ଓଡ଼ିଶା ଆସୁଛି ବାହରିନରେ ପ୍ରାଣ ହରାଇଥିବା ଓଡ଼ିଆ ପୁଅ ସୀମାଞ୍ଚଳ ରାଉତଙ୍କ ମୃତଦେହ

ସତ୍ୟଶିଖା(ଭୁବନେଶ୍ୱର ) ୧୩.୦୮ .୨୦୨୧:  ବାହାରିନରେ ପ୍ରାଣ ହରାଇଥିବା ଓଡ଼ିଆ ପ୍ରବାସୀ ଶ୍ରମିକ ସୀମାଞ୍ଚଳ ରାଉତଙ୍କ ମୃତଦେହ ଓଡ଼ିଶା ଆସୁଛି। ଅଗଷ୍ଟ ୧୫ ତାରିଖ ଦିନ ଏୟାର ଇଣ୍ଡିଆ ବିମାନ ଦ୍ୱାରା ଭୁବନେଶ୍ଵର ବିଜୁ ପଟ୍ଟନାୟକ ବିମାନବନ୍ଦରରେ ସୀମାଞ୍ଚଳଙ୍କ ମୃତଦେହ ପହଞ୍ଚିବ। ବାହାରିନ ଓଡ଼ିଆ ସମାଜର ପ୍ରତିଷ୍ଠାତା ଡକ୍ଟର ଅରୁଣ ପ୍ରହରାଜଙ୍କ ଉଦ୍ୟମ ଯୋଗୁଁ ଏହା ସମ୍ଭବ ହୋଇପାରିଛି।

ସୀମାଞ୍ଚଳ ରାଉତ ବାହରିନର ଏନ୍‌ଏସ୍‌ଏଚ୍‌ ନିଗମରେ ମେକାନିକାଲ କମ୍ପାନିରେ ଲିଡ୍‌ ମେନ ଭାବେ କାର୍ଯ୍ୟରତ ଥିଲେ। ଗତ ଜୁଲାଇ ୧୮ରେ ହଠାତ୍‌ ସୀମାଞ୍ଚଳଙ୍କ ମସ୍ତିଷ୍କରୁ ରକ୍ତଶ୍ରାବ ହୋଇଥିଲା। ସେ କୋମାକୁ ଚାଲି ଯାଇଥିଲେ। ୨୧ ଦିନର ଚିକିତ୍ସା ପରେ ଗତ ୮ ଅଗଷ୍ଟରେ ବାହାରିନ୍‌ ସଲମାନିଆ ହସ୍ପିଟାଲରେ ତାଙ୍କର ମୃତ୍ୟୁ ଘଟିଥିଲା।  ବ୍ରେନ ହାମରେଜ ଯୋଗୁଁ ତାଙ୍କର ମୃତ୍ୟୁ ହୋଇଥିବା ହସ୍ପିଟାଲ କର୍ତ୍ତୃପକ୍ଷ ସ୍ପଷ୍ଟ କରିଥିଲେ।

ଗଞ୍ଜାମ ଜିଲ୍ଲା ଖଲ୍ଲିକୋଟ ନିକଟ ତୋଟାଗାଁର ସୀମାଞ୍ଚଳ ରାଉତ। ରୋଜଗାର ପାଇଁ ବାହାରିନ ଯାଇଥିଲେ। ସେଠାରେ ତାଙ୍କ ସ୍ୱାସ୍ଥ୍ୟ ଖରାପ ହେବା ପରେ ସୀମାଞ୍ଚଳଙ୍କ ଉପଯୁକ୍ତ ଚିକତ୍ସା ପାଇଁ ବାହରିନ ଓଡ଼ିଆ ସମାଜର ପ୍ରତିଷ୍ଠାତା ଅଧ୍ୟକ୍ଷ ଡକ୍ଟର ଅରୁଣ କୁମାର ପ୍ରହରାଜ ସ୍ଥାନୀୟ ପ୍ରଶାସନ, ଭାରତୀୟ ଦୂତାବାସ, ଭାରତ ସରକାରଙ୍କ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ସୀମାଞ୍ଚଳଙ୍କ ଉପଯୁକ୍ତ ଚିକତ୍ସା ପାଇଁ ସମସ୍ତ ସହାୟତା ଯୋଗାଇ ଦେଇଥିଲେ।

ଏପରିକି ଭିଡିଓ କଲ ମାଧ୍ୟମରେ ସୀମାଞ୍ଚଳଙ୍କ ପରିବାରକୁ ତାଙ୍କ ସ୍ୱାସ୍ଥ୍ୟ ଅବସ୍ଥାର ଟିକିନିଖି ଖବର ଦେଉଥିଲେ। ସୀମାଞ୍ଚଳଙ୍କ ମରଶରୀର ଆସିବାରେ ମଧ୍ୟ ଅକ୍ଲାନ୍ତ ଉଦ୍ୟମ କରିଛନ୍ତି ଡକ୍ଟର ପ୍ରହରାଜ। ଏଥିପାଇଁ ଓଡ଼ିଶାର ଅନେକ ବ୍ୟକ୍ତି ବିଶେଷ ଓ ଅନୁଷ୍ଠାନ ତଥା ସୀମାଞ୍ଚଳଙ୍କ ପରିବାର ଡକ୍ଟର ପ୍ରହରାଜଙ୍କୁ ଧନ୍ୟବାଦ ଜଣାଇଛନ୍ତି।

‘‘ବାସ୍ତବରେ ଏହା ଏକ ଦୁର୍ଭାଗ୍ୟଜନକ ଘଟଣା। ଆମର ସର୍ବୋତ୍ତମ ପ୍ରୟାସ ପରେ ଆମେ ସୀମାଞ୍ଚଳଙ୍କ ଜୀବନ ରକ୍ଷା କରିପାରିଲୁ ନାହିଁ କିନ୍ତୁ ପ୍ରବାସୀ ଶ୍ରମିକମାନଙ୍କ କ୍ଷେତ୍ରରେ ପ୍ରଚଳିତ ବିଦେଶ ନୀତି ବିଷୟରେ ଏହା ନିଶ୍ଚିତ ଭାବେ ଏକ ଦୃଷ୍ଟି ଆକର୍ଷଣକାରୀ ପ୍ରସଙ୍ଗ। ଜନ୍ମ ମୃତ୍ୟୁ ତ ଈଶ୍ୱରଙ୍କ ହାତରେ କିନ୍ତୁ ବିଦେଶ ମାଟିରେ ପ୍ରବାସୀ ଶ୍ରମିକଙ୍କ ଅଧିକାର ଏବଂ ଜୀବନ ସୁରକ୍ଷା ପାଇଁ ରାଜ୍ୟ ଏବଂ କେନ୍ଦ୍ର ସରକାର ନିଜ ନିଜ ସ୍ତରରେ ତୁରନ୍ତ ପ୍ରବାସୀ ସେଲ୍ ଗଠନ କରନ୍ତୁ ଏବଂ ସମଗ୍ର ବିଶ୍ୱରେ ଥିବା ପ୍ରବାସୀ ଓଡିଆ ମାନଙ୍କର ବିବରଣୀ ଭିତ୍ତି ପ୍ରସ୍ତୁତ କରନ୍ତୁ’’, କହିଛନ୍ତି ଡକ୍ଟର ପ୍ରହରାଜ।

ସେ ଆହୁରିମଧ୍ୟ କହିଛନ୍ତି ଯେ, ପ୍ରତ୍ୟେକ ଦେଶରେ ପ୍ରବାସୀ ସଂଯୋଜକ ନିଯୁକ୍ତ କରାଯାଉ । ସେହିପରି ପ୍ରବାସୀ ଶ୍ରମିକମାନଙ୍କର ଅଧିକାର ରକ୍ଷା କରିବା ପାଇଁ ବାଧ୍ୟତା ମୂଳକ ପଞ୍ଜୀକରଣ କରିବା ସହିତ ପ୍ରତ୍ୟେକ ଦେଶରେ ରାଜ୍ୟ ଏବଂ କେନ୍ଦ୍ର ସରକାର ଏବଂ ଭାରତୀୟ ଦୂତାବାସ ସହିତ ବିଦେଶୀ ନିଯୁକ୍ତି ଚୁକ୍ତି ପଞ୍ଜିକରଣ ବାଧ୍ୟତାମୂଳକ କରାଯାଉ।

ଏହିପରି ଜରୁରୀକାଳୀନ ପରିସ୍ଥିତିକୁ ପରିଚାଳନା କରିବା ପାଇଁ ଭାରତୀୟ ଦୂତାବାସମାନଙ୍କୁ କେନ୍ଦ୍ର ସରକାର ଦ୍ୱାରା ବିଶେଷ ଅଧିକାର ଦିଆଯାଉ ବୋଲି ଡକ୍ଟର ପ୍ରହରାଜ ଅନୁରୋଧ କରିଛନ୍ତି।

ବିଦେଶରେ କାର୍ଯ୍ୟ କରୁଥିବା ପ୍ରବାସୀ ଶ୍ରମିକ ଓ ଅଧିକାରୀମାନେ ପରସ୍ପର ସହଯୋଗ ମାନସିକତା ରଖିଲେ ଆମର ସାମାଜିକ ଜୀବନ କେବେ ବି ବିପର୍ଯ୍ୟସ୍ତ ହେବ ନାହିଁ ବୋଲି ଡକ୍ଟର ପ୍ରହରାଜ କହିଛନ୍ତି।