ସତ୍ୟଶିଖା(ଭୁବନେଶ୍ୱର) ୧୮.୧୨.୨୦୨୧: ରାଜ୍ୟରେ ଏକକାଳୀନ ୬ ହଜାର ୧୩୧ ଶିକ୍ଷକ ଓ ଶିକ୍ଷୟିତ୍ରୀଙ୍କୁ ନିଯୁକ୍ତି ମିଳିଥିବା ବେଳେ ଦ୍ଵିତୀୟ ପର୍ୟ୍ୟାୟ ପ୍ରକ୍ରିୟା ପାଇଁ ପ୍ରସ୍ତୁତି ଚାଲିଛି। ଅନ୍ୟପକ୍ଷରେ ବିଭିନ୍ନ ଜିଲ୍ଲାରେ ଜାଲ୍ ପ୍ରମାଣପତ୍ର ଦେଇ ନିଯୁକ୍ତି ପାଇଥିବା ଶିକ୍ଷକ ଓ ଶିକ୍ଷୟିତ୍ରୀଙ୍କ ବିରୋଧରେ କଡ଼ା କାର୍ୟ୍ୟାନୁଷ୍ଠାନ ନେବାକୁ ସୁପାରିସ କରିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ। ଏନେଇ ସମସ୍ତ ନିର୍ଦ୍ଦେଶକ, ଜିଲ୍ଲା ଶିକ୍ଷା ଅଧିକାରୀ(ଡିଇଓ), ବ୍ଲକ ଶିକ୍ଷା ଅଧିକାରୀ(ବିଇଓ)ଙ୍କୁ ବିଭାଗ ପକ୍ଷରୁ କଡ଼ା ନିର୍ଦ୍ଦେଶ ଦିଆଯାଇଛି। ଏନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁ ଚିଠି ଲେଖି ଅବଗତ କରାଇଛନ୍ତି। ତୁରନ୍ତ ନକଲି ଶିକ୍ଷକ ଓ ଶିକ୍ଷୟିତ୍ରୀଙ୍କୁ ଧରି ସେମାନଙ୍କ ବିରୋଧରେ ଶୃଙ୍ଖଳାଗତ କାର୍ୟ୍ୟାନୁଷ୍ଠାନ ସହ ପୁଲିସରେ ଅଭିଯୋଗ କରିବାକୁ କୁହାଯାଇଛି।
ଚିଠିରେ ଉେଲ୍ଲଖ କରିଛନ୍ତି ଯେ, କୌଣସି ବ୍ୟକ୍ତି କିମ୍ବା ଅଧିକାରୀଙ୍କଠାରୁ ନକଲି ପ୍ରମାଣପତ୍ର ଦାଖଲ ସମ୍ବନ୍ଧରେ ଅଭିଯୋଗ ମିଳିବା ମାତ୍ରେ ଅନୁସନ୍ଧାନ କରିବେ ଶିକ୍ଷା ଅଧିକାରୀ। କୌଣସି ନକଲି ପ୍ରମାଣପତ୍ର ଦାଖଲ କରିଥିବା ସ୍ଥାୟୀ, ଅସ୍ଥାୟୀ ଶିକ୍ଷକ ଓ ଶିକ୍ଷୟିତ୍ରୀଙ୍କୁ ତୁରନ୍ତ ଚିହ୍ନଟ କରିବେ। ସେମାନଙ୍କୁ ଚିହ୍ନଟ କରିବା ପରେ ବିଭାଗର ନିୟମ ଅନୁସାରେ ଶୃଙ୍ଖଳାଗତ କାର୍ୟ୍ୟାନୁଷ୍ଠାନ ନେବା ସହ ତାଙ୍କ ବିରୋଧରେ ଥାନରେ ଲିଖିତ ଅଭିଯୋଗ କରିବାକୁ କୁହାଯାଇଛି। ଯେଉଁ ଅଧିକାରୀ ଶିକ୍ଷକଙ୍କ ଏପରି ବେଆଇନ କାର୍ୟ୍ୟକଳାପରେ ସଂପୃକ୍ତି ଥିବେ ସେମାନଙ୍କ ବିରୋଧରେ ମଧ୍ୟ କାର୍ୟ୍ୟାନୁଷ୍ଠାନ ନିଆଯିବ।
ନକଲି ସାର୍ଟିଫିକେଟ୍ ଆଧାରରେ ନିଯୁକ୍ତି ସହିତ ଜଡିତ ମାମଲା ଗୁଡ଼ିକରେ ଶୃଙ୍ଖଳାଗତ ପ୍ରକ୍ରିୟା ଯଥେଷ୍ଟ ସମୟ ନେଉଛି। ତେଣୁ ନକଲି ସାର୍ଟିଫିକେଟ୍ ଆଧାରରେ ଚାକିରି ପାଇଥିବା ବ୍ୟକ୍ତିଙ୍କୁ ତୁରନ୍ତ ଅପସାରଣ/ ବରଖାସ୍ତ କରିବା ଦରକାର। ନକଲି ପ୍ରମାଣପତ୍ର ଦେଇଥିବା ଶିକ୍ଷକଙ୍କର ଧାର୍ୟ୍ୟ ସମୟସୀମା ମଧ୍ୟରେ ଯାଞ୍ଚ ପ୍ରକ୍ରିୟା ସାରିବାକୁ କୁହାଯାଇଛି। ଯାଞ୍ଚ ପ୍ରକ୍ରିୟା ବିଳମ୍ବ ହେବା ଦ୍ଵାରା ନକଲି ପ୍ରମାଣପତ୍ର ଆଧାରରେ ନିଯୁକ୍ତି ପାଇଥିବା ଅସାଧୁ ବ୍ୟକ୍ତି ସେବାରେ ଅଧିକ ଦିନ ରହୁଛନ୍ତି। ଏଥିପତ୍ରି ଶିକ୍ଷା ଅଧିକାରୀ ସ୍ଵତନ୍ତ୍ର ଧ୍ୟାନ ଦେବେ। ନକଲି ସାର୍ଟିଫିକେଟ୍ ମାମଲା ପରିଚାଳନା ନେଇ ବିଭାଗ ପକ୍ଷରୁ ସ୍ଵତନ୍ତ୍ର ନିୟମାବଳୀ ଜାରି କରାଯାଇଛି। ୧୫ ସୂତ୍ରୀ ନିୟମାବଳୀ ଆଧାରରେ ପଦକ୍ଷେପ ନେବେ ନିର୍ଦ୍ଦେଶକ ଓ ଶିକ୍ଷା ଅଧିକାରୀ।
ନକଲି ପ୍ରମାଣପତ୍ର ଦାଖଲ ସମ୍ବନ୍ଧରେ ଜନସାଧାରଣଙ୍କ ଠାରୁ କିମ୍ବା ଅଧିକାରୀଙ୍କଠାରୁ ସୂଚନା ପାଇବା ମାତ୍ରେ ବିଇଓ, ଡିଇଓ ଓ ନିର୍ଦେଶକ ଅନୁସନ୍ଧାନ ଆରମ୍ଭ କରିବେ। ସଂପୃକ୍ତ ଶିକ୍ଷକଙ୍କର ତୁରନ୍ତ ପାଠ ପଢିଥିବା ପରିଷଦ(ବୋର୍ଡ) ଓ ବିଶ୍ଵବିଦ୍ୟାଳୟରୁ ସାର୍ଟିଫିକେଟ(ପ୍ରମାଣପତ୍ର) ଯାଞ୍ଚ କରାଯିବ। ଏନେଇ ଯାହା ଖର୍ଚ୍ଚ ହେବ ତାହା ସମଗ୍ର ଶିକ୍ଷା ପାଣ୍ଠିରୁ ଭରଣା କରାଯିବ। ଆବଶ୍ୟକ ସ୍ଥଳେ ଏହି ପ୍ରକ୍ରିୟା ପାଇଁ ଜଣେ ଅଧିକାରୀଙ୍କୁ ନିଯୁକ୍ତି କରାଯାଇପାରିବ। ଯଦି ଅଭିଯୋଗ ହୋଇଥିବା ଶିକ୍ଷକଙ୍କ ପ୍ରମାଣପତ୍ର ସଠିକ୍ ଥାଏ ତେବେ ଉକ୍ତ ନଥି(ଫାଇଲ)କୁ ତୁରନ୍ତ ବନ୍ଦ କରାଯିବ।
ଯଦି ସାର୍ଟିଫିକେଟ୍ ଜାଲ ବୋଲି ଜଣାପଡେ, ତେବେ ନିୟମ ଅନୁଯାୟୀ ସଂପୃକ୍ତ ଶିକ୍ଷକ/କର୍ମଚାରୀଙ୍କ ବିରୋଧରେ ଶୃଙ୍ଖଳାଗତ ପ୍ରକ୍ରିୟା ଆରମ୍ଭ କରିବା ପାଇଁ ଗୋଟିଏ କେସ୍ ରେକର୍ଡ ଖୋଲାଯିବ।
