳି ସୁବିଧା ମଧ୍ୟ ମିଳୁଛି ।
୨୦୦୦ ଟଙ୍କାରୁ କମ୍ ଦାମ୍ର ଚାହିଦା ଅଧିକ
ଇୟର ବଡ୍ସକୁ ଗ୍ରାହକମାନେ ମୁଖ୍ୟତଃ ଅନ୍ଲାଇନ୍ରେ କିଣିବାକୁ ପସନ୍ଦ କରୁଛନ୍ତି । ଏକ ସର୍ଭେରୁ ଜଣାପଡ଼ିଛି ଯେ ଲୋକମାନେ ଦୁଇ ହଜାର ଟଙ୍କାରୁ କମ୍ ଦାମ୍ରେ ମିଳୁଥିବା ଇୟର ବଡସ୍ କିଣିବାକୁ ଅଧିକ ପସନ୍ଦ କରୁଛନ୍ତି । ବଜାରରେ ୧୫ ହଜାର ଟଙ୍କାରୁ ଅଧିକ ମୂଲ୍ୟର ଇୟର୍ ବଡ୍ସ ମଧ୍ୟ ମିଳୁଛି । ଏକ ସର୍ଭେରେ ଭାଗ ନେଇଥିବା ୩୦୦୦ରୁ ଅଧିକ ଲୋକଙ୍କ ମଧ୍ୟରୁ ୫୧.୭% ଲୋକ ଦୁଇ ହଜାର ଟଙ୍କାରୁ କମ୍ ଦାମ୍ର ଇୟର୍ ବଡ୍ସ ନିଜର ପସନ୍ଦ ବୋଲି କହିଥିବା ବେଳେ ୨-୪ ହଜାର ଟଙ୍କା ମୂଲ୍ୟକୁ ୨୪.୫୦ ପ୍ରତିଶତ, ୪-୬ ହଜାର ଟଙ୍କା ଦାମ୍କୁ ୯.୫୮%, ୬-୮ ହଜାର ଟଙ୍କା ଦାମ୍କୁ ୪.୯୯%, ୮-୧୫ ହଜାର ଟଙ୍କା ଦାମ୍କୁ ୪.୪୫ ପ୍ରତିଶତ ଏବଂ ୧୫ ହଜାର ଟଙ୍କାରୁ ଅଧିକ ମୂଲ୍ୟର ଇୟର୍ ବଡ୍ସ କିଣିବାକୁ ୫.୩୨ ପ୍ରତିଶତ ଲୋକ ପସନ୍ଦ କରୁଥିବା କହିଥିଲେ ।
