ସତ୍ୟଶିଖା( ଭୁବନେଶ୍ୱର )୨୯.୦୭ . ୨୦୨୨: ବାଘସଙ୍କଟ ଦୂର କରିବାକୁ ନନ୍ଦନକାନନ ପ୍ରାଣୀ ଉଦ୍ୟାନର ନୂଆ ଯୋଜନା । ଚିଡିଆ ଖାନାରେ ଜନ୍ମିତ ବାଘକୁ ହିଂସ୍ର କରି ଜଙ୍ଗଲରେ ଛାଡିବାକୁ ଯୋଜନା ।ଏ ନେଇ ଖୁବଶୀଘ୍ର ନୂଆ ଷ୍ଟଡି ହେବ କହିଲେ ନନ୍ଦନକାନନ ନିର୍ଦ୍ଦେଶକ । ବେଙ୍ଗଲୁରୁର ପ୍ରାଣୀ ବିଜ୍ଞାନ ଜାତୀୟ କେନ୍ଦ୍ର ସହ ମିଶି ଷ୍ଟଡି ହେବ ।ଏଥିରେ ଚିଡିଆଖାନା ବାଘ ମାନଙ୍କ ଜେନେଟିକ ଷ୍ଟଡି କରାଯିବ । ଥରେ ଜେନେଟିକ ଷ୍ଟଡି ଆରମ୍ଭ ହେଲେ ୬ ମାସ ରୁ ବର୍ଷେ ଭିତରେ ରେଜଲ୍ଟ । ଏହା ପରେ ଜଙ୍ଗଲୀ ବାଘ ବ୍ରିଡିଂ କରାଯାଇ ବାଘ ସଙ୍କଟ ଦୂର କରାଯିବ ।
ସେପଟେ ଆଜି ହେଉଛି ବ୍ୟାଘ୍ର ଦିବସ । ନନ୍ଦନକାନନ ପ୍ରାଣୀ ଉଦ୍ୟାନ ବାଘଙ୍କ ଭୂସ୍ୱର୍ଗ । ଏଠାରେ ବାଘ ପ୍ରଜନନ କରାଯିବା ସହିତ ଏଠାରେ ଧଳା, ସାଧାରଣ ରଙ୍ଗ ଓ ମେଲନାଷ୍ଟିକ ପ୍ରଜାତିର ବାଘ-ବାଘୁଣୀ ଅଛନ୍ତି । ବଡ଼ କଥା ହେଲା ଏତେ ପ୍ରଜାତିର ବାଘ ନନ୍ଦନକାନନ ବ୍ୟତୀତ ବିଶ୍ୱର ଅନ୍ୟ କେଉଁ ଚିଡିଆଖାନାରେ ଦେଖିବାକୁ ମିଳେନାହିଁ । ଏବେ ସମବଂଶୀୟ ମିଳନରୁ ବାଘମାନେ ରୋଗୀଣା ହେଉଥିବା ଦେଖିବାକୁ ମିଳୁଛି । ତେଣୁ ଅନ୍ୟ ଚିଡିଆଖାନାରୁ ବାଘ ଆଣିବା ପାଇଁ ପ୍ରୟାସ ଆରମ୍ଭ ହୋଇଛି । ବାଘ ମାନଙ୍କର ସୁରକ୍ଷା ଓ ସେମାନଙ୍କର ବଂଶ ବୃଦ୍ଧି ପାଇଁ ପ୍ରତି ବର୍ଷ ଜୁଲାଇ ୨୯ ତାରିଖକୁ ବିଶ୍ୱ ବ୍ୟାଘ୍ର ଦିବସ ଭାବରେ ପାଳନ କରାଯାଉଛି। ଚଳିତ ବର୍ଷ ନନ୍ଦନକାନନରେ ମଧ୍ୟ ବହୁ ଆଡମ୍ବର ସହିତ ଉଭୟ ଅନ୍ଲାଇନ ଓ ଅଫ୍ଲାଇନରେ ବ୍ୟାଘ୍ର ଦିବସ ପାଳନ କରାଯାଉଛି । ଏବେ ପ୍ରାଣୀ ଉଦ୍ୟାନରେ ୨୬ଟି ବାଘ ବାଘୁଣୀ (୧୨ଟି ଅଣ୍ଡିରା ଓ ୧୪ଟି ମାଈ) ଅଛନ୍ତି । ସେଥିମଧ୍ୟରୁ ସାଧାରଣ ରଙ୍ଗର ୧୬ଟି (୧୦ ଅଣ୍ଡିରା ଓ ୬ଟି ମାଈ), ଧଳା ୭ଟି (୨ଟି ଅଣ୍ଡିରା ଓ ୫ଟି ମାଈ) ଓ ୩ଟି ଅଣ୍ଡିରା ମେଲନାଷ୍ଟିକ ବାଘ ଅଛନ୍ତି । ନନ୍ଦନକାନନରେ ଆଗାମୀ ୨ବର୍ଷ ମଧ୍ୟରେ ଧଳା ବାଘ ସଂଖ୍ୟା ଦ୍ୱିଗୁଣିତ ହେବ । ପୂର୍ବଭଳି ପୁଣି ଧଳା ବାଘ ପାଇଁ ନନ୍ଦନକାନନ ଏକ ନମ୍ବର ସ୍ଥାନରେ ରହିବ ବୋଲି ପ୍ରାଣୀଉଦ୍ୟାନର ଉପ ନିର୍ଦ୍ଦେଶକ ଗତବର୍ଷ ବ୍ୟାଘ୍ର ଦିବସରେ କହିଥିଲେ । ହେଲେ ଇତିମଧ୍ୟରେ ଧଳାବାଘ ସଂଖ୍ୟା ଗୋଟିଏ ବଢ଼ିଛି । ମୋଟ ବାଘ ସଂଖ୍ୟାରୁ ଚଳିତ ବର୍ଷ ଗୋଟିଏ କମିଛି ।
