ସତ୍ୟଶିଖା ( ନୂଆଦିଲ୍ଲୀ ) ୧୯ .୦୮.୨୦୨୦ : କେଜ୍ରିୱାଲ ସରକାର ଅନଲକ୍-3 ଅଧୀନରେ ଦିଲ୍ଲୀରେ ହୋଟେଲ ଖୋଲିବାକୁ ଅନୁମତି ଦେଇଛନ୍ତି । ତେବେ ଜିମ୍ ଖୋଲିବା ଉପରେ ପ୍ରତିବନ୍ଧକ ଜାରି ରହିବ । ସରକାର ସାପ୍ତାହିକ ବଜାରକୁ ମଧ୍ୟ ଅନୁମୋଦନ ଦେଇଛନ୍ତି । ଦିଲ୍ଲୀ ବିପର୍ଯ୍ୟୟ ପରିଚାଳନା ପ୍ରାଧିକରଣର ବୈଠକରେ ଏହି ନିଷ୍ପତ୍ତି ନିଆଯାଇଛି । ଏଠି କହିରଖୁଛୁ ଯେ କେନ୍ଦ୍ର ସରକାର ଅନଲକ୍ -3 ରେ ରିହାତି ଦେବା ପରେ କେଜ୍ରିୱାଲ ସରକାରଙ୍କ ହୋଟେଲ ଏବଂ ସାପ୍ତାହିକ ବଜାର ଖୋଲିବାକୁ ଥିବା ପ୍ରସ୍ତାବକୁ ଡେପୁଟି ଗଭର୍ଣ୍ଣର ଅନିଲ ବୈଜଲ ପ୍ରତ୍ୟାଖ୍ୟାନ କରିଥିଲେ । ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଏକ ଚିଠି ଲେଖି ଲେଫ୍ଟନାଣ୍ଟ ଗଭର୍ଣ୍ଣରଙ୍କୁ ତାଙ୍କ ନିଷ୍ପତ୍ତି ପ୍ରତ୍ୟାହାର କରିବାକୁ ନିର୍ଦ୍ଦେଶ ଦେବା ପାଇଁ ଅନୁରୋଧ ମଧ୍ୟ କରିଥିଲେ ।
ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ଅମିତ ଶାହାଙ୍କୁ ଲେଖିଥିବା ଏକ ପତ୍ରରେ କହିଥିଲେ ଯେ ଦିଲ୍ଲୀରେ କରୋନା ମାମଲା କ୍ରମାଗତ ଭାବେ ହ୍ରାସ ପାଉଛି, ପରିସ୍ଥିତି ନିୟନ୍ତ୍ରଣରେ ରହିଛି । ଯେଉଁଠାରେ ୟୁପି ଏବଂ କର୍ଣ୍ଣାଟକରେ କରୋନା ମାମଲା କ୍ରମାଗତ ଭାବେ ବଢୁଛି, ତଥାପି ସେଠାରେ ହୋଟେଲ ଏବଂ ସାପ୍ତାହିକ ବଜାର ଖୋଲା ଅଛି । ମନୀଷ ସିସୋଡିଆ କହିଛନ୍ତି ଯେ କରୋନା ନିୟନ୍ତ୍ରଣରେ ଏକ ଉତ୍ତମ କାର୍ଯ୍ୟ କରିଥିବା ରାଜ୍ୟ କାହିଁକି ଏହାର ବ୍ୟବସାୟ ବନ୍ଦ କରିବାକୁ ବାଧ୍ୟ ହେଉଛି ? ସହରର ସମସ୍ତ ବ୍ୟବସାୟିକ ସଂଗଠନ ଏବଂ ହୋଟେଲ ଆସୋସିଏସନ୍ ଯେଉଁମାନେ ଆର୍ଥିକ କ୍ଷତି ସହିଛନ୍ତି ସେମାନେ ମଧ୍ୟ ଲେଫ୍ଟ ଗଭର୍ଣ୍ଣର ଅନିଲ ବୈଜଲଙ୍କ ନିଷ୍ପତ୍ତିକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ। ସଂଗଠନ ଅନୀଲ ବୈଜଲଙ୍କୁ ଏକ ଚିଠି ଲେଖି ଦିଲ୍ଲୀରେ ହୋଟେଲ ଏବଂ ସାପ୍ତାହିକ ବଜାର ଖୋଲିବାକୁ ଦାବି କରିଥିଲେ । ଦିଲ୍ଲୀ ସରକାର ମଧ୍ୟ ଅନିଲ ବୈଜଲଙ୍କୁ ତାଙ୍କ ନିଷ୍ପତ୍ତିର ପୁନର୍ବିଚାର କରିବାକୁ ଅନୁରୋଧ କରି ଏକ ପ୍ରସ୍ତାବ ପଠାଇଥିଲେ ।
