ସତ୍ୟଶିଖା( ଭୁବନେଶ୍ୱର)୨୧.୦୪.୨୦୨୨: ପଶୁ ଇଞ୍ଜେକସନ୍ ମଣିଷକୁ ଦେବା ଘଟଣାରେ କାର୍ଯ୍ୟରେ ଅବହେଳା କରିଥିବା ଥାନା ଏଏସଆଇ ପବିତ୍ର ମୋହନ ରାଉତଙ୍କୁ କାର୍ଯ୍ୟରୁ ନିଲମ୍ବନ କରିଛନ୍ତି ମୟୁରଭଞ୍ଜ ଆରକ୍ଷୀ ଅଧିକ୍ଷକ ରିଷୀକେଶ ଡ୍ୟାନଦେଓ ଖିଲାରୀ । ଗତ ଶନିବାର ଠାକୁରମୁଣ୍ଡା ବ୍ଲକ୍ ମହୁଲଡିହା ଗ୍ରାମର ଶ୍ରୀକାନ୍ତ ମହାନ୍ତ ନାମକ ବ୍ୟକ୍ତିଙ୍କ ଅଣ୍ଟା ବ୍ୟଥା କରୁଥିବା ବେଳେ ସେ ବିଶ୍ୱନାଥ ବେହେରା ନାମକ ନକଲି ଡାକ୍ତର ତଥା କ୍ବାକଙ୍କ ପାଖକୁ ଆସିଥିଲେ। ଏହାପରେ ଶ୍ରୀକାନ୍ତଙ୍କ ସ୍ୱାସ୍ଥ୍ୟ ପରୀକ୍ଷା କରି ବିଶ୍ୱନାଥ ତାଙ୍କୁ ଗୋଟିଏ କିମ୍ବା ଦୁଇଟି ନୁହେଁ; ଏକାଥରକେ ତିନିଟି ଇଞ୍ଜେକସନ୍ ଦେଇଥିବା ଅଭିଯୋଗ ହୋଇଥିଲା। ବିଶ୍ୱନାଥ ଇଞ୍ଜେକସନ୍ ଦେବା ପରେ ଶ୍ରୀକାନ୍ତଙ୍କୁ ଟଙ୍କା ମାଗିଥିଲେ। ପାଖରେ ଟଙ୍କା ନଥିବାରୁ ଶ୍ରୀକାନ୍ତ ତାଙ୍କ ପୁଅ ମନୋଜକୁ ଫୋନ୍ ଘରୁ ଟଙ୍କା ଆଣିବା ପାଇଁ କହିଥିଲେ। ବାପାଙ୍କ ଫୋନ୍ କଲ ପାଇବା ପରେ ମନୋଜ ଟଙ୍କା ଧରି ଆସିଥିଲେ। ତେବେ କ୍ୱାକ୍ଙ୍କୁ ଟଙ୍କା ଦେଲାବେଳେ ମନୋଜଙ୍କ ନଜର ଇଞ୍ଜେକ୍ସନ୍ ଉପରେ ପଡ଼ିଥିଲା। ଇଞ୍ଜେକ୍ସନ୍ ଉପରେ କେବଳ ପଶୁମାନଙ୍କ ପାଇଁ ଉଦ୍ଧିଷ୍ଟ ମେଲୋକ୍ସିକାମ (MELOXICAM) ଲେଖାଥିଲା। ଏହା ଜାଣିବା ପରେ ସେ ସାହି ପଡ଼ିଶାଙ୍କୁ ଡାକି ଘଟଣା ସମ୍ପର୍କରେ କହିଥିଲେ। ଏହାପରେ ମନୋଜ ଗ୍ରାମବାସୀଙ୍କ ସହ ମିଶି ବିଶ୍ବନାଥଙ୍କୁ ମହୁଲଡିହା ଥାନାରେ ଜିମା ଦେଇଥିଲେ । ହେଲେ ସେତେବେଳେ କାର୍ଯ୍ୟରତ ଥିବା ଏଏସଆଇ ପବିତ୍ର ମୋହନ ରାଉତ ଏକ ରାଜିନାମା ଲେଖାଇ କ୍ବାକଙ୍କୁ ଛାଡି ଦେଇଥିଲେ । ଯାହା ପରବର୍ତ୍ତୀ ସମୟରେ ଏକ ଅଡୁଆ ପରିସ୍ଥିତି ସୃଷ୍ଟି କରିଥିଲା । ଇଞ୍ଜେକସନ୍ ନେଇଥିବା ଶ୍ରୀକାନ୍ତ ମହାନ୍ତଙ୍କ ଏକ ଲିଖିତ ଅଭିଯୋଗ ପରେ ହତ୍ୟା ଉଦ୍ୟମ, ଭୁଲ ଇଞ୍ଜେକସନ୍ ଦେଇ ଠକିବା, ଏବଂ କାର୍ଯ୍ୟରେ ଅବହେଳା ପରି ସଙ୍ଗୀନ ଦଫାରେ ଏକ ମାମଲା ରୁଜୁ ହୋଇଥିଲା। ହେଲେ ଆସାମୀ ସେତେବେଳେ ବହୁତ ସମୟ ପାଇଥିଲା ଫେରାର ହେବା ପାଇଁ । ଯାହା ଫଳରେ ଆଜି ପର୍ଯ୍ୟନ୍ତ ପୁଲିସ ସେହି ଠକ କ୍ବାକକୁ ଧରିବାରେ ବିଫଳ ହୋଇଛି । ଆଜକୁ ୫/୬ ଦିନ ବିତି ଯାଇଥିଲେ ମଧ୍ୟ ଆସାମୀକୁ ଧରି ନପାରିବା ଯୋଗୁଁ ପୁଲିସର ପାରିବା ପଣିଆ ପଦାରେ ପଡିଛି । ତେବେ ଏତେ ସବୁ କାର୍ଯ୍ୟରେ ଅବହେଳା କରିଥିବା ଏଏସଆଇ ପବିତ୍ର ମୋହନ ରାଉତଙ୍କ ସମ୍ପର୍କରେ ଜାଣିବା ପରେ ତୁରନ୍ତ କାର୍ଯ୍ୟାନୁଷ୍ଠାନ ନେଇଥିଲେ ମୟୁରଭଞ୍ଜ ଆରକ୍ଷୀ ଅଧିକ୍ଷକ ।
