ସତ୍ୟଶିଖା ୩୧/୧୨/୨୦୨୦ : ଦେଶର ହୋଟେଲ୍ ଶିଳ୍ପ ଓ ରାଜନୀତି ଜଗତର ଏକ ଚର୍ଚ୍ଚିତ ଚେହେରା ହେଉଛନ୍ତି ମେ’ଫେୟାର ଗ୍ରୁପ୍ ଅଫ୍ ହୋଟେଲସ୍ର ପ୍ରତିଷ୍ଠାତା ଦିଲ୍ଲୀପ ରାୟ । ଏକ ସାକ୍ଷାତକାରରେ ସେ କରୋନା ମହାମାରୀର ପ୍ରଭାବ, ସ୍ଥିତିରେ ହେଉଥିବା ସୁଧାର, ଭବିଷ୍ୟତ ଯୋଜନା ଓ ନୂଆ ପ୍ରକଳ୍ପ ବିଷୟରେ ଯାହା କହିଛନ୍ତି ତାହାକୁ ଏଠାରେ ଉପସ୍ଥାପନ କରାଯାଇଛି :
ଇକୋ-ରିଟ୍ରିଟ୍ ରାଜ୍ୟ ହୋଟେଲ୍ ଶିଳ୍ପ ପାଇଁ କିଭଳି ସହାୟକ ହେବ?
ଇକୋ-ରିଟ୍ରିଟ୍ର ବହୁତ ଭଲ ପ୍ରଭାବ ପଡ଼ିବ। ଯେଉଁମାନେ ଇକୋ-ରିଟ୍ରିଟ୍ ପାଇଁ ଆସୁଛନ୍ତି ସେମାନେ ହୋଟେଲ୍ରେ ରହି ସେହି ସ୍ଥାନକୁ ଯାଉଛନ୍ତି । ପୁଣି ସେଠାରୁ ଫେରି ହୋଟେଲ୍ରେ ରହୁଛନ୍ତି । ଏହା ନିଶ୍ଚିତ ରୂପେ ସକାରାତ୍ମକ ପ୍ରଭାବ ପକାଇବ ।
ସମ୍ପ୍ରସାରଣ ପାଇଁ କ’ଣ ଯୋଜନା ରହିଛି?
କରୋନା ମହାମାରୀ ପୂର୍ବରୁ ଆମେ ରାୟପୁର ପ୍ରକଳ୍ପ ଆରମ୍ଭ କରିଥିଲୁ । ଦେଶର ପ୍ରଥମ ଚା’ ରିସୋର୍ଟକୁ ସିଲିଗୁଡ଼ିରେ ଆମେ ପ୍ରସ୍ତୁତ କରିସାରିଛୁ । ଏହାକୁ ଏପ୍ରିଲ୍ରେ ଉଦଘାଟନ କରିବାର ଯୋଜନା ରହିଛି । ଏହା ହେଉଛି ଦେଶର ପ୍ରଥମ ପ୍ରପର୍ଟି ରିସୋର୍ଟ ଯେଉଁଠାରେ ପ୍ରତି କୋଠରିରୁ ଅତିଥିମାନେ ଚା’ ବଗିଚାକୁ ଉପଭୋଗ କରିପାରିବେ । କୋଲକାତା ପ୍ରକଳ୍ପରେ ମଧ୍ୟ କାର୍ଯ୍ୟ ଚାଲିଛି । ଆମେ ତାହାକୁ ୨୦୨୨ରେ ଖୋଲିବାକୁ ଯୋଜନା ରଖିଛୁ ।
ଓଡ଼ିଶାରେ ନୂଆ ହୋଟେଲ୍ ପାଇଁ କ’ଣ ଯୋଜନା ରହିଛି?
ପୁରୀର ସାତଶଙ୍ଖରେ ଆମର ୭ ଏକର ଜମି ଅଛି। ବିଚ୍ କନ୍ଭେନ୍ସନ୍ ସ୍ଥାପନ କରିବା ଲାଗି ସରକାର ଆମ ସହିତ ଆଲୋଚନା କରୁଛନ୍ତି । ଓଡ଼ିଶା ପାଇଁ ଏହି ଦୁଇଟି ଯୋଜନା ରହିଛି । ସାତଶଙ୍ଖରେ ଏକ ୱେଲ୍ନେସ୍ ରିସୋର୍ଟ ସ୍ଥାପନ କରିବୁ । ଘର ତିଆରି ଲାଗି ଅନୁମତି ମିଳିଲେ କାମ ଆରମ୍ଭ ହୋଇଯିବ । ଏହା ହେବ ଓଡ଼ିଶାର ପ୍ରଥମ ୱେଲନେସ୍ ରିସୋର୍ଟ । କେରଳରେ ୱେଲ୍ନେସ୍ ଶିଳ୍ପ ବେଶ ଲୋକପ୍ରିୟ। ସେହି ଢାଞ୍ଚାରେ ଏହାକୁ ତିଆରି କରାଯିବ ।
ଆପଣଙ୍କ ହୋଟେଲ୍ରେ ଓଡ଼ିଶାର ସଂସ୍କୃତି ଓ ପରମ୍ପରାକୁ ସ୍ଥାନିତ କରିବାକୁ ପ୍ରୟାସ କରିଛନ୍ତି କି?
ଆମର ଏଭଳି କୌଣସି ହୋଟେଲ୍ ନାହିଁ ଯାହାର ଅଭ୍ୟର୍ଥନା କକ୍ଷରେ ମହାପ୍ରଭୁ ଜଗନ୍ନାଥଙ୍କ ଫଟୋ ନାହିଁ । ଆମ ହୋଟେଲ୍କୁ ଲୋକମାନେ ଛୋଟ ଓଡ଼ିଶା ବୋଲି କୁହନ୍ତି । ଆମ ହୋଟେଲ୍ ଓଡ଼ିଆଙ୍କ ଦ୍ବାରା ପରିଚାଳିତ ହେଉଛି ।
