ସତ୍ୟଶିଖା( ଭୁବନେଶ୍ୱର )୦୩.୦୫.୨୦୨୨ : ଆସନ୍ତା ୧୦ ତାରିଖରେ ଓଡ଼ିଶା ଉପକୂଳ ଅତିକ୍ରମ କରିବ ସମ୍ଭାବ୍ୟ ବାତ୍ୟା। ଏନେଇ ବିଭିନ୍ନ ମଡେଲ ପକ୍ଷରୁ ଭିନ୍ନଭିନ୍ନ ଆକଳନ କରାଯାଇଥିଲେ ମଧ୍ୟ ଏଯାଏ ଆଇଏମ୍ଡି ବାତ୍ୟାକୁ ନେଇ କୌଣସି ସ୍ପଷ୍ଟ ଚିତ୍ର ଆଙ୍କି ନାହିଁ। ଭାରତୀୟ ପାଣିପାଗ ବିଭାଗ ଆଜି କହିଛି ଯେ ୬ ତାରିଖରେ ଲଘୁଚାପ ସୃଷ୍ଟି ହେବ ଓ ପରବର୍ତ୍ତୀ ସମୟରେ ଏହା ଅଧିକ ଘନୀଭୂତ ହେବ। ଆଇଏମ୍ଡିର ସୂଚନା ମୁତାବକ, ଆସନ୍ତା ୪ ତାରିଖ ଆଡ଼କୁ ଦକ୍ଷିଣ ଆଣ୍ଡାମାନସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହେବ। ଏହା ପ୍ରଭାବରେ ସେହି ଅଞ୍ଚଳରେ ୬ତାରିଖ ବେଳକୁ ଏକ ଲଘୁଚାପ ସୃଷ୍ଟି ହେବ। ଲଘୁଚାପ ସୃଷ୍ଟିର ପରବର୍ତ୍ତୀ ୨୪ ଘଣ୍ଟାରେ ଏହା ଆହୁରି ଘନୀଭୂତ ହୋଇ ସ୍ପଷ୍ଟଚିହ୍ନିତ ଲଘୁଚାପରେ ପରିଣତ ହେବ। ତେବେ ଏହା ଆହୁରି କେତେ ଘନୀଭୂତ ହେବ, ବାତ୍ୟାରେ ପରିଣତ ହେବ କି ଭୀଷଣ ବାତ୍ୟାର ରୂପ ନେବ, କେଉଁ ଦିଗରେ ଗତି କରିବ ଓ କେଉଁଠାରେ ସ୍ଥଳ ଭାଗ ସ୍ପର୍ଶ କରିବ; ସେନେଇ କୌଣସି ସୂଚନା ଦିଆଯାଇନାହିଁ। ଲଘୁଚାପ ସୃଷ୍ଟି ପରେ ୭ ତାରିଖ ବେଳକୁ ଅଧିକ ସ୍ପଷ୍ଟ କହି ହେବ ବୋଲି କେନ୍ଦ୍ର ପକ୍ଷରୁ କୁହାଯାଇଛି। ବିଶିଷ୍ଟ ପାଣିପାଗ ବିଶେଷଜ୍ଞ ଶରତ ସାହୁ କହିଛନ୍ତି, ଏବେଠାରୁ ବାତ୍ୟା ଆକଳନ କରିବା ଠିକ୍ ହେବ ନାହିଁ। ଲଘୁଚାପ ସୃଷ୍ଟି ପରେ ହିଁ ଏହାର ତୀବ୍ରତା ଓ ଦିଗ ନେଇ ସ୍ପଷ୍ଟ କହି ହେବ। ତେବେ ଦକ୍ଷିଣ ଆଣ୍ଡାମାନ ସାଗରରେ ସୃଷ୍ଟି ହେବାକୁ ଥିବା ଲଘୁଚାପ ବାତ୍ୟାର ରୂପ ନେଉ କି ନନେଉ; ଓଡ଼ିଶା ଉପରେ ଏହାର ପ୍ରଭାବ ରହିବ। ଦକ୍ଷିଣ ଓଡ଼ିଶା, କେନ୍ଦ୍ରୀୟ କିମ୍ବା ଉତ୍ତର ଓଡ଼ିଶା; ଲଘୁଚାପ ଯୋଗୁଁ ଓଡ଼ିଶାରେ ପ୍ରବଳ ବର୍ଷା ହେବ। ଏପରିକି ଲଘୁଚାପ ବାତ୍ୟା ରୂପ ନେଲେ ବି ତାହା ଅଧିକ ଘନୀଭୂତ ହୋଇ ଅତିଭୀଷଣ ବାତ୍ୟାରେ ପରିଣତ ହେବାର ଆଶଙ୍କା କମ୍ ରହିଛି। ଯଦି ୯ ତାରିଖ ଆଡ଼କୁ ପାଗ ଅନୁକୂଳ ହୁଏ, ସମ୍ଭାବ୍ୟ ବାତ୍ୟା ସମୁଦ୍ରରେ ବଳ ଗୋଟାଇ ଅଧିକ ଘନୀଭୂତ ହୋଇପାରେ। ସମ୍ଭାବ୍ୟ ଲଘୁଚାପ ଅବା ସମ୍ଭାବ୍ୟ ବାତ୍ୟାରେ ପବନର ବେଗ ୧୦୦ କିମି ମଧ୍ୟରେ ରହିବ ବୋଲି ସେ ସୂଚନା ଦେଇଛନ୍ତି।
