ସତ୍ୟଶିଖା (ଭୁବନେଶ୍ୱର)୦୪.୦୧.୨୦୨୨: କରୋନା ସଂକ୍ରମଣକୁ ଦେଖି ସତର୍କ ହେଲେ କେନ୍ଦ୍ର ସରକାର । ଏଣିକି ଅଧା କର୍ମଚାରୀରେ ଚାଲିବ କେନ୍ଦ୍ର ସରକାରୀ କାର୍ଯ୍ୟାଳୟ । କରୋନା ସଂକ୍ରମିତଙ୍କ ସଂଖ୍ୟା ବଢୁଥିବାରୁ କେନ୍ଦ୍ର ସରକାର ସତର୍କ ହୋଇଛନ୍ତି । କେନ୍ଦ୍ର ସରକାରଙ୍କ ଅଧୀନରେ ଥିବା ଅଫିସଗୁଡିକ ଅଧା କର୍ମଚାରୀରେ ଚାଲିବ ବୋଲି ନିର୍ଦ୍ଦେଶ ଦିଆଯାଇଛି । ବାକି ୫୦ ପ୍ରତିଶତ କର୍ମଚାରୀ ଘରେ ରହି କାମ କରିବେ । ଜାନୁଆରୀ ୩୧ ତାରିଖ ପର୍ଯ୍ୟନ୍ତ ଏହି ନିୟମ ଅନୁସାରେ ଅଫିସ୍ ଚାଲିବ ।
ତେବେ ଅଣ୍ଡର ସେକ୍ରେଟାରୀ ଏବଂ ଏହାଠାରୁ ଉଚ୍ଚ ପଦରେ କାର୍ଯ୍ୟ କରୁଥିବା ଅଧିକାରୀମାନେ ନିୟମିତ ଅଫିସ୍ ଆସିବେ । ଭିନ୍ନକ୍ଷମ ଏବଂ ଗର୍ଭବତୀ ମହିଳାମାନେ ଅଫିସ୍ ନଆସି ଘରେ ରହି କାର୍ଯ୍ୟ କରିବେ । ଯେଉଁ ଅଧିକାରୀ ଓ କର୍ମଚାରୀମାନେ କଣ୍ଟେନମେଣ୍ଟ ବା ଅବରୋଧ ଅଞ୍ଚଳରେ ରହୁଥିବେ, ସେମାନଙ୍କୁ ଅଫିସ୍ ଆସିବାକୁ ବାରଣ କରାଯାଇଛି । ଘରେ ରହି କାର୍ଯ୍ୟ କରୁଥିବା କର୍ମଚାରୀମାନେ ଟେଲିଫୋନ୍ ଓ ଇଣ୍ଟରନେଟ୍ ମାଧ୍ୟମରେ ସବୁ ସମୟରେ ଯୋଗାଯୋଗରେ ରହିବେ । ଭିଡିଓ କନଫରେନ୍ସିଂ ଜରିଆରେ ମିଟିଂ କରାଯିବ । କାର୍ଯ୍ୟସ୍ଥଳକୁ ଠିକ୍ ଭାବେ ସାନିଟାଇଜ୍ କରିବାକୁ ନିର୍ଦ୍ଦେଶ ଦିଆଯାଇଛି ।
