ନୂଆଦିଲ୍ଲୀ: କରୋନା ପାଇଁ ଜାରି ହୋଇଥିବା ଲକଡାଉନ ଯୋଗୁ ଲୋକମାନେ ଗୋଟିଏ ସ୍ଥାନରେ ଫସି ରହିଛନ୍ତି। ଏହି କାରଣରୁ ଗରିବ ଓ ଦିନ ମଜୁରିଆମାନେ ଖାଇବାକୁ ପାଉନାହାନ୍ତି। ଏପରି କି ରାସନକାର୍ଡ ଥିବା ଲୋକମାନେ ମଧ୍ୟ ଠିକ୍ ଭାବେ ସାମଗ୍ରୀ ପାଇ ପାରୁନାହାନ୍ତି।
ଯେଉଁମାନଙ୍କର ରାସନ କାର୍ଡ ଅଛି, ସେମାନେ ନିଜ ଅଞ୍ଚଳରୁ ଦୂରରେ ରହିଥିବାରୁ ସରକାରଙ୍କ ସାମଗ୍ରୀ ମଧ୍ୟ ପାଇ ପାରୁନାହାନ୍ତି। ଏହାକୁ ଦୃଷ୍ଟିରେ ରଖି ସୁପ୍ରିମକୋର୍ଟ ଗୋଟିଏ ଦେଶ, ଗୋଟିଏ ରାସନ କାର୍ଡ ନୀତିକୁ ଅସ୍ଥାୟୀ ଭାବେ ଲାଗୁ କରିବାକୁ କେନ୍ଦ୍ର ସରକାରଙ୍କୁ ପରାମର୍ଶ ଦେଇଛନ୍ତି।
ଆହୁରି ପଢ଼ନ୍ତୁ
ଏହାଦ୍ୱାରା ଲୋକମାନେ ଯେକୌଣସି ସ୍ଥାନରୁ ମଧ୍ୟ ରାସନ ସାମଗ୍ରୀ ପାଇପାରିବେ। କେନ୍ଦ୍ର ସରକାର ପୂର୍ବରୁ ବି ଗୋଟିଏ ଦେଶ ଗୋଟିଏ ରାସନ ବ୍ୟବସ୍ଥା ଲାଗୁ କରିବାକୁ ଚିନ୍ତା କରୁଛନ୍ତି। ଜୁନ ମାସରୁ ଏହା ପରୀକ୍ଷା ମୂଳକ ଭାବେ ଆରମ୍ଭ କରାଯିବ। ହେଲେ ଲକଡାଉନ ବେଳେ ଏହାର ଆବଶ୍ୟକତା ଅଧିକ ଥିବାରୁ ସୁପ୍ରିମକୋର୍ଟ ତତ୍କାଳ ଭାବେ ଏହାକୁ ଲାଗୁ କରିବା ଉପରେ ଗୁରୁତ୍ୱ ଦେଇଛନ୍ତି।
ସୁପ୍ରିମକୋର୍ଟ ବିଚାରପତି ଜଷ୍ଟିସ ଏନଭି ରମନ୍ନା, ଜଷ୍ଟିସ ସଞ୍ଜୟ କିଷନ କାଉଲ ଓ ଜଷ୍ଟିସ ବିଆର ଗାଭାଇଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ଆମେ କେନ୍ଦ୍ର ସରକାରଙ୍କୁ ଗୋଟିଏ ଦେଶ ଓ ଗୋଟିଏ ରାସନ କାର୍ଡ ନୀତି ଆପଣାଇବାକୁ ପରାମର୍ଶ ଦେଉଛୁ। ସରକାର ଏହାକୁ ତତ୍କାଳ ଭାବେ କେନ୍ଦ୍ର ସରକାର ଏହାକୁ ଲାଗୁ କରିପାରିବେ କି ନାହିଁ, ତା’ର ବିଚାର କରନ୍ତୁ।
ବର୍ତ୍ତମାନ ସ୍ଥିତିରେ ଏହି ନୀତି ଆପଣାଇବା ଅଧିକ ଜରୁରୀ। କାରଣ ଏହାଦ୍ୱାରା ଆର୍ଥିକ ସ୍ତରରେ ପଛୁଆ ଥିଲା ଲୋକ ଓ ପ୍ରବାସୀ ଶ୍ରମିକମାନେ ନିଜ ରାସନ କାର୍ଡ ବଳରେ ଯେ କୌଣସି ସ୍ଥାନରୁ ବି ସରକାରଙ୍କ ସବସିଡି ସାମଗ୍ରୀ ପାଇପାରିବେ ବୋଲି ଖଣ୍ଡପୀଠ କହିଛନ୍ତି।
