ବୋର୍ଡ ପରୀକ୍ଷା ବାତିଲ ହେଲା ଫେବ୍ରୁଆରିରେ

ସତ୍ୟଶିଖା (ଭୁବନେଶ୍ୱର) ୨୩ /୧୨/୨୦୨୦ : ଫେବ୍ରୁଆରିରେ ହେବନି ବୋର୍ଡ ପରୀକ୍ଷା। କୋଭିଡ୍‌-୧୯ ସଂକ୍ରମଣକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି । ‌କେବେ ପରୀକ୍ଷା କରାଯିବ, ସେନେଇ ଖୁବ୍‌ଶୀଘ୍ର ତାରିଖ ଘୋଷଣା ହେବ ବୋଲି କେନ୍ଦ୍ର ଶିକ୍ଷା ମନ୍ତ୍ରୀ ରମେଶ ପୋଖରିଆଲ୍‌ ‘ନିଶଙ୍କ’ ଆଜି ଟୁଇଟ୍ କରି ସୂଚନା ଦେଇଛନ୍ତି । କେନ୍ଦ୍ରମନ୍ତ୍ରୀଙ୍କ ଏଭଳି ଘୋଷଣା ପରେ ଦେଶର ୨୫ ଲକ୍ଷରୁ ଅଧିକ ଛାତ୍ରଛାତ୍ରୀଙ୍କୁ ଆଶ୍ୱସ୍ତି ମିଳିଛି । ମାର୍ଚ୍ଚ କିମ୍ବା ଏପ୍ରିଲ ମାସରେ ପରୀକ୍ଷା ହୋଇପାରେ ବୋଲି ଅନୁମାନ କରାଯାଉଛି ।ମନ୍ତ୍ରୀ ଶ୍ରୀ ପୋଖରିଆଲ୍‌ ଆଜି ଦେଶର ଶିକ୍ଷକ/ଶିକ୍ଷୟିତ୍ରୀଙ୍କୁ ଉଦ୍‌ବୋଧନ ଦେବା ସହ ସେମାନଙ୍କ ବିଭିନ୍ନ ପ୍ରଶ୍ନର ଉତ୍ତର ଦେଇ କହିଲେ ବୋର୍ଡ ପରୀକ୍ଷା ତାରିଖ ଉପରେ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇ ନାହିଁ । ସିବିଏସ୍‌ଇ, ସିଆଇଏସ୍‌ସିଇ ବୋର୍ଡ ଦ୍ୱାରା ପରିଚାଳିତ ଦଶମ ଓ ଦ୍ୱାଦଶ ଶ୍ରେଣୀ ପରୀକ୍ଷା ଏବେ ସ୍ଥଗିତ ରଖିବା ଲାଗି ଅନେକ ଛାତ୍ରଛାତ୍ରୀ, ଶିକ୍ଷକ/ଶିକ୍ଷୟିତ୍ରୀ ଅନୁରୋଧ କରିଛନ୍ତି । ସେମାନଙ୍କଠାରୁ ପ୍ରସ୍ତାବ ପାଇବା ପରେ ବୋର୍ଡ ପରୀକ୍ଷା ତାରିଖ ସ୍ଥିର କରିବା ପାଇଁ ହିତାଧିକାରୀଙ୍କ ସହ ପରାମର୍ଶ ଚାଲିଛି । ଯଦି ଛାତ୍ରଛାତ୍ରୀ ପରୀକ୍ଷା ପୂର୍ବରୁ କ୍ଲାସରେ ପ୍ରାକ୍ଟିକାଲ୍ କରିପାରିବେ ନାହିଁ, ତେବେ ପ୍ରାକ୍ଟିକାଲ୍ ପରୀକ୍ଷାର ବିକଳ୍ପ ଅନୁସନ୍ଧାନ କରାଯିବ । ନିୟମ ଅନୁଯାୟୀ ସିବିଏସ୍‌ଇ ପରୀକ୍ଷାରେ ଇଣ୍ଟରନାଲ ଚଏସ୍‌ ରହିବ । ହ୍ରାସ ହୋଇଥିବା ୩୦% ସିଲାବସ୍‌ ଅନୁଯାୟୀ, ସିବିଏସ୍ଇ ବୋର୍ଡ ପରୀକ୍ଷା ଅନୁଷ୍ଠିତ ହେବ ।

କେତେକ ରାଜ୍ୟ ମଧ୍ୟ ସମାନ ପଦକ୍ଷେପ ଘୋଷଣା କରିଥିବା ବେଳେ ଅନ୍ୟମାନେ ମଧ୍ୟ ତାହା କରିବେ ବୋଲି ମନ୍ତ୍ରୀ ଆଶାପୋଷଣ କରିଥିଲେ । ଶିକ୍ଷକମାନଙ୍କ ପ୍ରଶ୍ନର ଉତ୍ତରରେ ସେ କହିଲେ, ଇଣ୍ଟରନେଟ୍‌ ଅଭାବ ହେତୁ ଦେଶର ଅନେକ ଦୁର୍ଗମ ଅଞ୍ଚଳର ଶିକ୍ଷକମାନେ ଶିକ୍ଷାଦାନ କରିବାରେ ଅସୁବିଧାର ସମ୍ମୁଖୀନ ହୋଇଛନ୍ତି । ଯେତେବେଳେ ଅନ୍‌ଲାଇନ୍‌ କ୍ଲାସ୍ ହେଉଛି, କାହିଁକି ଅନ୍‌ଲାଇନରେ ପରୀକ୍ଷା ହୋଇପାରିବ ନାହିଁ ବୋଲି ଏକ ପ୍ରଶ୍ନର ଉତ୍ତରରେ ମନ୍ତ୍ରୀ କହିଲେ, ସବୁ ପ୍ରକାର ସୁବିଧା ପରେ ବି କିଛି ଛାତ୍ରଛାତ୍ରୀ ଅଛନ୍ତି, ଯେଉଁମାନେ ଶିକ୍ଷା ଲାଗି ସମାନ ସୁବିଧା ପାଇ ନାହାନ୍ତି । ଯେତେବେଳେ ଆମେ ପିଲାଙ୍କୁ ଶିକ୍ଷା ଦେବା ପାଇଁ ଅନନ୍ୟ ପଦ୍ଧତି ବ୍ୟବହାର କରିଛୁ ସେତେବେଳେ ପରୀକ୍ଷା ପାଇଁ ଏପରି ପଦ୍ଧତି ରହିବା ଠିକ୍ ହୋଇ ନପାରେ । ଅନେକ ଦେଶ ଗୋଟିଏ ଶିକ୍ଷାବର୍ଷକୁ ବାତିଲ କରିଛନ୍ତି । କିନ୍ତୁ ଆମର ଶିକ୍ଷକମାନେ କଠିନ ପରିଶ୍ରମ ଜାରି ରଖିଛନ୍ତି । କୌଣସି ପ୍ରାର୍ଥୀଙ୍କୁ ସେମାନଙ୍କ ଶିକ୍ଷାବର୍ଷକୁ ନଷ୍ଟ କରିବାକୁ ଦେଇ ନାହାନ୍ତି । ଦେଶରେ ୩୩ କୋଟି ଛାତ୍ରଙ୍କୁ ତାଲିମ ଦେବା ପାଇଁ ଶିକ୍ଷକମାନେ କରୋନା ଯୋଦ୍ଧାଠାରୁ କମ୍ ନୁହଁନ୍ତି ବୋଲି ମନ୍ତ୍ରୀ କହିଛନ୍ତି ।