ସତ୍ୟଶିଖା(ଭୁବନେଶ୍ୱର)୨୨.୦୬. ୨୦୨୨ : ଏନ୍ଡିଏ ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କର ପିଲାଟି ଦିନରୁ ପାଠ ପଢା ପ୍ରତି ପ୍ରବଳ ଆଗ୍ରହ ଥିଲା। ୧୯୬୦ରେ ସେ ସପ୍ତମ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିଲେ। ଶ୍ରୀମତୀ ମୁର୍ମୁଙ୍କ ସମ୍ପର୍କୀୟ ଦାଦା ସ୍ବର୍ଗତ କାର୍ତ୍ତିକ ଚନ୍ଦ୍ର ମାଝୀ ସେତେବେଳେ ମନ୍ତ୍ରୀ ଥିଲେ। ତାଙ୍କ ମାର୍ଫତରେ ଭୁବନେଶ୍ବର ଆସି ୟୁନିଟ – ୨ ସ୍ଥିତ ବାଳିକା ଉଚ୍ଚ ବିଦ୍ୟାଳୟରେ ନାମ ଲେଖାଇ ପାଠ ପଢିଥିଲେ।
ଶ୍ରୀମତି ମୁର୍ମୁ ସେତେବେଳେ ଆଦିବାସୀ ଛାତ୍ରୀନିବାସରେ ରହି୧୯୭୦ ରୁ ୭୪ ପର୍ଯ୍ୟନ୍ତ ହାଇସ୍କୁଲରେ ପାଠ ପଢିଥିଲେ। ୧୯୭୪ ମସିହାରେ ହାଇସ୍କୁଲ ପାସ୍ କରିଥିଲେ ମଧ୍ୟ କଲେଜରେ ପଢ଼ିବାର ସୁଯୋଗ ମିଳି ନଥିଲା। କଲେଜରେ ପଢ଼ିବାକୁ ହେଲେ ଆବେଦନ କରିବାକୁ ହୁଏ ବୋଲି ସେତେବେଳେ ସେ ଜାଣି ନଥିଲେ। ତା ପରବର୍ଷ ରମାଦେବୀ ମହିଳା ମହାବିଦ୍ୟାଳୟରେ ନାମଲେଖା ପାଇଁ ଆବେଦନ କରିବା ସହ ନାମ ଲେଖାଇଥିଲେ। ରମାଦେବୀ ଆଦିବାସୀ ଛାତ୍ରୀ ନିବାସରେ ରହି ପାଠ ପଢ଼ୁଥିଲେ। ସେ ହଷ୍ଟେଲରେ ରହିବାବେଳେ ମେସ୍ ପରିଚାଳନା ଦାୟିତ୍ବରେ ମଧ୍ୟ ଥିଲେ। ରାଜଧାନୀରେ ୮ ବର୍ଷ ପାଠ ପଢ଼ିଥିଲେ। ସ୍ନାତକ ଉତ୍ତୀର୍ଣ୍ଣ କରିବା ପରେ ଆଉ ଅଧିକ ପଢ଼ିବା ସେ ସମୟରେ ତାଙ୍କ ପାଇଁ ଅସମ୍ଭବ ଥିଲା। ଓଡ଼ିଶା ସଚ୍ଚିବାଳୟରେ ୧୯୬୯ରେ ଚାକିରୀ ପାଇଥିଲେ। ଚାକିରୀ ପାଇବା ପରେ ବ୍ୟାଙ୍କ ଅଧିକାରୀ ଶ୍ୟାମଚରଣ ମୁର୍ମୁଙ୍କ ସହିତ ଶ୍ରୀମତୀ ମୁର୍ମୁଙ୍କର ବିବାହ ହୋଇଥିଲା। ବିବାହ ପୂର୍ବରୁ ଦ୍ରୌପଦୀ ଟୁଡୁ ଥିବାବେଳେ ବିବାହ ପରେ ଏହା ମୁର୍ମୁରେ ରୂପାନ୍ତରିତ ହୋଇଥିଲା। ସଚ୍ଚିବାଳୟ ଚାକିରି ଛାଡ଼ିବା ପରେ ଶ୍ରୀମତୀ ମୁର୍ମୁ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ରରେ ଶିକ୍ଷକତା କରିଥିଲେ।
