ସତ୍ୟଶିଖା( ଭୁବନେଶ୍ୱର )୦୩.୦୫.୨୦୨୨ :ଆଞ୍ଚଳିକ ପାଣିପାଗ ନିର୍ଦ୍ଦେଶାଳୟର ସୂଚନାକୁ ଭିତ୍ତି କରି ବିଏମ୍ସି ପକ୍ଷରୁ ଏକ ବାତ୍ୟା ପ୍ରସ୍ତୁତି ବୈଠକ ସୋମବାର ମେୟର ସୁଲୋଚନା ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ବୈଠକର ପ୍ରାରମ୍ଭରେ (ବିଏମ୍ସି) ପକ୍ଷରୁ ରହିଥିବା ପ୍ରସ୍ତୁତି ବାବଦରେ ପ୍ରଥମେ ସମୀକ୍ଷା କରାଯାଇଛି । ଗତ ଜୱାଦ୍ ସମୟରେ କରାଯାଇଥିବା ପ୍ରସ୍ତୁତିର କିଞ୍ଚିତ୍ ଆଲୋଚନା ପରେ ବର୍ତ୍ତମାନର ପ୍ରସ୍ତୁତିକୁ କିପରି ଆହୁରି ଦୃଢ କରିହେବ ସେନେଇ ବିଚାର ବିମର୍ଷ କରାଯାଇଛି । ବିଏମ୍ସି ଅଞ୍ଚଳରେ ୬୭ଟି ୱାର୍ଡ଼ରେ ମୋଟ ୭୨ଟି ଅସ୍ଥାୟୀ ଆଶ୍ରୟସ୍ଥଳୀ ଚିହ୍ନଟ କରାଯାଇଛି ଏବଂ ଏଗୁଡ଼ିକ ମଧ୍ୟରୁ ଅଧିକାଂଶ ବିଦ୍ୟାଳୟ ଗୁଡ଼ିକରେ କରାଯାଇଛି । ସମ୍ବେଦନଶୀଳ ଜଳବନ୍ଦୀ ସ୍ଥାନ ଭାବେ ୩୧ଟି ଅଞ୍ଚଳ ରହିଥିବା ବେଳେ ଏଠାରୁ ଅଧିକ ବର୍ଷାଜଳ ଖାଲି କରିବା ପାଇଁ ମଟର ପମ୍ପ୍ର ସହାୟତା ନିଆଯିବ ।
ଏଥିପାଇଁ ଅବ୍ୟବହିତ ପୂର୍ବରୁ ସମ୍ପୃକ୍ତ ସ୍ଥାନରେ ମଟର ପମ୍ପ୍ ନେଇ ରଖାଯିବ । ବିଏମ୍ସିର ୪ଟି ପମ୍ପ୍ ବ୍ୟତୀତ ୧୫ଟି ମଟର ପମ୍ପ୍ ଭଡ଼ା ସୂତ୍ରରେ ଆସିବ ଏବଂ ଆବଶ୍ୟକ ମତେ ଅଗ୍ନିଶମ ବିଭାଗର ମଟର ପମ୍ପ୍କୁ କାର୍ଯ୍ୟରେ ଲଗାଯିବ । ସହସା ଜଳବନ୍ଦୀ ଜନିତ ବର୍ଜ୍ୟ ସଫେଇ ଏବଂ ପାଣି ବାଟ ପରିଷ୍କାର କରିବା ନିମନ୍ତେ ପ୍ରତ୍ୟେକ ଜୋନ୍ରେ ଦିଆଯାଇଥିବା ଜେସିବି, ଟ୍ରାକ୍ଟର ଇତ୍ୟାଦି କାର୍ଯ୍ୟରେ ଲାଗିବ ଏବଂ ମୁଖ୍ୟ କାର୍ଯ୍ୟାଳୟରେ ଜରୁରୀ ପରିସ୍ଥିତି ପାଇଁ ଅଧିକ ଜେସିବି ଏବଂ ଟିପ୍ପର୍ ଇତ୍ୟାଦି ମହଜୁଦ୍ ରହିବ । ବୁଲା ପଶୁ ଇତ୍ୟାଦିଙ୍କୁ କୌଣସି ଆଘାତ ଜନିତ ସେବା ଦେବାପାଇଁ ପଶୁସମ୍ପଦ ଅଧିକାରୀ ସହରରେ କାର୍ଯ୍ୟ କରୁଥିବା ଏନ୍ଜିଓମାନଙ୍କ ଅସ୍ଥାୟୀ ଆଶ୍ରୟସ୍ଥଳୀରେ ରଖି ସେବା ଦେବାକୁ କହିଛନ୍ତି ମେୟର । ଆବଶ୍ୟକ ପଡ଼ିଲେ ଜଳବନ୍ଦୀ ଇଲାକାରୁ ସମ୍ପୃକ୍ତ ନାଗରିକମାନଙ୍କୁ ସ୍ଥାନାନ୍ତର କରାଯିବ ଏବଂ ଶୁଖିଲା ଖାଦ୍ୟର ବ୍ୟବସ୍ଥା କରାଯିବ । ଅଧିକା ଦିନ ପରିସ୍ଥିତି ଲାଗି ରହିଲେ ଗରମ ରନ୍ଧା ଖାଦ୍ୟ ଦିଆଯିବ ।
ବିଏମ୍ସିର ଏବଂ ସଂଯୁକ୍ତ ବିଭାଗର ସମସ୍ତ କର୍ମଚାରୀ କାର୍ଯ୍ୟାଳୟରେ ଉପସ୍ଥିତ ରହିବାକୁ ନିର୍ଦ୍ଦେଶ ଦିଆଯାଇଛି । କୌଣସି ପ୍ରକାର ସୂଚନା ଏବଂ ସହାୟତା ପାଇଁ ଜନସାଧାରଣ ୧୯୨୯କୁ ମାଗଣାରେ କଲ୍ କରି ପାରିବେ ବୋଲି କୁହାଯାଇଛି । ବୈଠକରେ ଉପସ୍ଥିତ ଥିବା ସଂଯୁକ୍ତ ବିଭାଗର ଅଧିକାରୀମାନଙ୍କୁ ପଚରାଯାଇ ବିଭାଗୀୟ ପ୍ରସ୍ତୁତି ବାବଦରେ ସମୀକ୍ଷା କରାଯାଇଛି । ଅଗ୍ନିଶମ ବିଭାଗର ପମ୍ପ୍, ନିରାପତ୍ତା ସରଞ୍ଜାମ, ଗଛ କାଟିବା ଓ ଉଦ୍ଧାରକାରୀ ଦଳଙ୍କୁ ମହଜୁଦ୍ ରଖାଯିବ ବୋଲି କହିଛନ୍ତି ଅଗ୍ନିଶମ ଅଧିକାରୀ ସୁରେଶ କୁମାର ବିଶ୍ୱାଳ । ପାନୀୟ ଜଳ ବ୍ୟବସ୍ଥାକୁ ନିଶ୍ଚିତ କରିବା ପାଇଁ ସହରରେ ଥିବା ୨୫ଟି ପାଣି ଟ୍ୟାଙ୍କର, ୨୫୦ଟି ସିନ୍ଟେକ୍ସ ଟାଙ୍କି ଏବଂ ବିଦ୍ୟୁତ୍ ସହାୟତା ପାଇଁ ୮୦ଟି ଡିଜେଲ୍ ଜେନେରେଟର୍ ସେଟ୍ ମହଜୁଦ ରହିଛି ବୋଲି ୱାଟ୍କୋର ଜେନେରାଲ୍ ମ୍ୟାନଜର୍ ଗୁରୁଚରଣ ଦାସ୍ କହିଛନ୍ତି । ଟାଟା ପାୱାର୍ ସେଣ୍ଟ୍ରାଲ୍ ଓଡ଼ିଶା ଡ଼ିଷ୍ଟ୍ରିବ୍ୟୁସନ୍ ଲିମିଟେଡ୍ ଆସିଥିବା ଅଧିକାରୀ ଜିତେନ୍ଦ୍ର କୁମାର ମିଶ୍ରଙ୍କୁ ଅହରହ ବିଦ୍ୟୁତ୍ ଯୋଗାଣର ତୁରନ୍ତ ପରିଚାଳନା କରିବାକୁ ମେୟର ନିର୍ଦ୍ଦେଶ ଦେଇଛନ୍ତି ।
ଏତଦ୍ ବ୍ୟତୀତ ଫୋନ୍ ଟାୱାର୍ କରିଥିବା ସଂସ୍ଥାଙ୍କୁ ନିଜସ୍ୱ ଦାୟିତ୍ୱ ନିଭାଇବା ପାଇଁ ସେମାନଙ୍କୁ କାର୍ଯ୍ୟାଳୟ ସ୍ତରୀୟ ବୈଠକରେ ଜଣାଇବାକୁ କହିଛନ୍ତି କର୍ତ୍ତୃପକ୍ଷ । ବିପର୍ଯ୍ୟୟ ସମୟରେ ଟାୱାର୍ ପଡ଼ିଯିବାର ସମ୍ଭାବନା ରହିଛି । ତେଣୁ ସମ୍ପୃକ୍ତ କମ୍ପାନୀ ଏହାର ପରବର୍ତ୍ତୀ ବ୍ୟବସ୍ଥା ତୁରନ୍ତ କରିବା ଉଚିତ୍ ବୋଲି କୁହାଯାଇଛି । ସ୍ୱାସ୍ଥ୍ୟ ଜନିତ କୌଣସି ଆବଶ୍ୟକତା ପାଇଁ ଚିଫ୍ ମ୍ୟୁନିସିପାଲ୍ ମେଡିକାଲ୍ ଅଫିସରଙ୍କୁ ଆମ୍ବୁଲାନ୍ସ, ମୌଳିକ ଔଷଧ, ସର୍ପଦଂଶନ ଚିକିତ୍ସା ପାଇଁ ଇଞ୍ଜେକ୍ସନ୍, ଓଆର୍ ସ୍, ହାଲୋଜିନ୍ ବଟିକା ଏବଂ ସମସ୍ତ ଅସ୍ଥାୟୀ ଆଶ୍ରୟସ୍ଥଳୀ ପାଇଁ ପ୍ରାଥମିକ ପ୍ରତିବିଧାନ ସରଞ୍ଜାମ (ଫାଷ୍ଟେଡ଼୍ କିଟ୍) ନିଶ୍ଚିତ କରିବାକୁ କୁହାଯାଇଛି ।
ଠିକ୍ ସେହିପରି ପରିମଳ କର୍ମଚାରୀଙ୍କୁ ନେଇ ବିପର୍ଯ୍ୟୟ ପୂର୍ବରୁ, ବିପର୍ଯ୍ୟୟ ସମୟରେ ଏବଂ ବିପର୍ଯ୍ୟୟ ପରେ ଆବଶ୍ୟକୀୟ କାର୍ଯ୍ୟ ନିଶ୍ଚିତ କରାଇବା ପାଇଁ ବିଭାଗୀୟ ଅଧିକାରୀଙ୍କୁ କୁହାଯାଇଛି । ଏହି ବୈଠକରେ ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ, ଅତିରିକ୍ତ କମିଶନର ବିନୟ କୁମାର ଦାଶ, ନଗର ଯନ୍ତ୍ରୀ ଅରୁଣ କୁମାର ନାୟକ, ମୁଖ୍ୟ ବିତ୍ତ ଅଧିକାରୀ ସଂଜୀବ୍ କୁମାର ସିଂଙ୍କ ସମେତ ବିଏମ୍ସିର ଅଧିକାରୀ ଏବଂ ସଂଯୁକ୍ତ ବିଭାଗୀୟ ଅଧିକାରୀ ଉପସ୍ଥିତ ଥିଲେ । ଡେପୁଟି କମିଶନର ଏମର୍ଜେନ୍ସି ରମେଶ ଚନ୍ଦ୍ର ଜେନା ବୈଠକ ସଂଯୋଜନା କରିଥିଲେ ।
