ସତ୍ୟଶିଖା(ନୂଆଦିଲ୍ଲୀ) ୧୧.୧୨.୨୦୨୧: ଖାଉଟିଙ୍କ ପାଇଁ ଆଉ ଶସ୍ତା ତେଲ ଯୁଗ ଫେରିବ ନାହିଁ । ଆସନ୍ତା ବର୍ଷ ଲିଟର ପିଛା ଖାଇବା ତେଲର ସ୍ୱାଭାବିକ ଦର ୧୦୦ ରୁ ୧୦୫ ଟଙ୍କା ମଧ୍ୟରେ ରହିବ ବୋଲି ଆଶଙ୍କା ପ୍ରକାଶ ପାଇଛି । ୨୦୧୯ ତୁଳନାରେ ଏହା ୩୦% ଅଧିକ । ତେବେ ମାର୍ଚ୍ଚ ୨୦୨୨ ରୁ ଗ୍ରାହକ ବର୍ତ୍ତମାନର ଦରରୁ ୭ ରୁ ୮ % ରିହାତି ପାଇବେ । ଉକ୍ତ ସମୟରେ ଦେଶରେ ଶୀତଦିନିଆ ସୋରିଷ ଅମଳ ହୋଇପାରିବ ବୋଲି ବଜାର ବିଶେଷଜ୍ଞମାନେ ପ୍ରକାଶ କରିଛନ୍ତି । ସୂଚନା ଯୋଗ୍ୟ, ୨୦୨୧ ରେ ଭାରତରେ ଖାଇବା ତେଲ ଦର ୨୦୦ ଟଙ୍କା ପାର କରିଛି । ବର୍ତ୍ତମାନ ଦର ଖସିଥିବା ସତ୍ତ୍ୱେ ଆଗକୁ ଏଥିରେ ଦରବୃଦ୍ଧି ଜାରି ରହିବ । ଅନ୍ତର୍ଜାତୀୟ ବଜାରରେ ସୋୟାବିନ, ସୂର୍ଯ୍ୟମୁଖୀ ଓ ତାଳ ତେଲ ଦର ବଡ଼ ମାତ୍ରାରେ ବୃଦ୍ଧି ପାଇଛି । ଭାରତ ଏହାର ଖାଦ୍ୟ ତେଲ ଆବଶ୍ୟକତାର ୭୦% ଆମଦାନି ଜରିଆରେ ପୂରଣ କରିଥାଏ ।
