ସତ୍ୟଶିଖା (ପୁରୀ) ୨୦.୧୨.୨୦୨୧: ରାଜ୍ୟ ସରକାର BSKY ହେଲ୍ଥକାର୍ଡ ବଣ୍ଟନରେ ଲାଗି ପଡିଛନ୍ତି । କିନ୍ତୁ ଏହା କେତେଦୂର କାର୍ଯ୍ୟକାରୀ ହେବ ତାକୁ ନେଇ ଏବେ ପ୍ରଶ୍ନ ଉଠିଛି । କାରଣ BSKY ଯୋଜନାରେ ଆଉ ରୋଗୀଙ୍କୁ ଚିକିତ୍ସା ସୁବିଧା ଯୋଗାଇ ଦେବା ଜମା ବି ସମ୍ଭବ ନୁହେଁ । ଏ ବୟାନ ଦେଇଛି ଅଲ ଓଡ଼ିଶା ପ୍ରାଇଭେଟ ମେଡ଼ିକାଲ ଏଷ୍ଟାବ୍ଲିସମେଣ୍ଟ ଫୋରମ । ବୀମା କାର୍ଡରେ ପୁରୁଷଙ୍କ ପାଇଁ 5 ଲକ୍ଷ ଓ ମହିଳାଙ୍କ ପାଇଁ 10 ଲକ୍ଷ ଟଙ୍କା ବୀମା ରହିଛି । କିନ୍ତୁ ନିୟମକୁ ଦେଖିଲେ ଏହା କାର୍ଯ୍ୟକାରୀ ହୋଇପାରିବ ନାହିଁ। ସରକାର ବିଭିନ୍ନ ଚିକିତ୍ସାକୁ ନେଇ ଏକ ନିର୍ଦ୍ଦିଷ୍ଟ ଦେୟ ରଖିଛନ୍ତି । ଯଦି କୌଣସି ଚିକିତ୍ସାରେ ଅଧିକ ଟଙ୍କା ଖର୍ଚ୍ଚ ହୁଏ ତାହା ହେଲେ ତାକୁ କିଏ ଭରଣା କରିବ ସେ ନେଇ କିଛି ବି ସ୍ପଷ୍ଟ ସୂଚନା ନାହିଁ ।
ଅଧିକ ଚିକିତ୍ସା ଦେୟ ହେଲେ ରୋଗୀଙ୍କୁ ଏହା ଭରଣା କରିବାକୁ ପଡ଼ିବ । ସେହିପରି ଅନେକ ଚିକିତ୍ସା ପାଇଁ ଯେତିକି ଅର୍ଥ ଦେୟ ନିର୍ଦ୍ଧାରିତ ଥାଏ ସରକାର କିନ୍ତୁ ଯଥେଷ୍ଟ କମ ଅର୍ଥ ସ୍ଥିର କରିଛନ୍ତି । ଫଳରେ କମ ଅର୍ଥରେ ଚିକିତ୍ସା ସେବା ଯୋଗାଇବା ସମ୍ଭବ ହେବନାହିଁ । ତେବେ ସରକାରଙ୍କ ସହ ବିଭିନ୍ନ ଘରୋଇ ହସ୍ପିଟାଲ କରିଥିବା ଏମଓୟୁ ଅନୁଯାୟୀ 30 ଦିନରେ ଚିକିତ୍ସା ଦେୟ ସରକାର ଭରଣା କରିବେ। କିନ୍ତୁ ଗତ 4 ମାସ ହେବ ସରକାର ଏହା ଦେଉନାହାନ୍ତି । ଫଳରେ ଅନେକ ଘରୋଇ ହସ୍ପିଟାଲ ପରିଚାଳନା କରିବାରେ ସମସ୍ୟା ସୃଷ୍ଟି ହେଲାଣି ।
ସେହିପରି bsky ଅଧୀନରେ ରୋଗୀମାନେ cdmo ଙ୍କ ଠାରୁ ରେଫର ସାର୍ଟିଫିକେଟ ଆଣିଲେ ହିଁ ଘରୋଇ ଚିକିତ୍ସାଳୟରେ ଚିକିତ୍ସା ଯୋଗାଇ ଦେବେ । ଯାହାକି ଅଧିକାଂଶ ହିତାଧିକାରୀ ଜାଣି ନାହାନ୍ତି । ସେମାନେ ସିଧାସଳଖ ନିଜ ରୋଗୀଙ୍କୁ ଆଣି ଘରୋଇ ହସ୍ପିଟାଲରେ ଭର୍ତ୍ତି କରୁଥିବାରୁ । bsky ବୀମାରେ ଚିକିତ୍ସା ସେବା ଯୋଗାଇ ହେଉନାହିଁ । ଫଳରେ ଅନେକ ସମୟରେ ଗଣ୍ଡଗୋଳ ଘଟୁଛି । ତେବେ ସରକାରଙ୍କୁ ଏନେଇ ଘରୋଇ ହସ୍ପିଟାଲ ସଙ୍ଘ ପକ୍ଷରୁ ଶୀଘ୍ର ଅବଗତ କରାଯିବ ।
ଏହି ସମସ୍ୟା ସରକାର ତୁରନ୍ତ ସମାଧାନ ନକଲେ ଆଗାମୀ ଦିନରେ ଘରୋଇ ହସ୍ପିଟାଲ କର୍ତ୍ତୃପକ୍ଷ ସରକାରଙ୍କ bsky ହେଲ୍ଥ କାର୍ଡ ଚିକିତ୍ସା ସେବା ଯୋଗାଇବା ଆଉ ସମ୍ଭଵ ହେବ ନାହିଁ ବୋଲି ରୋକ ଠୋକ୍ କହିଛନ୍ତି ଘରୋଇ ମେଡ଼ିକାଲ ସଂଘ । ରାଜ୍ୟ ସରକାର bsky କାର୍ଡ ବାଣ୍ଟି ବାହାବା ନେଉଥିବା ବେଳେ ଏହି ହେଲଥ କାର୍ଡ ଯେ ଆଗାମୀ ଦିନରେ ଅକାମି ହୋଇଯିବ ତାହା ଏବେ ଘରେଇ ମେଡ଼ିକାଲ ସଙ୍ଘର ସୂଚନା ପରେ ସ୍ପଷ୍ଟ ହେବାରେ ଲାଗିଛି । ଆଗାମୀ ପଂଚାୟତ ନିର୍ବାଚନକୁ ସରକାର ନଜରରେ ରଖି ଲୋକଙ୍କୁ ଖୁସି କରେଇବାକୁ କେଵଳ bsky କାର୍ଡ ବାଣ୍ଟୁଥିବା ଏବେ ଚର୍ଚ୍ଚା ଜୋର ଧରିଛି ।
