ସତ୍ୟଶିଖା (କଟକ) ୩୦/୦୧/୨୦୨୧ : ଓଡ଼ିଶା କ୍ରିକେଟ ଆସୋସିଏସନ (ଓସିଏ) ଆନୁକୂଲ୍ୟରେ ଭୁବନେଶ୍ୱର କିଟ୍ ଷ୍ଟାଡ଼ିୟମରେ ଚାଲିଥିବା ଏମ୍ଜିଏମ୍ ମହିଳା ଟ୍ବେଣ୍ଟି୨୦ ଲିଗର ଶୁକ୍ରବାର ୨ଟି ମ୍ୟାଚ ଖେଳାଯାଇଥିଲା । ଏଥିରେ ଓଡ଼ିଶା ଭାଓଲେଟ୍ ଓ ପର୍ପଲ ବିଜୟୀ ହୋଇଛନ୍ତି । ପ୍ରଥମ ମ୍ୟାଚରେ ଓଡ଼ିଶା ଭାଓଲେଟ୍ ୮ ୱିକେଟରେ ଓଡ଼ିଶା ୟେଲୋକୁ ପରାସ୍ତ କରିଛି । ୟେଲୋ ପ୍ରଥମେ ବ୍ୟାଟିଂ କରି ୨୦ ଓଭରରେ ୭ ୱିକେଟ ହରାଇ ୭୮ରନ କରିଥିଲା । ସସ୍ମିତା ମହାଳିକ୍ ୨୪ ଓ ପ୍ରିୟଙ୍କା ପି. ସାହୁ ୧୬ରନ କରିଥିଲେ । ଭାଓଲେଟ୍ ପକ୍ଷରୁ କୁନି ବାଦାରା ୨ଟି, କଳ୍ପନା ନାୟକ ଓ ଅଧିନାୟିକା ଅଞ୍ଜଳି ସିଂହ ପ୍ରତ୍ୟେକ ଗୋଟିଏ ଲେଖାଏଁ ୱିକେଟ ନେଇଥିଲେ । ଜବାବରେ ଭାଓଲେଟ୍ ୧୫.୪ ଓଭର ଖେଳି ୨ ୱିକେଟ ବିନିମୟରେ ୮୨ରନ କରି ବିଜୟୀ ହୋଇଥିଲା । ଅଞ୍ଜଳି ସିଂହ ୨୬ରନ କରି ଆଉଟ୍ ହୋଇଥିବାବେଳେ ଅଦ୍ଵିତି ଏସ. ଦେଓ ୩୩ ଓ ସୁଶ୍ରୀ ଦିବ୍ୟଦର୍ଶିନୀ ୧୫ରନ କରି ଅପରାଜିତ ରହିଥିଲେ। ୟେଲୋ ପକ୍ଷରୁ ଲକ୍ଷ୍ମୀପ୍ରିୟା ନାୟକ ଓ ବର୍ଷା ଆର ସିଂହ ଗୋଟିଏ ଲେଖାଏଁ ୱିକେଟ ନେଇଥିଲେ । କୁନି ବାଦାରାଙ୍କୁ ଓସିଏ ସଦସ୍ୟ ସନ୍ତୋଷ ଦାସ ପ୍ଲେୟାର ଅଫ ଦି ମ୍ୟାଚ ପୁରସ୍କାର ପ୍ରଦାନ କରିଥିଲେ ।
ଦ୍ଵିତୀୟ ମ୍ୟାଚରେ ଓଡ଼ିଶା ପର୍ପଲ ୪୫ରନରେ ଓଡ଼ିଶା ଗ୍ରୀନ୍କୁ ପରାସ୍ତ କରିଛି। ପର୍ପଲ ପ୍ରଥମେ ବ୍ୟାଟିଂ କରି ୨୦ ଓଭର ଖେଳି ବିନା ୱିକେଟରେ ୧୫୪ରନ କରିଥିଲା । ଦୁଇ ଓପନର ସରିତା ମେହେର ୭୯ ଓ ଅଧିନାୟିକା ମଧୁସ୍ମିତା ବେହେରା ୬୮ରନ କରି ଅପରାଜିତ ରହିଥିଲେ । ଜବାବରେ ଓଡ଼ିଶା ଗ୍ରୀନ୍ ୨୦ ଓଭର ଖେଳି ୬ ୱିକେଟ ହରାଇ ୧୦୯ରନ କରିବାକୁ ସକ୍ଷମ ହୋଇଥିଲା । ଅଲିପ୍ସା ବିଶ୍ୱାଳ ୩୭, ସୁମିତ୍ରା ସାହୁ ୧୯ ଓ ରୋଶନାରା ପରୱିନ ୧୭ରନ କରିଥିଲେ । ପର୍ପଲ ପକ୍ଷରୁ ମଧୁସ୍ମିତା ବେହେରା ୩ଟି ଓ ଡି ଜାନକୀ ରେଡ୍ଡି ଗୋଟିଏ ୱିକେଟ ନେଇଥିଲେ । ମଧୁସ୍ମିତା ବେହେରାଙ୍କୁ ଓସିଏ ସଦସ୍ୟ ଅଞ୍ଜନ କୁମାର ଖୁଣ୍ଟିଆ ପ୍ଳେୟାର ଅଫ ଦି ମ୍ୟାଚ ପୁରସ୍କାର ପ୍ରଦାନ କରିଥିଲେ ।
