ସତ୍ୟଶିଖା( ଭୁବନେଶ୍ୱର )୧୦.୧୦.୨୦୨୨: ଧାମନଗର ଉପନିର୍ବାଚନ ପାଇଁ ବିଜେପି ଘୋଷଣା କଲା ପ୍ରାର୍ଥୀ। ସ୍ୱର୍ଗତ ବିଧାୟକ ବିଷ୍ଣୁ ସେଠୀଙ୍କ ପୁଅ ସୂର୍ଯ୍ୟବଂଶୀ ସୂରଜଙ୍କ ନାଁରେ ଦଳ ମାରିଛି ବିଧିବଦ୍ଧ ମୋହର। ଆଜି କେନ୍ଦ୍ରୀୟ ବିଜେପି ପକ୍ଷରୁ ଏନେଇ ପ୍ରେସ୍ ବିଜ୍ଞପ୍ତି ଜାରି କରାଯାଇଛି। ତେବେ ଏହା ପୂର୍ବରୁ ହିଁ ସୂର୍ଯ୍ୟବଂଶୀ ଧାମନଗରରେ ନିଜ କ୍ୟାଂପେନ୍ ଆରମ୍ଭ କରିସାରିଛନ୍ତି। ସେପଟେ ବିଜେପି ଟିମ୍ ବୈଠକ କରି ନିର୍ବାଚନ ଜିତିବା ରଣନୀତି ପ୍ରସ୍ତୁତ କରିଛି। ଏବେ ଦଳ ପ୍ରଚାର ଜୋରସୋରେ କରିବା ପାଇଁ ପ୍ରସ୍ତୁତ ହୋଇଛି। ଏନେଇ ସୂର୍ଯ୍ୟବଂଶୀ ସୂରଜ କହିଛନ୍ତି, ସ୍ଥାନୀୟ ଲୋକଙ୍କ ଅନେକ ଆଶା ବାପାଙ୍କ ଉପରେ ରହିଥିଲା। ବାପା ଚାଲି ଯାଇଥିବାରୁ ଏହି ଅଧୁରା ସ୍ୱପ୍ନକୁ ସେ ପୂରଣ କରିବେ।
ବିଜେଡି ଘନ ଘନ ସଭା କରୁଥିଲେ ମଧ୍ୟ ଦଳରେ ବଢୁଥିବା ଗୋଷ୍ଠୀ କନ୍ଦଳ ପାଇଁ ପ୍ରାର୍ଥୀ ଘୋଷଣାରେ ବିଳମ୍ବ ହେଉଥିବା କୁହଯାଉଛି। ତେଣେ କଂଗ୍ରେସ କ୍ଷେତ୍ର ପରିଦର୍ଶନ କରି କାହାକୁ ପ୍ରାର୍ଥୀ କରାଯିବ ସେନେଇ ରିପୋର୍ଟ ପ୍ରସ୍ତୁତ କରାଯାଇଛି। ଆସନ୍ତାକାଲି ପିସିସି ସଭାପତି ଓ ଗଠିତ କମିଟି ମଧ୍ୟରେ ବୈଠକ ହେବ ତାପରେ ପ୍ରାର୍ଥୀ ଘୋଷଣା ହେବ ବୋଲି ସୂଚନା ମିଳିଛି।
