ସତ୍ୟଶିଖା( ଭୁବନେଶ୍ୱର )୨୬.୧୦.୨୦୨୨: ଚିଙ୍ଗୁଡି ଖାଇବାକୁ ପ୍ରାୟ ସାନଠୁ ବଡ ସମସ୍ତେ ଭଲ ପାଆନ୍ତି । କାରଣ ଏଥିରେ ଅନ୍ୟ ମାଛ ପରି କଣ୍ଟା ନଥାଏ । ଏଥିପାଇଁ ଏହା ଛୋଟ ପିଲାମାନେ ମଧ୍ୟ ଖୁସିରେ ଖାଇଥାନ୍ତି । ଚିଙ୍ଗୁଡିକୁ ନେଇ ଆମେ ବିଭିନ୍ନ ପ୍ରକାର ବଞ୍ଜନ ତିଆରି କରିଥାଉ । ଯେମିତିକି ଚିଙ୍ଗୁଡି ତରକାରୀ, ଚିଙ୍ଗୁଡି ବରା, ଚିଙ୍ଗୁଡି ଛେଚା, ପୋଇ ଚିଙ୍ଗୁଡି,ଚିଙ୍ଗୁଡି ଡାଲମା, ମଲାଇ ଚିଙ୍ଗୁଡି, ଚିଙ୍ଗୁଡି ବଟର ମସାଲା, କୋବି ଚିଙ୍ଗୁଡି, ଚିଲ୍ଲି ଚିଙ୍ଗୁଡି ଇତ୍ୟାଦି । ଏଥିରୁ ଚିଙ୍ଗୁଡି ଡାଲମା ଏକ ଟେଷ୍ଟି ରେସିପି । ଆସନ୍ତୁ ଜାଣିବା କିପରି ପ୍ରସ୍ତୁତି କରିବା ଚିଙ୍ଗୁଡି ଡାଲମା ।ଆବଶ୍ୟକୀୟ ସାମଗ୍ରୀ:
ହରଡ଼ ଡାଲି, ଚିଙ୍ଗୁଡ଼ି, କଖାରୁ, କଞ୍ଚା କଦଳୀ, ଆଳୁ, ଫୁଲକୋବି, ଟମାଟୋ, ପିଆଜ଼, ରସୁଣ,
ଅଦା, ପଞ୍ଚୁ ଫୁଟଣ, ଶୁଖିଲା ଲଙ୍କା, ଅଳେଇଚ, ଡାଲଚିନ, ତେଜ ପତ୍ର, ଗୋଟା ଜିରା, ହଳଦୀ ଗୁଣ୍ଡ, ଜିରା ଗୁଣ୍ଡ, ଲଙ୍କା ଗୁଣ୍ଡ, ତେଲ,
ଧଣିଆ ପତ୍ର, ଲୁଣ ।
ପ୍ରସ୍ତୁତି ପ୍ରଣାଳୀ-
ଚିଙ୍ଗୁଡ଼ିରୁ ଚୋପା ଛଡ଼ାଇ ଭଲ ଭାବେ ଧୋଇ ଦିଅନ୍ତୁ। ଏହା ପରେ ଏଥିରେ ଲୁଣ ଓ ହଳଦୀ ଦେଇ ଗୋଳେଇ ଦିଅନ୍ତୁ ଏବଂ ଏହାକୁ କିଛି ସମୟ ସେମିତି ଛାଡ଼ି ଦିଅନ୍ତୁ। ତା’ଭିତରେ ଡାଲମା ପାଇଁ ଆବଶ୍ୟକ ପରିବା କାଟି ଦିଅନ୍ତୁ। ପରିବା କଟା ସରିବା ପରେ ଚିଙ୍ଗୁଡ଼ିକୁ କଡ଼େଇରେ ଭାଜି ଦିଅନ୍ତୁ। ଏ କାମ ସରିବା ପରେ ପ୍ରେସର କୁକରରେ ଆବଶ୍ୟକ ଅନୁସାରେ ପାଣି ଦେଇ ସେଥିରେ ଡାଲି, କଟା ଫୁଲ କୋବି, ବୋଇତି କଖାରୁ, ଆଳୁ, ଟମାଟୋ, କଞ୍ଚା କଦଳୀ, ଲୁଣ ଓ ହଳଦୀ ଦେଇ ଗ୍ୟାସ୍ ଚୁଲିରେ ବସାନ୍ତୁ। ତିନୋଟି ସିଟି ମାରିଲେ ଗ୍ୟାସ୍ ବନ୍ଦ କରି ଦିଅନ୍ତୁ।
ଏବେ ପିଆଜ, ଅଦା, ରସୁଣ, ଶୁଖିଲା ଲଙ୍କା, ଡାଲଚିନି ଆଉ ଅଳେଇଚକୁ ବାଟି ପେଷ୍ଟ ବନାନ୍ତୁ। ଏହା ପରେ କଡ଼େଇକୁ ଚୁଲିରେ ବସାନ୍ତୁ। ଏଥିରେ ତେଲ ପକାନ୍ତୁ। ତେଲ ଗରମ ହୋଇ ଆସିଲେ ତେଜ ପତ୍ର ଓ ଫୁଟଣ ପକାନ୍ତୁ। ଏହା ପରେ ମସଲା ପେଷ୍ଟ ପକାଇ କଷନ୍ତୁ। ଅଳ୍ପ ସମୟ ପରେ ଏଥିରେ ଛୋଟ ଛୋଟ କରି କଟାଯାଇଥିବା ଟମାଟୋ ଖଣ୍ଡଗୁଡ଼ିକୁ ପକାନ୍ତୁ। ଅଳ୍ପ କଷି ସାରିଲା ପରେ ଭଜା ଚିଙ୍ଗୁଡ଼ିକୁ ସେଥିରେ ପକାନ୍ତୁ ଓ ଦୁଇରୁ ତିନି ମିନିଟ୍ କଷନ୍ତୁ। ପରେ କୁକରରେ ଥିବା ଡାଲି ଓ ପରିବା ସିଝାକୁ କଡ଼େଇ ପକାଇ ୧୦ ମିନିଟ୍ ଫୁଟାନ୍ତୁ। ଶେଷରେ ଧନିଆ ପତ୍ର ଓ ଜିରା-ଲଙ୍କା ଗୁଣ୍ଡ ଦିଅନ୍ତୁ । ପ୍ରସ୍ତୁତ ହୋଇଗଲା ଚିଙ୍ଗୁଡ଼ି ଡାଲମା। ଏହାକୁ ଭାତ କିମ୍ବା ରୁଟି ସାଙ୍ଗରେ ଖାଆନ୍ତୁ । ଦେଖିବେ ବହୁତ ସୁଆଦିଆ ଲାଗିବ ।
