ସତ୍ୟଶିଖା (ଭୁବନେଶ୍ୱର) ୧୫/୦୨/୧୦୨୧ : ଶନିବାର ବିଳମ୍ବିତ ରାତିରେ ଏକ ପବ୍ରେ ଦୁଇ ଗ୍ରାହକଙ୍କୁ ଗୋଡ଼ାଇ ଗୋଡ଼ାଇ ହାଣିବା ବେଳର ଦୃଶ୍ୟ ସିସିଟିଭିରେ କଏଦ ହୋଇ ରହିଛି । ତେବେ ଖାରବେଳନଗର ଅଞ୍ଚଳରେ ଥିବା ମ୍ୟାଡ୍ ମୁଲ୍ ଦ ବ୍ରିଉ କ୍ଲବ୍ର ଅଭିଯୁକ୍ତ ବାଉନ୍ସରମାନେ ଫେରାର ହୋଇ ଯାଇଛନ୍ତି । ଖାରବେଳନଗର ଥାନା ପୁଲିସ ଆଜି ବିଭିନ୍ନ ଜାଗାରେ ଚଢ଼ଉ କରିଥିଲେ ମଧ୍ୟ ସେମାନଙ୍କ ଟେର୍ ପାଇ ନାହିଁ । ବାଉନ୍ସରମାନଙ୍କୁ ଆଣି ଥାନାରେ ହାଜର କରିବା ପାଇଁ ପୁଲିସ ପବ୍ ମାଲିକକୁ ନୋଟିସ କରିଛି । ଅନ୍ୟପଟେ ଏହି ମାମଲରେ ଆହତ ଦୁଇ ଯୁବକଙ୍କ ସ୍ୱାସ୍ଥବସ୍ଥା ସଙ୍କଟାପନ୍ନ ରହିଛି । ଉଭୟଙ୍କର ବେକରେ ଗଭୀର ଆଘାତ ଲାଗିଛି । ସେମାନଙ୍କୁ ପ୍ରଥମେ କ୍ୟାପିଟାଲ ଓ ପରେ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ଏ ନେଇ ଆହତଙ୍କ ବାପା ମହେନ୍ଦ୍ର ପ୍ରସାଦଙ୍କ ଅଭିଯୋଗକୁ ଆଧାର କରି ଖାରବେଳ ନଗର ଥାନା ପୁଲିସ ଏକ ମାମଲା ରୁଜୁ କରିଛି ।
ଅଭିଯୋଗ ମୁତାବକ, ମହେନ୍ଦ୍ରଙ୍କ ପୁଅ ଆର୍ଯ୍ୟ ବେଦାନ୍ତ ଓ ତାଙ୍କ ସାଙ୍ଗ ଶୁଭାଶିଷ ଗତ ରାତିରେ ଏହି ପବ୍କୁ ଯାଇଥିଲେ । ପବ୍ ଭିତରେ ମଦ୍ୟପାନ ଓ ନାଚକୁ ନେଇ ସେଠାରେ ବାଉନ୍ସରଙ୍କ ସହ ଉଭୟଙ୍କର ବଚସା ହୋଇଥିଲା । ବାଉନ୍ସରମାନେ ଉଭୟଙ୍କୁ ହତ୍ୟା ଧମକ ଦେଇଥିଲେ । ବଚସା ଉଗ୍ର ରୂପ ନେବା ପରେ ୨ ଯୁବକ ଓ ବାଉନ୍ସର ବାହାରକୁ ଆସି ଯାଇଥିଲେ। ବାହାରେ ବାଉନସରମାନେ ଆଉ୫ ଜଣଙ୍କୁ ଡାକି ଅାଣି ଉଭୟଙ୍କୁ ଛୁରି ଓ ଭୁଜାଲିରେ ଗୋଡ଼ାଇ ଗୋଡ଼ାଇ ହାଣି ପକାଇଥିଲେ । ଏଥିରେ ଶୁଭାଶିଷ ଓ ଆର୍ଯ୍ୟଙ୍କ ବେକ ଓ ମୁଣ୍ଡରେ ଗଭୀର ଆଘାତ ଲାଗିଥିଲା । ଖବର ପାଇ ଖାରବେଳ ନଗର ଥାନା ପୁଲିସ ଘଟଣାସ୍ଥଳରେ ପହଞ୍ଚି ଉଭୟ ଅଭିଯୁକ୍ତଙ୍କୁ ମେଡିକାଲ ନେଇଥିଲା । ଉଲ୍ଲେଖନୀୟ ଏହି ଲକ୍ଡାଉନ୍ ସମୟରେ ଏହି ପବ୍ ଉପରେ ପୁଲିସ ଚଢ଼ଉ କରିଥିଲା ।
