ସତ୍ୟଶିଖା ୩୧.୦୭.୨୦୨୦( ନୂଆଦିଲ୍ଲୀ ) : ବନ୍ଦେ ଭାରତ ମିଶନର ପଞ୍ଚମ ପର୍ଯ୍ୟାୟ ଆସନ୍ତାକାଲି ଅଗଷ୍ଟ 1 ତାରିଖରୁ ଆରମ୍ଭ ହେବ । ବିଦେଶରେ ଫସି ରହିଥିବା ଭାରତୀୟମାନଙ୍କୁ ଫେରାଇ ଆଣିବା ପାଇଁ ପୁଣି ଥରେ କାର୍ଯ୍ୟ ଆରମ୍ଭ ହେବ । ଏହା ମିଶନ 31 ଅଗଷ୍ଟ ପର୍ଯ୍ୟନ୍ତ ଜାରି ରହିବ । ସମୁଦାୟ 792ଟି ବିମାନ ଏଥିପାଇଁ ନିୟୋଜିତ ହେବେ । ଯେଉଁଥିରେ 692ଟି ଆନ୍ତର୍ଜାତୀୟ ବିମାନ ଏବଂ 100 ଟି ଘରୋଇ ବିମାନ ଅନ୍ତର୍ଭୂକ୍ତ ହୋଇଛି । ଏହି ପର୍ଯ୍ୟୟରେ 23ଟି ଦେଶରୁ ଭାରତୀୟଙ୍କୁ ଫେରାଇ ଆଣିବା ପାଇଁ ଧାର୍ଯ୍ୟ କରାଯାଇଛି । ଏଥିମଧ୍ୟରେ ଆମେରିକା, ବ୍ରିଟେନ, ଜର୍ମାନୀ, ଫ୍ରାନ୍ସ, ଅଷ୍ଟ୍ରେଲିଆ, ନ୍ୟୁଜିଲ୍ୟାଣ୍ଡ, ମାଲେସିଆ, ଫିଲିପାଇନ୍ସ, ସିଙ୍ଗାପୁର, ବାଂଲାଦେଶ, ମିଆଁମାର, ଥାଇଲ୍ୟାଣ୍ଡ, ଚୀନ୍, ଇସ୍ରାଏଲ୍, କାନାଡ଼ା ଏବଂ କିର୍ଗିଜସ୍ଥାନ ଅନ୍ତର୍ଭୁକ୍ତ ।
ଏହି ବିମାନଗୁଡ଼ିକ ଭାରତର 21 ଟି ବିଭିନ୍ନ ବିମାନବନ୍ଦ ଉଡାଣ ଭରିବ । ଏହି ପର୍ଯ୍ୟାୟରେ ବିଦେଶରେ ଫସି ରହିଥିବା ସମୁଦାୟ ଏକ ଲକ୍ଷ ତିରିଶ ହଜାର ଭାରତୀୟଙ୍କୁ ଦେଶକୁ ଫେରାଇ ଅଣାଯିବ । ଏ ନେଇ ବେସାମରିକ ବିମାନ ଚଳାଚଳ ମନ୍ତ୍ରୀ ହାର୍ଦ୍ଦିକ ସିଂ ପୂର୍ବରୁ ସୂଚନା ଦେଇଥିଲେ । ପୁର୍ବ ମିଶନ ପରି ଏଥର ମଧ୍ୟ ଅସୁବିଧାରେ ଫସି ରହିଥିବା ଭାରତୀୟମାନଙ୍କୁ ଯାତ୍ରା ପାଇଁ ପ୍ରାଥମିକତା ଦିଆଯିବ ।
ମିଶନ ଅଧୀନରେ ବିଭିନ୍ନ ପର୍ଯ୍ୟୟରେ 6 ମଇରୁ ଏ ପର୍ଯ୍ୟନ୍ତ 8 ଲକ୍ଷ 78 ହଜାର 921 ଭାରତୀୟ ନାଗରିକ ଫେରି ଆସିଛନ୍ତି । ସେଥିମଧ୍ୟରୁ ଏକ ଲକ୍ଷ 7 ହଜାର 452 ଭାରତୀୟ ନେପାଳ, ଭୁଟାନ, ମିଆଁମାର, ପାକିସ୍ଥାନ ଏବଂ ବାଂଲାଦେଶରୁ ଭୂମି ସୀମା ଦେଇ ଫେରିଛନ୍ତି ।
