ଆଜି ୧୨ ଘଣ୍ଟିଆ ବୀରମିତ୍ରପୁର ବନ୍ଦ

ବୀରମିତ୍ରପୁର ଦେଇ ଯାଇଥିବା ୧୪୩ ନଂ ଜାତୀୟ ରାଜପଥ ଅବସ୍ଥା ଶୋଚନୀୟ ହୋଇପଡ଼ିଛି। ଦୀର୍ଘ ଦିନ ହେଲା ଏହାର ମରାମତି ପାଇଁ ବୀରମିତ୍ରପୁର ବିକାଶମଞ୍ଚ ପକ୍ଷରୁ ଦାବି ହୋଇ ଆସୁଛି। ଏପରିକି ଦାବି ପୂରଣ ନିମନ୍ତେ ଗତ ୧୭ ତାରିଖରେ ବୀରମିତ୍ରପୁର ଦେଇ ଯାଇଥିବା ୧୪୩ ନଂ ଜାତୀୟ ରାଜପଥ ଅବରୋଧ କରାଯାଇଥିଲା ।ଉକ୍ତ ସମୟରେ ପ୍ରଶାସନିକ ଅଧିକାରୀ ଆନ୍ଦୋଳନକାରୀଙ୍କ ସହ ଆଲୋଚନା କରି ୧୦ ଦିନରେ ରାସ୍ତା ମରାମତି କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ଇତି ମଧ୍ୟରେ ୨୦ ଦିନ ବିତି ଗଲାଣି। ହେଲେ ଅବସ୍ଥା ଯେସାକୁ ତେସା। ଅର୍ଥାତ ପ୍ରତିଶ୍ରୁତି ଦେଇ ଭୁଲିଗଲା ପ୍ରଶାସନ । ଏହା ପ୍ରତିବାଦରେ ଆଜି ରାସ୍ତାକୁ ଓହ୍ଲାଇଥିବା ବୀରମିତ୍ରପୁର ବିକାଶ ମଞ୍ଚ ୧୨ ଘଣ୍ଟିଆ ବନ୍ଦ ଡାକରା ଦେଇଛି।

ଆଜି ସକାଳ ୬ଟାରୁ ସନ୍ଧ୍ୟା ୬ଟା ସମୟ ପର୍ଯ୍ୟନ୍ତ ବୀରମିତ୍ରପୁର ଜାତୀୟ ରାଜପଥ ୧୪୩ କୁ ଅବରୋଧ କରାଯାଇଛି। ବୀରମିତ୍ରପୁର ତଲସେରା, ନୂଆ ବସ ଷ୍ଟାଣ୍ଡ, ଚାଇନା ଟାଉନ୍, ଏବଂ ଓଡିଶା ଝାଡ଼ଖଣ୍ଡ ସୀମାରେ ବ୍ୟାରିକେଡ ଲଗାଇ ରାସ୍ତା ଅବରୋଧ କରାଯାଇଛି  । ଏଥିଯୋଗୁ ଜାତୀୟ ରାଜପଥ ବନ୍ଦ ରହିବା ସହ ବୀରମିତ୍ରପୁରର ସମସ୍ତ ଦୋକାନ ବଜାର ବନ୍ଦ ରହିଛି  । ଦୁଇ ପାର୍ଶ୍ଵରେ ଶହ ଶହ ସଂଖ୍ୟାରେ ଯାନବାହାନ ଅଟକି ରହିଛି  । ସୁରକ୍ଷାକୁ ଦୃଷ୍ଟିରେ ରଖି ବୀରମିତ୍ରପୁର ପୁଲିସ ପକ୍ଷ୍ୟରୁ କଡ଼ାକଡ଼ି ବ୍ୟବସ୍ଥା କରାଯାଇଛି ।